​ដោយៈ រិ​ទ្ធិ​សែន​/​ពោធិ៍សាត់​: ជនសង្ស័យ​ប្រាំបី​នាក់ និង​ឧបករណ៍​នេសាទ​ខុសច្បាប់​ត្រូវបាន​កម្លាំងចម្រុះ​ស្រុក​ក្រគ និង​ខណ្ឌ​រដ្ឋបាល​ជល​ផល​នៃ​មន្ទីរ​កសិកម្ម​រុក្ខាប្រមាញ់ និង​នេសាទ ខេត្តពោធិ៍សាត់​បង្ក្រាបបាន​ពេល​កំពុង​ធ្វើ​សកម្មភាព រួច​បញ្ជូនទៅ​សាលាដំបូង​ខេត្ត​ចាត់ការ​តាម​នីតិវិធី​នៅថ្ងៃនេះ​ហើយ ។ កិច្ចប្រតិបត្តិការ​នេះ​ត្រូវបាន​ធ្វើឡើង​រយៈពេល​៣​ថ្ងៃ​ចាប់ពី​ថ្ងៃទី ៧ រហូតដល់​ថ្ងៃទី​៩ មីនា ២០២២ ដោយ​កម្លាំងចម្រុះ​ដឹកនាំ​ដោយ​អភិបាលរង​ស្រុក​ក្រគ លោក ខាត់ ពុ​យ នៅ​ចំណុច​បឹង​ទន្លេសាប ក្នុង​ទឹកដី​ស្រុក​ក្រគ​។​

​នាយ​ខណ្ឌ​រដ្ឋបាល​ជល​ផល​នៃ​មន្ទីរ​កសិកម្ម​រុក្ខាប្រមាញ់ និង​នេសាទ​ខេត្តពោធិ៍សាត់​លោក ភុំ វិមល បានអោយដឹង​នៅ​ព្រឹក​ថ្ងៃទី​១០ មីនា នេះ​ថា កម្លាំងចម្រុះ​របស់​ខេត្ត​បាន​សហការគ្នា​ចុះ​ប្រតិ​ប​ត្ត​ការបង្ក្រាប​បទល្មើស​នេសាទ​ដោយ​ប្រើប្រាស់​រយៈពេល​បី​ថ្ងៃ​ចាប់ពី​ថ្ងៃទី​៧ រហូតដល់​ថ្ងៃទី​៩ មីនា ដោយនៅ​ថ្ងៃ​ដំបូង​សមត្ថកិច្ច​បានធ្វើការ​ស្រាវជ្រាវ​រកឃើញ​ទូក​មួយគ្រឿង និង​អួន​មួយ​វង់​ដែល​ក្រុម​ជនល្មើស​យកមក​លាក់ទុក​នៅក្នុង​ព្រៃរនាម ហើយ​បាន​បន្ត​ស្រាវជ្រាវ​នៅក្នុង​ភូមិ និង​នៅក្នុង​បឹង​ទន្លេសាប បានឃើញ​ពួកគេ​កំពង់​លួច​ធ្វើ​សកម្មភាព​ជាក់ស្តែង ហើយ​បាន​បំបែក​កម្លាំង​ដេញតាម​ពី​ត្រើយម្ខាង និង​ឃាត់ខ្លួន​បាន​មនុស្ស​៨​នាក់ ព្រមទាំង​វត្ថុតាង​មួយចំនួន កសាង​សំណុំរឿង​បញ្ជូនទៅ​សាលាដំបូង​ខេត្ត​ចាត់ការ​តាម​នីតិវិធី​នៅថ្ងៃនេះ​៕​