​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក វ្ល៉ា​ឌី​មៀរ ពូ​ទីន បាន​បណ្តេញ​ក្រុម​ឧត្តមសេនីយ៍​កំពូលរ​បស់​គាត់ ហើយ​ខឹងសម្បា​យ៉ាងខ្លាំង​ចំពោះ​ទីភ្នាក់ងារ​ចារកម្ម FSB​បន្ទាប់​ពី​បរាជ័យ​ក្នុងការ​ស៊ើប​​ការណ៍​សម្ងាត់​និង​យុទ្ធសាស្ត្រ​មិនល្អ ដែល​បណ្តាល​អោយ​កងទ័ព​របស់​គាត់​រង​បរាជ័យ​យ៉ាង​អាម៉ាស់​ជា​បន្តបន្ទាប់​នៅ​ប៉ុន្មាន​ថ្ងៃ​បើកឆាក​ដំបូង​នៃ​សង្គ្រាម​នៅ​អ៊ុ​យក្រែន​។​

​លោក អូ​ឡេក​ស៊ី ដា​នី​ឡូ​វ (Oleksiy Danilov) ប្រធាន​ក្រុមប្រឹក្សា​សន្តិសុខ​របស់​អ៊ុយ​ក្រែន​បាន​និយាយថា “​មេបញ្ជាការ​រុស្ស៊ី​ប្រហែល​ប្រាំ​បីនាក់​”​ត្រូវ​បាន​បណ្តេញចេញ​ចាប់តាំងពី​ការចាប់​​ផ្តើម​នៃ​ជម្លោះ ខណៈ​ដែល​ទីក្រុង​មូ​ស្គូ​កំពុង​ព្យាយាម​ផ្លាស់ប្តូរ​យុទ្ធសាស្ត្រ​បន្ទាប់​ពី​ការប៉ុនប៉ង​វាយលុក “​ដ៏​ភ្ញាក់ផ្អើល​និង​រន្ធត់​” បាន​បរាជ័យ​។​

​លោកពូ​ទីន​ក៏​ត្រូវ​គេ​និយាយ​ដែរ​ថា​មាន​ការ​ខឹងសម្បា​នឹង​ពួក​មេបញ្ជាការ​នៃ​សេវា​សន្តិសុខ FSB ដែល​លោក​ធ្លាប់​ដឹកនាំ សម្រាប់​ការផ្តល់​ឱ្យ​គាត់​នូវ​ព័ត៌មាន​ចារកម្ម ដែល​បង្ហាញ​ថា អ៊ុយ​ក្រែន​ទន់ខ្សោយ ពោរពេញ​ដោយ​ពួក​ពុករលួយ​បែបណា​ស៊ី​និយម ហើយ​នឹង​ចុះចាញ់​យ៉ាង​ងាយ ប្រសិនបើ​រង​ការវាយប្រហារ​។​

​លោក ហ្វី​លីព អ៊ី​ន​ក្រាម (Philip Ingram)​ជា​អ្នកជំនាញ​សន្តិសុខ​និង​ជា​អតីតមន្ត្រី​ស៊ើបការណ៍​សម្ងាត់​អង់គ្លេស​ជាន់ខ្ពស់ បាន​ប្រាប់​កាសែត The Times ថា លោកពូ​ទីន​ច្បាស់​ជា​ខឹង​ខ្លាំង​ណាស់ ហើយ​កំពុង​បន្ទោស​ភ្នាក់ងារ​ចារកម្ម​របស់គាត់​។​

​លោក​បាន​និយាយថា “​គាត់​បាន​ស្តីបន្ទោស​ពួកគេ​ចំពោះ​ការផ្តល់​ដំបូន្មាន​ដល់​គាត់ ដែលនាំឱ្យ​មាន​ការសម្រេច​ចិត្ត​មិន​ល្អ​នៅ​អ៊ុ​យក្រែន​”​។​

​ការសម្រេចចិត្ត​មិនល្អ​នេះ​បាន​នាំ​ឱ្យ​រុស្ស៊ី​ទទួលរង​នូវ​ការស្លាប់​និង​របួស​ច្រើន​ជាង​ការរំពឹង​ទុក​នៅ​ក្នុងកា​រ​វាយប្រហារ​របស់​ខ្លួន ដែល​ឥឡូវនេះ​បាន​បន្ត​អស់​រយៈពេល​ពីរ​សប្តាហ៍​។​

​វា​ហាក់បីដូច​ជា​ទីក្រុង​មូ​ស្គូ​បានប្រមើល​មើលឃើញកា​រតស៊ូ​តិចតួច​នៅពេលដែល​ខ្លួន​បាន​បញ្ជូន​កងកម្លាំង​កម្រិត​ស្រាល​ដែល​គាំទ្រ​ដោយ​ការវាយប្រហារ​តាម​អាកាស​ដើម្បី​ដណ្តើម​យក​គោលដៅ​សំខាន់ៗ​​ក្នុង​អំឡុង​ថ្ងៃ​បើកឆាក ប៉ុន្តែ​ត្រូវបាន​វាយបក​វិញ​យ៉ាង​ចាស់ដៃ​ពី​សំណាក់​អ៊ុ​យក្រែន​។​

​ចំនួន​ស្លាប់​ដែល​អាច​ទុកចិត្តបាន​គឺ​ពិបាក​រក​បាន​ណាស់ ប៉ុន្តែ​អ៊ុយ​ក្រែន​ជឿ​ថា​រុស្ស៊ី​បាន​បាត់បង់​ទាហាន​រហូតដល់ ១២.០០០ នាក់​ក្នុង​រយៈពេល​ពីរ​សប្តាហ៍​។ ចារកម្ម​អឺរ៉ុប​ដាក់​ចំនួន​ស្លាប់​ទាប​ជាង​នេះ គឺ ចន្លោះ​ពី ៦.០០០ ទៅ ៩.០០០ នាក់ ហើយ​សហរដ្ឋ​អាម៉េរិក​ដាក់​ចំនួន​ស្លាប់​ទាប​ជាងនេះទៅទៀត​គឺ​ត្រឹម ៣.០០០ នាក់​៕

​លោកពូ​ទីន​បណ្តេញ​មេបញ្ជាការ​ប្រហែល​ប្រាំ​បីនាក់ ដោយសារ​វាយ​មិន​ឈ្នះ​អ៊ុ​យក្រែន​