ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​ត្រូវបាន​រិះគន់​យ៉ាង​ខ្លាំង​ចំពោះ​ការបញ្ចេញ “​ព័ត៌មាន​ក្លែងក្លាយ​”​បន្ទាប់​ពី​អះអាងថា​ស្ត្រី​មាន​ផ្ទៃពោះ​ម្នាក់​ដែល​នៅ​រស់រាន​មានជីវិត​ពី​ការទម្លាក់​​គ្រាប់បែក​នៅ​មន្ទីរពេទ្យក្រុង​ម៉ា​រី​វ​ប៉ូល គឺជា​អ្នកសរសេរ​ប្លុក​កែ​សម្ផស្ស ខណៈ​វិមាន​ក្រឹម​ឡាំង​ព្យាយាម​បដិសេធ​យ៉ាងខ្លាំង​ចំពោះ​ការវាយប្រហារ​ម្តាយ​និង​កូនៗ​របស់​ពួកគេ​។​

​រដ្ឋមន្ត្រី​វប្បធម៌​អង់គ្លេស​លោកស្រី ណា​ឌី​ន ដូរី (Nadine Dorries) បាន​ថ្កោលទោស​ការ​បង្ហោះ​ព័ត៌មាន​ក្លែងក្លាយ​លើ Twitter របស់​ស្ថានទូត​រុស្ស៊ី​នៅ​ទីក្រុង​ឡុង​ដ៍ដែល​បាន​កំណត់​អ​ត្ត​​សញ្ញាណ​អ្នកជំងឺ​ហូរ​ឈាម​ដាប​ដែល​ឃើញ​ជម្លៀស​ចេញពី​មន្ទីរពេទ្យ​សម្ភព​ក្រុង​ម៉ា​រី​វ​ប៉ូល​កាលពី​ល្ងាច​ថ្ងៃ​ពុធ​ថា​ជា​នាង “​ម៉ា​រី​យ៉ាន​ណា​” (Marianna) ជា​អ្នកសរសេរ​ប្លុក​សម្រស់​មកពី​ទីក្រុង​នេះ​។​

Tweet ដែល​ត្រូវបាន​លុប​ចេញ​ដោយ​សារ​វា​បាន​រំលោភ​លើ “​គោលការណ៍​ណែនាំ​សហគមន៍​” របស់ Twitter បាន​អះអាង​ថា អ្នកសរសេរ​ប្លុក​នេះ “​បាន​ដើរតួ​” ជា​ជនរងគ្រោះ​ពីរ​នាក់​ក្នុង​រូបថត​ដែល​ខ្លួន​និយាយថា​ត្រូវ​បាន​ថត​ដោយ “​អ្នក​ឃោសនាការ​” ដែល​តាម​ពិត​ជា​អ្នក​ថតរូប​គួរឱ្យ​គោរព​របស់​ទីភ្នាក់ងារ​សារព័ត៌មាន AP​។​

​រឿង​នេះ​កើតឡើង​បន្ទាប់​ពី​រដ្ឋមន្ត្រី​ការបរទេស​រុស្ស៊ី​លោក​សឺ​ហ្គេ ឡាវ​រ៉ូវ បាន​ប្រាប់​សន្និសីទ​សារព័ត៌មាន​កាល​ពី​ថ្ងៃ​ព្រហស្បតិ៍​ថា មន្ទីរពេទ្យ​គឺជា “​គោលដៅ​ស្របច្បាប់​”​ពីព្រោះ​មិន​មាន​អ្នកជំងឺ​នៅក្នុង​​នោះ​ទេ​នៅ​ពេល​មាន​ការវាយប្រហារ ហើយ​វា​ត្រូវបាន​គ្រប់គ្រង​ដោយ “​ពួក​ជ្រុលនិយម​” មក​ពី​កងពលតូច​អា​ហ្សូ​វ (Azov) ដែល​កំពុង​ការពារ​ទីក្រុង​។​

​រូបភាព​និង​វីដេអូ​ពី​កន្លែងកើតហេតុ​បាន​បង្ហាញ​យ៉ាងច្បាស់​ថា ស្ត្រី​មាន​ផ្ទៃពោះ​រងរបួស​ជាច្រើន​នាក់​ត្រូវបាន​យកចេញ​ពី​មន្ទីរពេទ្យ ដែល​រង​ការខូចខាត​យ៉ាងធ្ងន់ធ្ងរ​។ អ៊ុយ​ក្រែន​បាន​និយាយថា មនុស្ស​បី​នាក់​បាន​ស្លាប់​នៅក្នុង​ការវាយប្រហារ​នេះ រួម​ទាំង​ក្មេង​ស្រី​អាយុ ៦ ឆ្នាំ​ម្នាក់ ខណៈ​ដែល​មនុស្ស ១៧ នាក់​ផ្សេង​ទៀត​រួម​ទាំង​បុគ្គលិក​មន្ទីរពេទ្យ​បាន​រងរបួស​។​

​នៅក្នុង​សន្និសីទ​សារព័ត៌មាន​ដដែល​នោះ លោក​ឡាវ​រ៉ូវ​បាន​អះអាង​ថា រុស្ស៊ី “​មិន​ដែល​វាយប្រហារ​អ៊ុយ​ក្រែនទេ​” ហើយ​បាន​ពន្លះ​ការរិះគន់​ជា​អន្តរជាតិ​ជុំវិញ​ការវាយប្រហារ​មន្ទីរពេទ្យ​ថា “​គួរឱ្យ​អាណិត​”​។ ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី បាន​ពណ៌នា​ការទម្លាក់​គ្រាប់បែក​ថា​ជា “​ឧក្រិដ្ឋកម្ម​សង្គ្រាម​” ខណៈ​ដែល​នាយករដ្ឋមន្ត្រី​អង់គ្លេស​លោក បូរី​ស ច​ន​សុន បាន​ហៅ​វា​ថា “​ថោកទាប​” ។​

​លោក​ឡាវ​រ៉ូវ​បាន​និយាយ​ពន្លះ​បែប​នេះ​ចំពេល​មាន​ព័ត៌មាន​មិន​ពិត​មួយចំនួន​ពី​វិមាន​ក្រឹម​ឡាំង​ក្នុង​រយៈពេល ៤៨ ម៉ោង​ចុងក្រោយ​នេះ​ក្នុង​គោលបំណង​បង្ហាញ​ហេតុផល​ត្រឹមត្រូវ​នៃ​ការសម្រេច​​ចិត្ត​របស់​លោក​ពូ​ទីន​ក្នុងការ​លុកលុយ​អ៊ុ​យក្រែន ខណៈ​កំពុង​ព្យាយាម​កាត់បន្ថយ​ឬ​សម្រាល​តួនាទី​របស់​រុស្ស៊ី​ជា​អ្នក​បង្កជម្លោះ​៕

​ស្ត្រី​មាន​ផ្ទៃពោះ​រងរបួស​រូបនេះ​ត្រូវ​រុស្ស៊ី​ចោទ​ថា​ជា​អ្នក​ផាត់មុខ​ឈ្មោះ ម៉ា​រី​យ៉ាន​ណា​