​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក យូ​ន ស៊ុក​យ៉ូល (Yoon Suk-yeol) ដែលជា​អ្នក​អភិរក្សនិយម​របស់​គ​ណ​បក្សប្រឆាំង​បាន​ឈ្នះ​ការបោះឆ្នោត​ប្រធានាធិបតី​កូរ៉េខាងត្បូង​កាល​​ពី​ព្រឹក​ថ្ងៃ​ព្រហស្បតិ៍​ទី​១០​មីនា ដោយ​រុញឱ្យ​អ្នកនយោបាយ​ថ្មីថ្មោង​ឡើង​មក​ដឹកនាំ​ប្រទេស​សេដ្ឋកិច្ច​ធំ​បំផុត​ទី​បួន​របស់​អាស៊ី​។​

​បន្ទាប់​ពី​យុទ្ធនាការ​បោះ​ឆ្នោត​ដ៏​ជូរចត់​និង​ដ៏​លំបាក លោក​យូ​ន អតីត​រដ្ឋអាជ្ញា​កំពូល​ត្រូវបាន​ប្រកាស​ជា​អ្នកឈ្នះ ខណៈ​គូប្រជែង លោក លី ជែ​ម្យុង (Lee Jae-myung)​មកពី​គណបក្ស​ប្រជា​ធិប​​តេ​យ្យ​ដែល​កំពុងកាន់​អំណាច បាន​ទទួលស្គាល់​បរាជ័យ​។​

​លោក​យូ​ន​បាន​ប្រាប់​អ្នកគាំទ្រ​ដែល​កំពុង​ស្រែក​ឈ្មោះ​របស់​គាត់​នៅ​រដ្ឋសភា​របស់​ប្រទេស​នេះ​ថា “​នេះ​ជា​ជ័យជម្នះ​របស់​ប្រជាជន​កូរ៉េ​ខាងត្បូង​ដ៏​អស្ចារ្យ​”​។​

​គម្លាត​ជ័យជម្នះ​របស់​គាត់​គឺ​ស្តួចស្តើង​ទេ​។ លោក​យូ​ន​មាន​សំឡេងគាំទ្រ ៤៨,៥៦ ភាគរយ​ទល់​នឹង ៤៧,៨៣ ភាគរយ​របស់​លោក​លី នេះ​បើ​យោង​តាម​គណៈកម្មាធិការ​ជាតិ​រៀបចំ​ការបោះឆ្នោត​របស់​កូរ៉េ​​ខាងត្បូង​។​

​ទោះបីជា​យុទ្ធនាការ​បោះឆ្នោត​បាន​គ្របដណ្តប់​ដោយ​រឿង​អាក្រក់ៗ​រវាង​លោក​យូ​ន​និង​លោក​លី​ក៏ដោយ ក៏​ប៉ុន្តែ​ចំនួន​អ្នក​ទៅ​បោះឆ្នោត​មាន​រហូត​ដល់​ទៅ ៧៧,១ ភាគរយ​រួមទាំង​ការចេញ​ទៅ​បោះឆ្នោត​មុន​​កាលកំណត់​ដ៏​ច្រើន​មិន​ធ្លាប់​មាន​ពីមុនមក ដោយ​ឥឡូវ​ពួកគេ​មាន​ការចាប់អារម្មណ៍​កាន់តែ​ខ្លាំង​ហើយ​គោលនយោបាយ​មាន​ភាព​លេចធ្លោ​នៅក្នុង​ប្រទេស​ដែល​មាន​ប្រជាជន​ចំនួន ៥២ លាន​នាក់​។​

​គណបក្ស​ទាំង​ពីរ​មាន​មនោគមវិជ្ជា​ផ្ទុយស្រឡះ​ដាច់ពីគ្នា ហើយ​ជ័យជម្នះ​របស់​លោក​យូ​ន​ទំនង​មើល​ទៅ​នឹង​ឈានទៅរក​របប​អភិរក្ស​ខាង​សារពើពន្ធ​កាន់តែខ្លាំង​បំផុត​បន្ទាប់​ពី​ស្ថិតក្រោម​ការដឹកនាំ​​របស់​ប្រធានាធិបតី​សេរីនិយម លោក​មូន ជែ​អ៊ីន​រយៈពេល​៥​ឆ្នាំ​។​

​វា​ក៏​ជា​ជ័យជម្នះ​ដ៏​គួរឱ្យភ្ញាក់ផ្អើល​មួយ​សម្រាប់​គណបក្ស​អំណាច​ប្រជាជន​ផង​ដែរ ដែល​ជា​គណបក្សប្រឆាំង​ដែល​មាន​ភាពច្របូកច្របល់​កាលពី​ឆ្នាំ ២០១៧ បន្ទាប់​ពី​ប្រធានាធិបតី​របស់​ពួកគេ​គឺ​លោកស្រី ផាក គុន​ហេ (Park Geun-hye) ត្រូវបាន​ចោទប្រកាន់​។​

​ក្រុមអ្នកវិភាគ​បាន​និយាយថា វា​អាច​ចាប់ផ្តើម​ឡើង​វិញ​នូវ “​វដ្ត​នៃ​ការ​សងសឹក​” នៅក្នុង​នយោបាយ​គូបដិបក្ខ​ដ៏​ល្បីល្បាញ​របស់​កូរ៉េ​ខាងត្បូង​ទី​ដែល​ប្រធានាធិបតី​ជាប់ឆ្នោត​បម្រើការ​តែ​មួយ​អាណត្តិ​​រយៈពេល​៥​ឆ្នាំ ហើយ​អតីត​មេដឹកនាំ​ដែល​នៅរស់​ទាំងអស់​ត្រូវ​ជាប់​គុក​ពី​បទ​ពុករលួយ​បន្ទាប់ពី​ចេញពី​តំណែង​។​

​នៅលើ​ផ្លូវ​នៃ​យុទ្ធនាការ​ឃោសនាបោះឆ្នោត លោក​យូ​ន​បាន​គំរាម​ស៊ើបអង្កេត​ប្រធានាធិបតីមូន ជែ​អ៊ីន ដែល​ត្រៀម​ចាកចេញ​ពី​តំណែង ដោយ​លើកឡើង​ពី “​ភាពមិនប្រក្រតី​” ដែល​មិន​បាន​បញ្ជាក់​។​

​ប៉ុន្តែ​នៅក្នុង​សុន្ទរកថា​ជ័យជម្នះ​របស់​គាត់ គាត់​បាន​បញ្ចេញ​សំឡេង​ផ្សះផ្សា​ជាង​មុន ដោយ​ប្រាប់​ប្រទេស​បន្ទាប់​ពី​ការ​ប្រណាំងប្រជែង​ដ៏​បែកបាក់​គ្នា​ថា “​ការប្រកួត​បាន​ចប់​ហើយ ហើយ​អ្នក​ទាំងអស់​គ្នា​ត្រូវតែ​ប្រឹងប្រែង​រួមគ្នា​ដើម្បី​ក្លាយ​ជា​ធ្លុង​តែមួយ​”៕

លោក យូ​ន ស៊ុគ​យ៉ូល ជាប់ឆ្នោត​ជា​ប្រធានាធិបតី​កូរ៉េខាងត្បូង

លោក លី ជែ​ម្យុង ​មកពី​គណបក្ស​ប្រជា​ធិប​​តេ​យ្យ​ដែល​កំពុងកាន់​អំណាច បាន​ទទួលស្គាល់​បរាជ័យ​