​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​កាលពី​ថ្ងៃ​ព្រហស្បតិ៍​ទី​១០​មីនា​ថា មេដឹកនាំ​កូរ៉េខាងជើង​លោក គីម ជុង​អ៊ុន​បាន​ត្រួតពិនិត្យ​មជ្ឈមណ្ឌល​អវកាស​ក្នុង​ទីក្រុង​​ព្យុង​យ៉ាង និង​បាន​សរសើរ​អ្នកវិទ្យាសាស្ត្រ​ដែល​ទើបតែ​បាន​សាកល្បង “​ផ្កាយរណប​ឈ្លបយកការណ៍​” ដែល​អ្នកវិភាគ​ព្រមាន​ថា​អាច​ជា​ការបាញ់​បង្ហោះ​មី​ស៊ី​ល​ផ្លោង​លាក់កំបាំង​។​

លោក គីម ជុង​អ៊ុន

​ប្រព័ន្ធ​ផ្សព្វផ្សាយ​រដ្ឋ​របស់​កូរ៉េ​ខាងជើង​បាន​អះអាងថា “​ការសាកល្បង​ដ៏​សំខាន់​មួយទៀត​” ឆ្ពោះទៅរក​ការអភិវឌ្ឍ​ផ្កាយរណប​ឈ្លបយកការណ៍ ត្រូវបាន​ធ្វើឡើង​កាលពី​សប្តាហ៍​មុន​។​

​ប្រទេស​ជិត​ខាង​កូរ៉េ​ខាងត្បូង​បាន​ពណ៌នា​ថា​វា​ជា​ការបាញ់​មី​ស៊ី​ល​ផ្លោង​មួយ​ផ្សេង​ទៀត​។​

​ទីភ្នាក់ងារ​សារព័ត៌មាន​រដ្ឋ KCNA បាន​រាយការណ៍​ថា លោក​គីម “​បាន​សម្តែង​ការពេញចិត្ត​យ៉ាងខ្លាំង​ចំពោះ​ការពិត​ដែលថា ពួកគេ​បាន​បញ្ជាក់​ពី​វិធីសាស្ត្រ​ថត​រូបភាព​ក្នុង​លំហ​អាកាស ចរិតលក្ខណៈ​​ប្រតិបត្តិការ​នៃ​ឧបករណ៍​ថតរូប​ដែល​មាន​រូប​ភាពច្បាស់​ខ្ពស់ និង​ភាពជឿជាក់​នៃ​ប្រព័ន្ធ​បញ្ជូន​រូបភាព​តាមរយៈ​ការសាកល្បង​សំខាន់ៗ​នា​ពេល​ថ្មីៗ​នេះ​”​។​

KCNA បាន​បន្តថា “​លោក​បាន​កោតសរសើរ​យ៉ាងខ្លាំង​ចំពោះ​ជោគជ័យ​ដែល NADA (​រដ្ឋបាល​អភិវឌ្ឍន៍​លំហ​ជាតិ​) បាន​ធ្វើ​នា​ពេល​ថ្មីៗ​នេះ​”​។​

​យោងតាម KCNA បានឱ្យដឹងថា ការអភិវឌ្ឍ “​ផ្កាយរណប​ឈ្លបយកការណ៍​” គឺជា​ផ្នែក​មួយ​នៃ​យុទ្ធសាស្ត្រ​សម្រាប់​ឃ្លាំមើល​”​កងទ័ព​ឈ្លានពាន​…​និង​កងកម្លាំង​នាវា​របស់​ពួកគេ​នៅក្នុង​និង​ជុំវិញឧ​ប​​ទ្វីប​កូរ៉េ​”​។​

​កូរ៉េខាងជើង​កំពុងស្ថិត​នៅ​ក្រោម​ការដាក់​ទណ្ឌកម្ម​អន្តរជាតិ​សម្រាប់​កម្មវិធី​អាវុធ​នុយក្លេអ៊ែរ​របស់​ខ្លួន ប៉ុន្តែ​ការបាញ់​បង្ហោះ​ផ្កាយរណប​ដោយ​សន្តិវិធី​មិន​ស្ថិតក្រោម​ការ​រឹតបន្តឹង​កម្រិត​ដូចគ្នា​នោះ​ទេ ទោះបីជា​ពួក​វា​ប្រើប្រាស់​បច្ចេកវិជ្ជា​ដូចគ្នា​ភាគច្រើន​ក៏​ដោយ​។​

​ការអភិវឌ្ឍ​ផ្កាយរណប​ឈ្លបយកការណ៍​យោធា​រួមជាមួយ​នឹង​អាវុធ​ហាមឃាត់​ជាច្រើន រួម​ទាំង​មី​ស៊ី​ល​លឿន​ជាង​សំឡេង ដែល​ត្រូវបាន​សាកល្បង​កាលពី​ខែ​មករា​គឺជា​គម្រោង​ផ្លូវការ​មួយ​ក្នុងចំណោម​​គម្រោង​ការពារ​ដ៏​សំខាន់​របស់​ទីក្រុង​ព្យុង​យ៉ាង ដូចដែល​បាន​គូសបញ្ជាក់​ដោយ​លោក​គីម​កាលពី​ឆ្នាំមុន​។​

​ទីក្រុង​ព្យុងយ៉ាង​បាន​បង្កើន​ការជំរុញ​របស់​លោក​គីម​ដើម្បី​ធ្វើ​ទំនើបកម្ម​យោធា​របស់​ខ្លួន ខណៈ​ដែល​ខ្លួន​ព្រងើយកន្តើយ​ចំពោះ​ការផ្តល់ជូន​កិច្ច​ពិភាក្សា​របស់​សហរដ្ឋអាម៉េរិក និង​គំរាម​បោះបង់​ចោល​ការផ្អាក​ដែល​កំណត់​ដោយ​ខ្លួនឯង​លើ​ការធ្វើតេ​ស្តិ៍មី​ស៊ីលរយៈ​ចម្ងាយ​ឆ្ងាយ​និង​អាវុធ​នុយក្លេអ៊ែរ​៕