ប្រែ​សម្រួល : កញ្ញា​ដា​លី​ស (​បាល់ទាត់​) ៖ នៅ​រាត្រី​ថ្ងៃ​ព្រហស្បតិ៍​នេះ ក្រៅពី​ការប្រកួត​បាល់ទាត់​ក្របខ័ណ្ឌ​អឺរ៉ុប UEFA Europa League និង UEFA Conference League​ក៏​មាន​ការប្រកួត​​បង្គ្រប់​ជុំ​នៅ​ក្របខ័ណ្ឌ EPL​ជាច្រើន​គូ​ផងដែរ​។ ការប្រកួត​លេចធ្លោ​ជាងគេ​នៅក្នុង Europa League គឺ​ជំនួប​រវាង Barcelona និង Galatasaray ហើយ​១​គូ​ចាប់អារម្មណ៍​ជាង​គេ​នៅ EPL គឺ Chelsea ដែល​រំពឹង​ឈ្នះ​ខ្ពស់​នៅ​ទឹកដី Norwich យប់​នេះ​។

– Barcelona vs Galatasaray (EL)

Barcelona សង្ឃឹម​អាច​ពង្រីក​ទម្រង់​ប្រយុទ្ធ​ដ៏​អស្ចារ្យ​របស់​ពួកគេ​នៅ​យប់​ថ្ងៃ​ព្រហស្បតិ៍​នេះ នៅពេលដែល​ពួកគេ​ធ្វើជា​ម្ចាស់ផ្ទះ​ទទួល​ក្រុម​តួ​ក​គី Galatasaray ក្នុង​ការប្រកួត​ជើង​ទី​១ នៃ​វគ្គ ១៦ ក្រុម​ចុងក្រោយ​នៃ UEFA Europa League នៅ​កីឡដ្ឋាន Camp Nou ។​

​ក្រុម​អ្នក​មាន​បុណ្យ​វិលត្រឡប់​មក​លេង Europa League ជា​លើកដំបូង​ចាប់តាំងពី​ឆ្នាំ ២០០៤ ហើយ​ពួកគេ​ចូល​លេង​លើក​នេះ​តាម​ស្ទីល​មួយ ដែល​ធ្វើឱ្យ​គូប្រជែង​ខ្លាចញញើត​។​

​កូនក្រុម​របស់​លោក​សា​វី​បាន​ផ្តួល Napoli ២-៤ នៅ​ក្រៅ​ទឹកដី​ក្នុង​ការប្រកួត​ជើង​ទី​២​នៃ​ការប្រកួត​វគ្គ ៣២ ចុងក្រោយ​របស់​ពួកគេ​កាលពី​ពីរ​សប្តាហ៍​មុន​នៅ​កីឡដ្ឋាន Stadio Diego Armando Maradona ។​

​ជាទូទៅ​ពួកគេ​ស៊ុត​បាល់​បញ្ចូល​ទី​តាម​អំពើ​ចិត្ត ពោលគឺ​កីឡាករ Pierre-Emerick Aubameyang ដែល​ស៊ុត​បញ្ចូល​ទី​បាន ៥ គ្រាប់​ក្នុង​ការប្រកួត ៣ លើកចុងក្រោយ​សម្រាប់​ក្រុម​នៅ​តំបន់ Catalan មួយ​នេះ​។​

​ខ្សែប្រយុទ្ធ​សញ្ជាតិ​ហ្គា​បុង​រូបនេះ​បាន​ស៊ុតបាល់​បញ្ចូលទី​៣​គ្រាប់​តែ​ឯង​ក្នុងពេល​យកឈ្នះ Valencia ១-៤ នៅ​កីឡដ្ឋាន Estadio de Mestalla​។​

​ក្រោយ​ទម្លាក់​ក្រុម​កំពូល​តារាង Serie A Napoli រួចមក ពេលនេះ Barcelona នឹង​ក្លាយជា​ក្រុម​រំពឹង​ទម្លាក់ Galatasaray ដែល​កំពុង​មាន​យុទ្ធនាការ​ដ៏​អន់​បំផុត​នៅ​ក្របខ័ណ្ឌ Super Lig ក្នុង​រយៈពេល​មួយ​ទសវត្សរ៍​មក​នេះ​។​

Galatasaray មាន​រដូវ​កាល​ដ៏​ច្របូកច្របល់​ជាទូទៅ​។ ថ្មីៗ​នេះ ពួកគេ​បាន​ចែក​ផ្លូវ​ជា​មួយ​វីរបុរស​ក្លិប​គឺ​កីឡាករ Fatih Terim ខណៈ​ដែល​អ្នកចាត់ការ​សញ្ជាតិ​អេ​ស្ប៉ាញ​លោក Domenec Torrent ទទួល​បន្ទុក​ដឹកនាំ​។​

Galatasaray ពិតជា​បាន​កែលម្អ​ទម្រង់​លេង​របស់​ពួកគេ​ក្រោម​ការដឹកនាំ​របស់​អ្នកចាត់ការ​ថ្មី ហើយ​ពួកគេ​នឹង​ធ្វើដំណើរ​ទៅ​កីឡដ្ឋាន Camp Nou ក្រោយ​ឈ្នះ​ជាប់ៗ​គ្នា​ជា​ច្រើនលើក​។​

​ពួកគេ​បាន​ស៊ុត​បាល់​បញ្ចូល​ទី​ចំនួន ៧ គ្រាប់​ក្នុង​ជ័យជម្នះ​លើ Goztepe (២-៣) និង Rizespor (៤-២) ។ ទោះជា​យ៉ាងណា​ក៏ដោយ លោក Torrent ប្រាកដជា​មាន​ការព្រួយបារម្ភ​ខ្លាំង​នៅពេល​និយាយ​អំពី​ប្រព័ន្ធ​ការពារ​ទន់ជ្រាយ​របស់​គាត់​នៅ​មុនពេល​ប៉ះ​ជាមួយ​នឹង​ក្រុម Barcelona ដែល​ស៊ុត​បាល់​បញ្ចូល​ទី​តាម​ទំនើងចិត្ត​។​

Barcelona ធ្លាប់​ជួប Galatasaray ៤ ដង​កាលពី​ជាង​១​ទសវត្សរ៍​មុន ដោយ​ឈ្នះ​៣​ស្មើ​១​។ ផ្អែក​លើ​ចំណុច​នេះ​និង​ទម្រង់​លេង​បច្ចុប្បន្ន​រំពឹងថា Barcelona ឈ្នះ​ក្នុង​លទ្ធផល​ព្យាករណ៍ ៣-០​។​

– Norwich vs Chelsea (EPL)

​ក្រោយ​ចាញ់​៦​លើ​ក​ជាប់ៗ​គ្នា Norwich នឹង​ឈានទៅរក​ការប្រកួត​នេះ​ដោយ​ចាញ់​គ្រប់​ប្រកួត​ទាំងអស់​របស់​ពួកគេ​កាលពី​ខែ​មុន​។ ថ្វីត្បិតតែ​ពួកគេ​មិនសូវ​ចាញ់​ពិន្ទុ​គេ​ប៉ុន្មាន​នៅ​បាត​តារាង ក៏ប៉ុន្តែ​ក្លិប​នេះ​មើលទៅ​មាន​វាសនា​ធ្លាក់​ទៅ Championship ជាថ្មី​ម្តងទៀត​នៅ​រដូវ​កាល​នេះ​។​

​នៅក្នុង​ការប្រកួត​ថ្មីៗ​បំផុត​របស់​ពួកគេ ក្លិប​ចាប់​លឿង​បាន​ចាញ់​ដោយ​ពិន្ទុ ១-៣ នៅផ្ទះ​ខ្លួនឯង​ទល់នឹង Brentford នៅក្នុង​ការប្រកួត​ដែល​បានឃើញ​កីឡាករ Ivan Toney ស៊ុត​បាន ៣ គ្រាប់ (Hat-trick) ដែល​ធ្វើឱ្យ​រូប​គេ​ក្លាយ​ជា​កីឡាករ​ដំបូង​គេ​សម្រាប់ Brentford ដែល​ស៊ុត​បញ្ចូល​ទី​បាន ៣ គ្រាប់​នៅលើ​កំពូល​ក្នុង​រយៈពេល ៨៥ ឆ្នាំ​។​

​លទ្ធផល​នេះ​បានធ្វើឱ្យ​ចាប​លឿង​ចាញ់​រហូតដល់​ទៅ​៤​ជាប់ៗ​គ្នា​។ ដោយ​ទើបតែ​ទទួលបាន​១​ពិន្ទុ​ពី​ការប្រកួត​លី​ក​ចំនួន ៥ លើកចុងក្រោយ ឥឡូវ​នេះ​ពួកគេ​កំពុង​ឈរ​នៅ​បាត​តារាង EPL ដោយមាន ៥ ពិន្ទុ​តាម​ពីក្រោយ​ក្រុម​លេខ ១៧ Everton ។​

Chelsea បាន​ជ្រុះ​ពិន្ទុ​យ៉ាងច្រើន​ក្នុង​ខែធ្នូ​និង​ខែមករា​។ ទោះយ៉ាងណា​ក៏ដោយ ក្លិប​លែងឱ្យ​ភ្លាត់ស្នៀត​ទៀតហើយ​ចាប់តាំងពី​ពេលនោះ​មក លើកលែង​តែ​ការ​ចាញ់​របស់​ពួកគេ​ក្នុង​វគ្គ​ផ្តាច់ព្រ័ត្រ League Cup ។​

​និយាយ​រួម​ទៅ ពួកគេ​បាន​ប្រកួត​តែ​ម្តង​គត់​នៅ EPL ក្នុង​ខែកុម្ភៈ ដោយសារតែ​ការចូលរួម​របស់​ពួកគេ​ក្នុង​ការប្រកួត​ផ្សេងៗ ហើយ​ដោយសារ​ពួកគេ​ចេញ​ខ្ទាត​ចេញពី​ការ​ដណ្តើមពាន គេ​រំពឹងថា​ពួកគេ​នឹង​ព្យាយាម​ឈានទៅ​វគ្គ​ជ្រៅៗ​នៅក្នុង​ការប្រកួត​ក្របខ័ណ្ឌ​ផ្សេង​។​

​បន្ទាប់​ពី​ចាញ់​នៅ Wembley និង​ការទទួល​ជ័យជម្នះ​ដ៏​ប្រផុតប្រផើយ​ក្នុង FA Cup ទល់នឹង Luton ក្លិប​តោ​ខៀវ​បាន​ត្រឡប់​មក​រក​ភាពខ្លាំង​របស់​ខ្លួន​វិញ​ជាមួយនឹង​ការបំបាក់​ក្រុម Burnley ០-៤ នៅ​ក្រៅ​ផ្ទះ​។ លទ្ធផល​នេះ​មានន័យថា ក្លិប​បានឈ្នះ​ការប្រកួត​លី​ក​៣ លើ​ក​ជាប់ៗ​គ្នា​។​

​ដោយមាន ១០ ពិន្ទុ​ពី​ការប្រកួត​លី​ក​ចំនួន ៥ លើកចុងក្រោយ តោ​ខៀវ​បច្ចុប្បន្ន​កំពុង​ឈរ​នៅ​ចំណាត់ថ្នាក់​លេខ ៣ ក្នុង​លី​ក ដោយមាន ១៦ ពិន្ទុ​តាម​ពីក្រោយ​ក្រុម​មេឃ​ខៀវ Man City​។​

​ដោយហេតុ​ថា Chelsea មិន​ដែល​ចាញ់ Norwich តាំងពី​ឆ្នាំ ១៩៩៤ គួបផ្សំ​នឹង​ទម្រង់​លេង​ខុស​គ្នា​ឆ្ងាយ​របស់​ក្រុម​ទាំង​ពីរ យើង​រំពឹង Chelsea ឈ្នះ​យ៉ាងតិច ៥-១៕

Chelsea រំពឹង​ឈ្នះ Norwich យ៉ាង​ងាយស្រួល​នៅ​យប់​នេះ