ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ Chelsea កំពុង​ស្ថិត​ក្នុង​ភាពចលាចល បន្ទាប់ពី​ម្ចាស់​ក្លិប​លោក រ៉ូម៉ាន់ អា​ប្រា​ម៉ូ​វិច (Roman Abramovich)​ត្រូវបាន​ដាក់​ទណ្ឌកម្ម​ដោយ​ចក្រភព​អង់គ្លេស​​ជុំវិញ​ទំនាក់ទំនង​របស់​គាត់​ជាមួយ​លោក​វ្ល៉ា​ឌី​មៀរ ពូ​ទីន ដែល​ធ្វើឱ្យ​អនាគត​របស់​ក្លិប​ស្ថិត​ក្នុង​មន្ទិល​។​

​ដំណឹង​ដ៏​គួរឱ្យភ្ញាក់ផ្អើល​កាលពី​ថ្ងៃ​ព្រហស្បតិ៍​ទី​១០​មីនា​មាន​ន័យ​ថា​មហាសេដ្ឋី​ដែលមាន​ដើម​កំណើត​នៅ​រុស្ស៊ី​រូបនេះ​មិន​អាច​ជំរុញ​ការលក់​ក្លិប​បានទេ​។​

​ទោះយ៉ាងណា Chelsea អាច​ស្នើសុំ​ការកាន់កាប់​ពិសេស ដែល​នឹង​ត្រូវ​បាន​ពិចារណា​ប្រសិនបើ​រដ្ឋាភិបាល​មើលឃើញ​ការផ្លាស់ប្តូរ​ម្ចាស់​កម្មសិទ្ធិ​ផ្តល់​ជា​ប្រយោជន៍​ដល់​ក្លិប​ក្នុងករណី​វា​មិន​ផ្តល់​ផល​ប្រ​​យោជន៍​ដល់​លោក​អា​ប្រា​ម៉ូ​វិច​។​

​ក្នុង​សេណា​រី​យ៉ូនោះ វា​ទំនងជា​រដ្ឋាភិបាល​នឹង​គ្រប់គ្រង​ការលក់ ហើយ​ប្រាក់​ចំណូល​នឹង​ត្រូវ​បង្កក ឬ ចូលទៅ​ក្នុង​មូលនិធិ​សប្បុរសធម៌ ដែល​អាច​ផ្តល់​ទៅ​ជនរងគ្រោះ​ដោយសារ​សង្គ្រាម​នៅ​អ៊ុ​យក្រែន​។​

​នោះ​ធ្វើឱ្យ​លោក​អា​ប្រា​ម៉ូ​វិច​មាន​ជម្រើស​ពីរ​ប៉ុណ្ណោះ គឺ យល់ព្រម​តាម​លក្ខខណ្ឌ​របស់​រដ្ឋាភិបាល​និង​បាត់បង់​ក្លិប​ដោយ​គ្មាន​បាន​មួយ​សេន ឬ មិន​អ៊ីចឹង​ទុកឱ្យ Chelsea ដួលរលំ​សន្សឹមៗ​។​

​វា​ទំនងជា​មហាសេដ្ឋី​រុស្ស៊ី​នឹង​សម្រេចចិត្ត​លក់​ដើម្បី​ការពារ​អនាគត​របស់​ក្លិប បើទោះបីជា​នោះ​មានន័យថា​គាត់​មិន​បាន​ទទួល​ប្រាក់​សូម្បី​មួយ​កាក់​មួយ​សេន​សម្រាប់​ទ្រព្យ​សកម្ម ដែល​គាត់​ចង់​លក់​ក្នុងតម្លៃ ៣ ពាន់​លាន​ផោន​កាលពី​សប្តាហ៍​មុន​ក៏ដោយ​។​

​ភាគី​មួយ​ចំនួន​នៅតែ​ចង់​ទិញ​ក្លិប​តោ​ខៀវ រួម​ទាំង​មហាសេដ្ឋី​អចលនទ្រព្យ​អង់គ្លេស​លោក នី​ក ខេនឌី (Nick Candy)​ដែល​ការប៉ុនប៉ង​របស់គាត់​ដើម្បី​ទិញ Chelsea​ត្រូវបាន​បង្ហាញ​ដោយ​​វេបសាយ Sportsmail នៅ​ដើម​សប្តាហ៍​នេះ​។​

Chelsea បាន​ធ្វើ​ការពិភាក្សា​កាលពី​យប់​ថ្ងៃ​ព្រហស្បតិ៍​ជាមួយ​រដ្ឋាភិបាល​ចំ​ពេល​មាន​ការព្រួយបារម្ភ​ថា​ពួកគេ​នឹង​មិន​អាច​បញ្ចប់​យុទ្ធនាការ​ប្រកួត​រដូវ​កាល​នេះ​បាន​។​

​ក្រុម​មន្ត្រី​របស់​ក្រុម​តោ​ខៀវ​បាន​ស្នើ​ឱ្យមាន​ការកែប្រែ​ចំពោះ​អាជ្ញាប័ណ្ណ​ដែល​បាន​ចេញ ដើម្បី​អនុញ្ញាត​ឱ្យ​ពួកគេ​ធ្វើ​ប្រតិបត្តិ​ការបន្ត​។​

​ក្រោម​ការ​រឹតបន្តឹង​យ៉ាង​ទូលំទូលាយ Chelsea ត្រូវ​បាន​ហាម​មិន​ឱ្យ​លក់​សំបុត្រ​ប្រកួត បង្ខំ​ឱ្យ​បិទ​ហាង​របស់​ក្លិប និង​រារាំង​មិន​ឱ្យ​ទទួល​ការ​កក់​សណ្ឋាគារ Stamford Bridge ។​

​ពួកគេ​ត្រូវបាន​ប្រាប់ថា ពួកគេ​មិន​អាច​ទិញ​ឬ​លក់​កីឡាករ​ឬ​ផ្តល់​កិច្ចសន្យា​ថ្មី​បាន​ទៀត​ទេ ហើយ​ត្រូវបាន​ដាក់​កំហិត​លើ​ការចំណាយ​អតិបរមា ២០.០០០ ផោន​សម្រាប់​ការធ្វើដំណើរ​ទៅ​ប្រកួត​ក្រៅ​ដី​។​

​ពួកគេ​ត្រូវបាន​ជូន​ដំណឹង​ថា​ពួកគេ​អាច​ចំណាយ​ក្នុង​ខ្ទង់ “​សមរម្យ​” សម្រាប់​ការធ្វើជា​ម្ចាស់ផ្ទះ​ការប្រកួត​ក្នុង​ទឹកដី “​មិនឱ្យ​លើស​ពី ៥០០.០០០ ផោន​ក្នុង​មួយ​ការប្រកួត​ក្នុង​មួយក្រុម​”​។​

Chelsea នឹង​នៅតែ​អាច​ទទួលបាន​លុយ​ពី​ការផ្សាយ​តាម​កញ្ចក់​ទូរទស្សន៍​និង​លុយ​រង្វាន់ ប៉ុន្តែ​លុយ​ទាំងនោះ​នឹង​ត្រូវ​បង្ក​ក​។ បុគ្គលិក​និង​កីឡាករ​នឹង​បន្ត​ទទួល​បាន​ប្រាក់បៀវត្សរ៍​ដដែល​។​

​ក្រុមហ៊ុន Nike អាច​នឹង​ផ្តាច់ការ​ឧបត្ថម្ភ​តម្លៃ ៩០០ លាន​ផោន ក្រោយ​ក្រុមហ៊ុន Three UK បាន​ព្យួរ​កិច្ចព្រមព្រៀង​តម្លៃ ៤០ លាន​ផោន​ក្នុង​មួយឆ្នាំ​ជាមួយ​តោ​ខៀវ Chelsea៕

Chelsea កំពុង​ជ្រួលច្របល់ ក្រោយ​អង់គ្លេស​ដាក់ទណ្ឌកម្ម​លើ​លោក​អា​ប្រា​ម៉ូ​វិច​