​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋបាលបៃដិ​ន​និយាយ​ថា ការបាញ់​មី​ស៊ី​ល​កូរ៉េខាងជើង​ចំនួន​ពីរ​លើក​ក្នុង​ប៉ុន្មាន​សប្តាហ៍​ថ្មីៗ​នេះ​គឺជា​ការបាញ់​សាកល្បង​មី​ស៊ី​ល​ផ្លោង​ឆ្លង​ទ្វីប ICBM​រយៈ​ចម្ងាយ​​ឆ្ងាយ​ដ៏​មាន​អានុភាព​ថ្មី ហើយ​បាន​ព្រមាន​ថា ការបាញ់​សាកល្បង​មី​ស៊ី​ល​រយៈ​ចម្ងាយ​ឆ្ងាយ​ពេញលេញ​អាច​នឹង​កើតឡើង​ក្នុងពេល​ឆាប់ៗ​នេះ​។​

​វា​ជា​ការសាកល្បង​មី​ស៊ី​ល​ដែល​គេ​រាយការណ៍​ថា​មាន​ទំហំ​ធំ​ជាង​មី​ស៊ី​ល ICBM​ដែល​កូរ៉េ​ខាងជើង​បាន​បាញ់​កាលពី​ឆ្នាំ ២០១៧ ដែល​គេ​វាយតម្លៃថា​មាន​សមត្ថភាព​បាញ់​ដល់​សហរដ្ឋ​អាម៉េរិក​។​

​មន្ត្រីរដ្ឋបាល​ជាន់ខ្ពស់​មួយរូប​បាន​និយាយថា កងកម្លាំង​ការពារ​មី​ស៊ី​ល​និង​ឈ្លបយកការណ៍​របស់​អាម៉េរិក​នៅ​ប៉ាស៊ីហ្វិក​ត្រូវបាន​ដាក់​ក្នុងស្ថានភាព “​ប្រុង​ជើងការ​ជាស្រេច​”​ក្នុង​ការត្រៀមខ្លួន​សម្រាប់​​ការសាកល្បង​មី​ស៊ី​ល​រយៈ​ចម្ងាយ​ឆ្ងាយ​ពេញលេញ​។​

​មន្ត្រី​រូប​នេះ​បាន​គូសបញ្ជាក់​ពី​ការវាយតម្លៃ​ផ្នែក​ស៊ើបការណ៍​សម្ងាត់​របស់​ស​ហ​រដ្ឋ​អាម៉េរិក​លើ​ការបាញ់​សាកល្បង​ថ្មីៗ​នេះ​ក្នុង​លក្ខខណ្ឌ​មិន​បញ្ចេញ​ឈ្មោះ​។​

​អ្នកនាំពាក្យ​មន្ទីរ​បញ្ច​កោណ​លោក ច​ន កឺ​ប៊ី បាន​និយាយ​នៅក្នុង​សេចក្តីថ្លែងការណ៍​មួយ​ថា “​គោលបំណង​នៃ​ការបាញ់​សាកល្បង​ទាំងនេះ ដែល​មិន​បង្ហាញ​ពី​រយៈ​ចម្ងាយ​របស់ ICBM​ទំនង​ដើម្បី​វាយ​​តម្លៃ​ប្រព័ន្ធ​ថ្មី​នេះ មុនពេល​ធ្វើ​ការសាកល្បង​ពេញលេញ​នាពេល​អនាគត ដែល​អាច​ក្លែងបន្លំ​ជា​ការបាញ់​បង្ហោះ​យាន​ទៅ​ទី​អវកាស​”​។​

​កូរ៉េ​ខាងជើង​បាន​អះអាងថា ការបាញ់​សាកល្បង​នៅ​ថ្ងៃទី ៤ ខែ​មីនា និង​ថ្ងៃទី ២៦ ខែ​កុម្ភៈ គឺ​គ្រាន់តែ​ដើម្បី​សាកល្បង​កាមេរ៉ា​សម្រាប់​ដំឡើង​នៅលើ​ផ្កាយរណប​ចារកម្ម​នាពេល​អនាគត​ប៉ុណ្ណោះ​។​

​សេចក្តីសម្រេច​របស់​ក្រុមប្រឹក្សាសន្តិសុខ​អង្គការសហប្រជាជាតិ​ជាច្រើន​បាន​ហាមឃាត់​កូរ៉េខាងជើង​ពី​ការបាញ់​មី​ស៊ី​ល​ICBM ហើយ​សហរដ្ឋ​អាម៉េរិក​នឹង​ប្រកាស​អំពី​ការដាក់ទណ្ឌកម្ម​ថ្មី​នៅ​ថ្ងៃ​សុក្រ​នេះ ដែល​មាន​ន័យ​ថា​ធ្វើឱ្យ​ប្រទេស​នេះ​កាន់តែ​លំបាក​ក្នុង​ការប្រើប្រាស់​បច្ចេកវិជ្ជា​ដែល​ត្រូវការ​សម្រាប់​កម្មវិធី​អាវុធ​របស់​ខ្លួន​៕

អាម៉េរិក​ថា​កូរ៉េ​ខាងជើង​នឹង​បាញ់​សាកល្បង​មី​ស៊ី​ល​ផ្លោង​ចម្ងាយ​ឆ្ងាយ​ពេញលេញ​ក្នុងពេល​ឆាប់ៗ