​ប្រែ​សម្រួលៈ​បំណង​(​ដេល្លី​ម៉េល​)៖ សហរដ្ឋ​អាម៉េរិក​កាលពី​ថ្ងៃ​ពុធ​ទី​៩​មីនា​បាន​បដិសេធ​ការចោទប្រកាន់​ជា​ថ្មី​របស់​រុស្ស៊ី​ដែលថា រដ្ឋាភិបាល​ក្រុង​វ៉ាស៊ីនតោន​បាន​ដំណើរការ​មន្ទីរពិសោធន៍​សង្គ្រាម​ជីវសាស្ត្រ​​រាប់សិប​នៅក្នុង​ប្រទេស​អ៊ុ​យក្រែន ដោយ​ហៅ​ការអះអាង​នេះ​ថា​«​គួរ​អោយ​ចង់​សើច​»​និង​ថា​រដ្ឋាភិបាល​ក្រុង​មូ​ស្គូ​អាច​លើកឡើង​ដូច្នេះ​ដើម្បី​ជា​មូលដ្ឋាន​សំរាប់​ខ្លួនឯង​ប្រើ​សព្វាវុធ​គីមី​ឬ​ជីវសាស្ត្រ​។​

​កាលពី​យប់​ថ្ងៃ​អង្គារ រុស្ស៊ី​បាន​ធ្វើ​ការចោទប្រកាន់​ជា​ថ្មី​ថា អាម៉េរិក​បាន​និង​កំពុង​ធ្វើការ​ជាមួយ​មន្ទីរពិសោធន៍​អ៊ុយ​ក្រែន​ដើម្បី​អភិវឌ្ឍ​សព្វាវុធ​ជីវសាស្ត្រ​។​ការអះអាង​ដូច្នេះ​នៅក្នុង​ប្រព័ន្ធ​ផ្សព្វផ្សាយ​រុស្ស៊ី​​កាន់តែ​មាន​ចំនួន​ច្រើន​ឡើង​នៅ​មុន​យោធា​រុស្ស៊ី​ចូល​ឈ្លានពាន​អ៊ុយ​ក្រែន​កាលពី​ខែ​មុន និង​កាលពី​ថ្ងៃ​ពុធ​អ្នកនាំពាក្យ​ក្រសួងការបរទេស​រុស្ស៊ី ម៉ា​រី​យ៉ា ហ្សេ​ការ៉ូវ៉ា​(Maria Zakharova)​បាន​អះអាង​​វា​ជា​ថ្មី​។​

​តែ​អ្នកនាំពាក្យ​ក្រសួង​ការពារជាតិ​អាម៉េរិក​ច​ន កឺ​ប៊ី​( John Kirby)​បាន​និយាយ​កាលពី​ថ្ងៃ​ពុធ​ថា «​ការចោទប្រកាន់​របស់​រុស្ស៊ី​មិន​សម​ហេតុផល​។​វា​គួរ​អោយ​ចង់​សើច​…​។​វា​គ្មានអ្វី​សោះ វា​ជា​ការឃោសនា​​របស់​រុស្ស៊ី​តាំងពី​បុរាណ​មក​»​។​

​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​ពុធ អ្នកនាំពាក្យ​ក្រសួងការបរទេស​អាម៉េរិក​លោក​ណេត ប្រា​យស៍​(Ned Price)​បាន​និយាយថា រុស្ស៊ី​«​កំពុង​ប្រឌិត​លេស​ក្លែងក្លាយ​ក្នុង​ការប៉ុនប៉ង​ធ្វើ​អោយ​​អំពើ​គួរ​អោយ​ខ្លាច​របស់​ខ្លួន​នៅ​អ៊ុយ​ក្រែន​ទៅ​ជា​ត្រឹមត្រូវ​»​។​ចំណែក​លេខា​ព័ត៌មាន​សេត​វិមាន ជេ​ន សា​គី​(Jen Psaki)​បាន​សរសេរ​បង្ហោះ​ថា​«​គឺ​រុស្ស៊ី​ល្បី​យូរ​មក​ហើយ​ខាង​ប្រើ​សព្វាវុធ​គីមី រួមទាំង​​ការប៉ុនប៉ង​ធ្វើឃាត​និង​បំពុល​គូសត្រូវ​របស់​ពូ​ទីន ដូចជា​លោក អាឡេ​ស៊ី ណា​វ៉ាល់​នី​(Alexey Navalny)»​។​

​នៅ​មិនទាន់​មាន​ការឆ្លើយតប​ភ្លាមៗ​ពី​ស្ថានទូត​រុស្ស៊ី​ប្រចាំ​ក្រុង​វ៉ាស៊ីនតោន​នៅឡើយ​ទេ​ចំពោះ​ការលើកឡើង​របស់​អាម៉េរិក​កាលពី​ថ្ងៃ​ពុធ​។​តែ​កន្លងមក​បាន​បដិសេធ​ថា​ខ្លួន​មិន​បាន​វាយប្រហារ​លើ​​សកម្មជន​ប្រឆាំង​ណា​វ៉ាល់​នី ទេ​។​

​កាលពី​ថ្ងៃ​ពុធ​អ្នកនាំពាក្យ​ក្រសួងការបរទេស​រុស្ស៊ី​បាន​និយាយថា រុស្ស៊ី​មាន​ឯកសារ​បង្ហាញថា ក្រសួង​សុខាភិបាល​អ៊ុយ​ក្រែន​បាន​បញ្ជា​អោយ​បំផ្លាញ​សំណាក​នៃ​ជំងឺ​ប៉េស្តិ៍ អាសន្ន​រោគ មេរោគ​អង់​ត្រាក់​និង​​ជំងឺឆ្លង​ដទៃទៀត​មុន​ថ្ងៃ​២៤​កុម្ភៈ នៅ​មុន​ពេល​កងកម្លាំង​រុស្ស៊ី​វាយលុក​ចូល​៕

​ក្រសួងការបរទេស​រុស្ស៊ី សុំអោយ​អាម៉េរិក​ពន្យល់​បកស្រាយ​ចំពោះ​សហគមន៍​អន្តរជាតិ​អំពី​បំណង​នៃ​ការបង្កើត​មន្ទីរពិសោធន៍​ជីវសាស្ត្រ​ជាច្រើន​កន្លែង​នៅ​អ៊ុ​យក្រែន តែ​អាម៉េរិក​ថា​ជាការ​ប្រឌិត​និង​ជា​រឿង​​គួរ​អស់សំណើច​