​ប្រែ​សម្រួលៈ​បំណង​(​ដេល្លី​ម៉េល​)៖ ភ្នំភ្លើង​មេ​រ៉ា​ពី​(Merapi)​របស់​ឥណ្ឌូនេស៊ី បាន​ព្រួស​ពពក​ផេះ​និង​បញ្ចេញ​ភក់​ក្តៅ​កាលពី​ថ្ងៃ​ព្រហស្បតិ៍​ទី​១០​មីនា​ដែល​បាន​បង្ខំ​អោយ​អ្នកស្រុក​ប្រមាណ​២៥០​នាក់​ភៀសខ្លួន​​ទៅកាន់​ជម្រក​បណ្តោះអាសន្ន ហើយ​បណ្តាល​អោយ​ភូមិ​និង​ទីប្រជុំជន​ក្បែរ​ខាង​គ្របដណ្តប់​ទៅ​ដោយ​ផេះ ទោះជា​យ៉ាងណា​មិន​មាន​សេចក្តីរាយការណ៍​អំពី​ការស្លាប់​ឬ​រងរបួស​បណ្តាលមកពី​ការផ្ទុះ​នេះ​ទេ​។​

​ភ្នំភ្លើង​នៅលើ​កោះ​ជ្វា​នេះ បាន​បញ្ចេញ​ផ្សែង​ក្តៅ​យ៉ាងតិច​ចំនួន​ប្រាំ​ពីរដង​នៅមុន​និង​ក្រោយ​ពាក់​កណ្តាលយប់​ថ្ងៃ​ពុធ ហើយ​បញ្ចេញ​ភក់​ភ្នំភ្លើង​ហូរ​ចុះ​ជម្រាលភ្នំ​ចម្ងាយ​៥​គីឡូម៉ែត្រ​យ៉ាង​លឿន​។​ស្នូរ​រញ្ជួយ​​អាច​អោយ​គេ​ឮ​ចម្ងាយ​រាប់គីឡូម៉ែត្រ​។​

​មន្ត្រី​គ្រោះមហន្តរាយ​ម្នាក់​បាន​និយាយថា​មនុស្ស​២៥៣​នាក់​ត្រូវបាន​ជម្លៀស​ទៅកាន់​ជម្រក​បណ្តោះអាសន្ន​នៅ​ភូមិ​ចំនួន​ពីរ​នៅ​ក្បែរ​ក្រុង​យុកយ៉ាកា​រតា​(Yogyakarta)​និង​ស្រុក​មួយ​ក្នុង​ខេត្ត​ចា​វ៉ា​​កណ្តាល ដោយសារ​ហានិភ័យ​ពី​ការផ្ទុះ​។​លោក​ថា ការផ្ទុះ​នេះ​បាន​បាច​ផេះ​គ្រប​លើ​ភូមិ​និង​ទីប្រជុំជន​ជាច្រើន​តែ​មិន​មាន​របាយការណ៍​អំពី​មនុស្ស​ស្លាប់​ឬ​រងរបួស​ទេ​។​

​អ្នកស្រុក​ដែល​រស់នៅ​តាម​ជើងភ្នំ​មេ​រ៉ា​ពី​ត្រូវ​បាន​ណែនាំ​អោយ​នៅ​ឆ្ងាយ​ប្រាំពីរ​គីឡូម៉ែត្រ​ពី​មាត់​ភ្នំភ្លើង​និង​ត្រូវ​ដឹង​អំពី​គ្រោះថ្នាក់​បង្កឡើង​ដោយ​ភក់​ភ្នំភ្លើង​។​

​ភ្នំ​មេ​រ៉ា​ពី ជា​ភ្នំភ្លើង​សកម្ម​បំផុត​មួយ​ក្នុងចំណោម​ភ្នំភ្លើង​ជាង​១២០​នៅ​ឥណ្ឌូនេស៊ី និង​វា​បាន​ផ្ទុះ​បាញ់​ភក់​ភ្លើង​និង​ហ្គាស​ក្តៅ​ជា​ញឹកញាប់​នៅ​ពេល​ថ្មីៗ​នេះ​។​

​ការផ្ទុះ​ធំ​លើក​ចុងក្រោយ​របស់​មេ​រ៉ា​ពី​បាន​កើតឡើង​នៅ​ឆ្នាំ​២០១០​ដោយ​សម្លាប់​មនុស្ស​៣៤៧​នាក់ និង​នាំ​អោយមាន​ការជម្លៀស​អ្នកភូមិ​ជាង​២០.០០០​នាក់​៕

​អ្នកស្រុក​ជិះ​ម៉ូតូ​កាត់​ផ្លូវ​មួយ​នៅពេល​ភ្នំភ្លើង​មេ​រ៉ា​ពី​បាញ់​ផេះ​និង​ភក់​ចេញ​នៅ​យុកយ៉ាកា​រតា កាលពី​ថ្ងៃ​១០​មីនា​

​ភក់​ភ្នំភ្លើង​ហូរ​ធ្លាក់ចុះ​ជម្រាលភ្នំ​កាលពី​ថ្ងៃ​១០​មីនា​