ដោយៈ គង់​ហេង​/ កំពង់ចាមៈ ចម្ងាយ​ប្រមាណ ៦០ គីឡូម៉ែត្រ ពី​ក្រុង​កំពង់ចាម ធ្វើដំណើរ​លើ ផ្លូវ​កៅស៊ូ លេខ ២៧០ តាម​បណ្តោយ​មាត់ទន្លេ​មេគង្គ នឹង​ទៅដល់​វត្ត​កង​ត្រង់​ណឹ​ង ឋិត​ក្នុង​ឃុំ កង​តា​ណឹ​ង ស្រុក​កងមាស ដែលជា​វត្ត​ចំណាស់​មួយ បាន​កកើត​តាំង ពី​សម័យ​លង្វែក​។​

​នេះ​ជាការ​ថ្លែង​ឱ្យដឹង​របស់លោក អ៊ុន ចាន់​ដា អភិបាលខេត្ត​កំពង់ចាម ក្នុង​មតិ​ស្វាគមន៍ ឧ​ត្ត​ម​សេនីយ៍ ហ៊ុន ម៉ា​ណែ​ត តំណាង​ដ៏​ខ្ពង់ខ្ពស់ របស់​សម្តេច​តេ​ជោ ហ៊ុន សែន និង​ភ្ញៀវកិត្តិយស ដែល​បាន​អញ្ជើញ​ចូលរួម សម្ពោធ​ដាក់ឱ្យ​ប្រើប្រាស់ សមិទ្ធផល​នានា ក្នុង​វត្ត​កង​ត្រង់​ណឹ​ង ក្នុងពេល​ថ្មីៗ កន្លងទៅនេះ​។​

​លោក​អភិបាលខេត្ត​កំពង់ចាម បាន​ថ្លែងឱ្យដឹងថាៈ ប្រវត្តិ​កង​ត្រង់​ណឹ​ង ជា​វត្ត​មួយ បាន​កកើត​តាំងពី​សម័យ​លង្វែក គឺ​នៅ​តំបន់​នេះ (​វត្ត​កង​ត្រង់​ណឹ​ង​) មាន​មនុស្ស​មក​រស់នៅ ដំបូង​ច្រើន តែ​ជា​អ្នក​ភៀសខ្លួន មកពី​តំបន់​ផ្សេងៗ ដោយ​ភ័យខ្លាច​ចម្បាំងរាំងជល់ ហើយ​បាន​កសាង​វត្ត នៅ​ចម្ងាយ ១.០០០ ម៉ែត្រ ពី​វត្ត​កង​ត្រង់​ណឹ​ង សព្វថ្ងៃនេះ ដែល​បច្ចុប្បន្ន អ្នកស្រុក​និយម​ហៅ​វត្ត​ចាស់​។​

​លោក​បាន​បន្ថែមថាៈ ក្រោយមក ដោយ​មានការ​ធ្វើទុក្ខបុកម្នេញ ពី​កង​សត្រូវ ដែល​ចូលលុក លុយ​ប្រទេស​កាលនោះ អ្នកស្រុក បាន​រើ​ភូមិ មក​តាំង​ទីលំនៅ តាម​ដីដុះ​មាត់ទន្លេ ដែលជា កន្លែង រស់នៅ​សព្វ​។ នៅ​ដើម​សតវត្សរ៍​ទី​១៩ ពេល​អ្នកស្រុក និង​ព្រះសង្ឃ មក​តាំងនៅ​កន្លែង វត្ត​កង​ត្រង់​ណឹ​ង បច្ចុប្បន្ននេះ ហើយក៏​គង់ និង​រស់នៅ រហូតដល់​ឆ្នាំ​១៩៧៥​។ ដោយ​ព្រះសង្ឃ និង​ពុទ្ធបរិស័ទ ចំណុះជើងវត្ត បាន​កសាង​ព្រះវិហារ​ចំនួន ពីរ នៅ​ពាក់កណ្តាល​សតវត្សរ៍​ទី ១៩ ហើយក៏​ត្រូវបាន​រុះរើ​សង់​ថ្មី នៅ​ដើម​សតវត្សរ៍​ទី​២០ ដឹកនាំ​ដោយ ចៅអធិការ​វត្ត​កង​ត្រង់​ណឹ​ង ព្រះនាម ព្រហ្ម អ៊ូ ព្រមទាំង​មាន​កសាង​សាលា​ពុទ្ធិក សាលាបឋមសិក្សា ជាច្រើន​ទៀត​។​

​លោក​បាន​បន្តថាៈ ប៉ុន្តែ​នៅ​ចន្លោះ​ឆ្នាំ ១៩៧៥-១៩៧៩ សមិទ្ធផល ក្នុង​វត្ត​នេះ​ទាំងអស់ ត្រូវបាន​បំផ្លាញ​ខ្ទេចខ្ទី គ្មាន​សល់​។ ដូច្នេះ​នៅក្រោយ​ថ្ងៃ​រំដោះ ៧ មករា ១៩៧៩ ព្រះសង្ឃ និង​ពុទ្ធបរិស័ទ បានចាប់ផ្តើម​កា​សាង វត្ត​កង​ត្រង់​ណឹ​ង ឡើងវិញ​។​

​ភិក្ខុ ច​យ ម៉េងហ៊ាន់ ជា​ចៅអធិការ​វត្ត​កង​ត្រង់​ណឹ​ង បាន​មាន​ដីកា នៅ​ថ្ងៃទី ១០ មីនា ម្សិលមិញ​ថាៈ ការដែល​យើង​អាច​បញ្ជាក់ ជា​វត្ត​កង​ត្រង់​ណឹ​ង ឬ​វត្ត​ចាស់ បាន​កសាង តាំងពី​សម័យ​លង្វែក មាន​ភស្តុតាង ចំនួន ពីរ គឺមាន​បន្សល់ទុក ប្រភេទ​ថ្មបាយក្រៀម​ច្រើន​ដុំ ហើយ​លោក​ប្រមូល​រើស​បាន ចំនួន បី ដុំ យកមក​រក្សាទុក នៅ​វត្ត​កង​ត្រង់​ណឹ​ង បច្ចុប្បន្ន ដែល​គង់ នៅ​សព្វថ្ងៃ​។​

​លោក​ចៅអធិការ ដែលមាន​ព្រះជន្ម ៣៣ ឆ្នាំ និង​បាន​បួស​រៀន នៅ​វត្ត​កង​ត្រង់​ណឹ​ង រយៈពេល ១៨ វស្សា បាន​ដីកា​បន្តថាៈ ភស្តុតាង​មួយទៀត ជាទី​តាំង​នៃ​វត្ត​ចាស់ ឋិត​នៅ​ឃ្លាត​ពី​វត្ត​កង ត្រង់​ណឹ​ង បច្ចុប្បន្ន ប្រមាណ​មួយ​គីឡូម៉ែត្រ ប៉ុន្តែ​ត្រូវបាន​បោះបង់ចោល យូរ​ឆ្នាំ​ហើយ ទើប​នៅក្នុង​កំឡុង​ឆ្នាំ ២០១៤-២០១៥ ត្រូវបាន​ចៅអធិការ​វត្ត មុន​លោក ពេជ្រ សុភាព ចាប់ផ្តើម​កសាង​ជា​មេន​, សាលាឆាន់ និង​ជា​ចេតិយ​រួមមួយ នៅ​ទីនោះ​៕​/V