ដោយៈ វ៉ៃ​កូ / ស្វាយរៀងៈ លោក តូច ប៉ូ​លី​វា អភិបាលរង​ខេត្ត តំណាង​លោក ម៉ែន វិបុល អភិបាលខេត្ត​ស្វាយរៀង នៅ​ព្រឹក​ថ្ងៃទី​១០ ខែមីនា ឆ្នាំ​២០២២ បាន​អញ្ជើញ​ជា​អធិបតី នៅក្នុង​ពិធី​បញ្ជ្រាប​ការយល់ដឹង និង​សម្អាត​ទីក្រុង ដើម្បី​ត្រៀម​ចូលរួម អបអ​សាទរ​ទិវា​ជាតិ ទីក្រុង​ស្អាត លើក​ទី​១០ ឆ្នាំ​២០២២ ក្រោម​ប្រធានបទ ” ទីក្រុង​ស្អាត​÷ គាំទ្រ​ការ​បើក​ទេស ចរណ៍​កម្ពុជា​” ដែល​រដ្ឋបាល​ក្រុង​ស្វាយរៀង បានរៀបចំ​នៅ​សួនច្បារ នាយ​ឧ​ត្ត​ម​សេនីយ៍ ហុក ឡងឌី ក្រុង​ស្វាយរៀង​។​

​ក្នុងឱកាស​នោះដែរ ក៏​មានការ​និមន្ត និង​អ​ញ្ជើញ​ការចូលរួម​ពី ព្រះសង្ឃ លោក​ប្រធាន ក្រុមប្រឹក្សា​ក្រុង លោក​អភិបាលក្រុង លោក​ប្រធាន​មន្ទីរ​ទេសចរណ៍​ខេត្ត មន្ទីរ​បរិស្ថាន​ខេត្ត សមាជិក​ក្រុមប្រឹក្សា​ក្រុង អភិបាលរងក្រុង នាយក នាយករង​រដ្ឋបាល​ក្រុង កងកម្លាំង​ទាំង ៣ ក្នុង​ក្រុង លោក លោកស្រី​ប្រធាន អនុប្រធាន​ការិយាល័យ អង្គភាព ទាំង ១៣ ចំណុះ​សាលា ក្រុង មន្ត្រីរាជការ​មន្ទីរ​ទេស​ចរណ៍ និង​មន្ទីរ​បរិស្ថាន​ខេត្ត លោក លោកស្រី សមាជិក​ក្រុម ប្រឹក្សា​សង្កាត់ ថ្នាក់ដឹកនាំ​ភូមិ ក្នុង​ក្រុង យុវជន ស​.​ស​.​យ​.​ក យុវជន​កាកបាទក្រហម យុវជន​កាយ​រិ​ទ្ធ និង​សិស្សានុសិស្ស វិទ្យាល័យ​ហ៊ុន សែន ចេក ដែលមាន​អ្នកចូលរួម ចំនួន ១៩៨ អង្គ​/​នាក់ ស្រី ៦៨​នាក់​។

​បន្ទាប់មក​ក្រុមការងារ​ក៏ បាន​បែង​ចែកជា​២​ក្រុម ដង្ហែ​ក្បួន​ផ្សព្វផ្សាយ​បញ្ជ្រាប​ការយល់ដឹង និង​សម្អាត​ទីក្រុង តាម​បណ្តោយ​ផ្លូវ​សំខាន់ៗ​នានា និង​ផ្លូវ​មុខ​ផ្សារ​វាល​យន្ត ជុំវិញ​ចំណតរថយន្ត ព្រមទាំង​សួនច្បារ​ផងដែរ​៕/V