​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រព័ន្ធ​ផ្សព្វផ្សាយ​អាម៉េរិក​បាន​រាយការណ៍​កាលពី​ថ្ងៃ​ពុធ​ទី​៩​មីនា​ថា យន្តហោះ​ឯកជន​មួយ​គ្រឿង​ដែល​ដឹក​អតីត​ប្រធានាធិបតី​អាម៉េរិក​លោក ដូ​ណា​ល់ ត្រាំ បាន​បង្ខំចិត្ត​ចុះចត​បន្ទាន់ បន្ទាប់ពី​មាន​បញ្ហា​ម៉ាស៊ីន​កាលពី​ចុង​សប្តាហ៍​។​

​សារព័ត៌មាន Politico ដែល​ស្រង់​សម្តី​មនុស្ស​២​នាក់​ដែល​ដឹង​រឿង​នេះ បាន​និយាយថា លោក​ត្រាំ​កំពុង​ហោះហើរ​ពី​ទីក្រុង​ញូ​វ​អ័​រ​លីន (New Orleans) ទៅ​កាន់​ទីក្រុង​ផាម​ប៊ីច (Palm Beach) ក្នុង​រដ្ឋ​ផ្លរីដា​កាលពី​ថ្ងៃ​សៅរ៍ បន្ទាប់​ពី​ថ្លែង​សុន្ទរកថា​ទៅកាន់​ម្ចាស់​ជំនួយ​របស់​គណបក្ស​សាធារណរដ្ឋ​។​

Politico បាន​និយាយថា យន្តហោះ​បាន​នៅ​លើ​មេឃ​រយៈពេល ២០ ទៅ ៣០ នាទី នៅពេល​ដែល​ម៉ាស៊ីន​មួយ​បាន​ខូច ហើយ​អ្នកបើកបរ​បាន​សម្រេច​ចិត្ត​ត្រឡប់​ទៅ​ទីក្រុង​ញូ​វ​អ័​រ​លីន​វិញ​។​

​កាសែត Washington Post បាន​និយាយថា យន្តហោះ Dassault Falcon 900 បាន​ហោះ​ពីលើ​ឈូង​សមុទ្រ​ម៉ិក​ស៊ិក នៅពេល​ដែល​អ្នក​បើក​យន្តហោះ​បាន​សម្រេចចិត្ត​ត្រឡប់​ថយ​ក្រោយ​វិញ​។​​លោក​ត្រាំ ទីប្រឹក្សា បុគ្គលិក​គាំទ្រ និង​ភ្នាក់ងារ​ចារ​កម្ម បាន​ជិះ​លើ​យន្តហោះ​នៅពេលនោះ​។​

Washington Post បាន​និយាយថា យន្តហោះ​នោះ​ជា​របស់​ម្ចាស់​ជំនួយ​ម្នាក់ ដែល​បាន​ឱ្យ​លោក​ត្រាំ​ខ្ចី​ជិះ​សម្រាប់​ព្រឹត្តិការណ៍​នេះ​។​

​កាសែត​បាន​និយាយថា​ម្ចាស់ជំនួយ​ផ្សេងទៀត​បាន​ផ្តល់​យន្តហោះ​ជំនួស​មួយទៀត ដែល​បាន​ដឹក​លោក​ត្រាំ​ទៅ​ផ្ទះ​របស់​គាត់​នៅ Mar-a-Largo ដោយ​គ្មាន​ឧបទ្ទវហេតុ​ទេ​៕

​អតីត​ប្រធានាធិបតី​អាម៉េរិក​លោក ដូ​ណា​ល់ ត្រាំ​