​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាលពី​ថ្ងៃ​ព្រហស្បតិ៍​ទី​១០​មីនា អនុ​ប្រធានាធិបតី​អាម៉េរិក​លោកស្រី កា​ម៉ា​ឡា ហារី​ស​បាន​ទទួលយក​ការអំពាវនាវ​ឱ្យ​មាន​ការស៊ើបអង្កេត​ឧក្រិដ្ឋកម្ម​សង្គ្រាម​​អន្តរជាតិ​លើ​ប្រទេស​រុស្ស៊ី​ជុំវិញ​ការឈ្លានពាន​របស់ខ្លួន​លើ​អ៊ុ​យក្រែន ដោយ​លើកឡើង​ពី “​ភាពឃោរឃៅ​” នៃ​ការទម្លាក់​គ្រាប់បែក​លើ​ជន​ស៊ីវិល រួម​ទាំង​មន្ទីរពេទ្យ​សម្ភព​ផងដែរ​។​

​ថ្លែង​ជា​មួយ​ប្រធានាធិបតី​ប៉ូឡូញ​លោក អង់​ដ្រេ ឌូ​ចា (Andrzej Duda) ក្នុង​សន្និសីទ​សារព័ត៌មាន​នៅ​ទីក្រុង​វ៉ា​សូវី ទី​ដែល​លោក​ស្រី​កំពុង​បង្ហាញ​ពី​ការគាំទ្រ​របស់​សហរដ្ឋ​អាម៉េរិក​ចំពោះ​សម្ពន្ធ​មិត្ត​​ភាគ​ខាងកើត​របស់​ណា​តូ លោកស្រី​ហារី​ស​បាន​សម្តែង​ការ​ខឹងសម្បា​ចំពោះ​ការទម្លាក់​គ្រាប់បែក​នៅ​មន្ទីរពេទ្យ​សម្ភព​កាលពី​ថ្ងៃ​ពុធ​និង​ឈុត​ឆាក​នៃ​ស្ត្រី​មាន​ផ្ទៃពោះ​ហូរ​ឈាម​ត្រូវបាន​ជម្លៀស​ក៏ដូចជា​​ការវាយប្រហារ​ផ្សេងៗ​ទៀត​លើ​ជន​ស៊ីវិល​។ លោកស្រី​មិន​បាន​ចោទប្រកាន់​រុស្ស៊ី​ដោយផ្ទាល់​ថា​បាន​ប្រព្រឹត្ត​ឧក្រិដ្ឋកម្ម​សង្គ្រាម​នោះ​ទេ​។​

​លោកស្រី​ហារី​និយាយថា “​ពិតជា​គួរតែ​មាន​ការស៊ើបអង្កេត ហើយ​យើង​ទាំងអស់គ្នា​គួរតែ​តាមដាន​មើល​”​ដោយ​កត់សម្គាល់ថា​អង្គការសហប្រជាជាតិ​បានចាប់ផ្តើម​ដំណើរការ​ពិនិត្យ​ការចោទប្រកាន់​​នេះ​រួច​ហើយ​។ លោកស្រី​បន្ត​ថា “​ខ្ញុំ​គ្មាន​សំណួរ​ទេ​ដែល​ថា​ក្រសែភ្នែក​របស់​ពិភពលោក​កំពុង​មើល​លើ​សង្គ្រាម​នេះ និង​អ្វី​ដែល​រុស្ស៊ី​បានធ្វើ​ទាក់ទង​នឹង​ការឈ្លានពាន​និង​អំពើ​ឃោរឃៅ​ទាំងនេះ​”​។​

​ដំណើរ​ទស្សនកិច្ច​របស់​លោកស្រី​ហារីស​ទៅកាន់​ប្រទេស​ប៉ូឡូញ​បាន​កើតឡើង​ចំ​ពេលមា​ន​ការខ្វែងគំនិត​គ្នា​រវាង​ទីក្រុង​វ៉ា​សូវី​និង​ទីក្រុង​វ៉ាស៊ីនតោន​ជុំវិញ​សំណើ​របស់​ប៉ូឡូញ​ដើម្បី​បញ្ជូន​យន្តហោះ​ចម្បាំង​ដែល​​ផលិត​ដោយ​សូ​វៀត​របស់ខ្លួន​ទៅកាន់​មូលដ្ឋានទ័ព​អាម៉េរិក​និង​អង្គការ​ណា​តូ​ក្នុង​ប្រទេស​អាល្លឺម៉ង់ ដូច្នេះ​ពួកគេ​អាច​បញ្ជូន​វា​ទៅ​អ៊ុយ​ក្រែន​បាន​។​ជំនួស​មកវិញ ប៉ូឡូញ​នឹង​ទទួលយក​យន្តហោះ F-16​របស់​​អាម៉េរិក​។​

​ប៉ូឡូញ​បាន​លើក​សំណើ​នេះ​ជា​សាធារណៈ​ដោយ​មិន​មាន​ការ​ពិគ្រោះ​ជាមួយ​ស​ហ​រដ្ឋ​អាម៉េរិក​ជាមុន​។ ខណៈ​ដែល​លោកស្រី​ហារី​សបាន​ទៅដល់​ទីក្រុង​វ៉ា​សូវី​កាលពី​ល្ងាច​ថ្ងៃ​ពុធ មន្ទីរ​បញ្ច​កោណ​បាន​ច្រានចោល​​ទាំងស្រុង​នូវ​គំនិត​នេះ ដោយ​និយាយថា វា​នឹង​ប្រថុយ​កើត​ហានិភ័យ​សង្គ្រាម​រវាង​រុស្ស៊ី​និង​អ៊ុយ​ក្រែន​កាន់តែ​ធំ​ឡើង​។​

​នៅក្នុង​សន្និសីទ​សារព័ត៌មាន​កាល​ពី​ថ្ងៃ​ព្រហស្បតិ៍ ទាំង​លោកស្រី​ហារី​ស​និង​លោកឌូ​ដា​បាន​ស្វែងរ​កការលុបបំបាត់កា​រ​ខ្វែងគំនិត​គ្នា​លើ​បញ្ហា​យន្តហោះ​ចម្បាំង​៕

​លោកស្រី​ហារី​ស​បាន​ទៅដល់​ទីក្រុង​វ៉ា​សូវី​កាលពី​ល្ងាច​ថ្ងៃ​ពុធ