​ប្រែ​សម្រួលៈ​បំណង​(ST)៖ សង្គ្រាម​នៅ​អ៊ុយ​ក្រែន​មិន​ត្រូវ​ទុក​អោយ​វា​រីក​រាលដាល​កាន់តែ​អាក្រក់​ទៅ​និង​ហួស​ពី​ការ​អាច​គ្រប់គ្រង​បានទេ នេះ​បើ​តាម​នាយករដ្ឋមន្ត្រី​ចិន​លោក​លី ឃឹ​ឈាំ​ង​កាលពី​ថ្ងៃ​សុក្រ​​ទី​១១ មីនា​។​

​ដោយ​ហៅ​សភាពការណ៍​នៅ​អ៊ុយ​ក្រែនថា​«​គួរអោយ​ព្រួយបារម្ភ​» លោក​លី​បាន​អំពាវនាវ​អោយ​អត់ធ្មត់​ដើម្បី​រារាំង​កុំអោយ​មាន​វិបត្តិ​មនុស្សធម៌​។​លោក​ថា​«​ភារកិច្ច​បន្ទាន់​បំផុត​នៅពេល​ឥឡូវ​គឺ​រារាំង​​ភាព​តានតឹង​កុំអោយ​វា​កាន់តែ​អាក្រក់​ទៅ​និង​ទៅ​ហួស​ពី​ភាព​អាច​គ្រប់គ្រង​បាន​»​។​

​សូមបញ្ជាក់​ថា ការ​វាយ​ចូល​របស់​រុស្ស៊ី​ទៅក្នុង​ប្រទេស​អ៊ុយ​ក្រែន​កំពុងបង្ក​វិបត្តិ​មនុស្សធ​ម៌មួយ​យ៉ាង​លឿន ដោយ​ជនភៀសខ្លួន​ជាង​២​លាន​នាក់​បាន​ភៀសខ្លួន​ចេញពី​ប្រទេស នេះ​បើ​តាម​អង្គការ​សហ​​ប្រជាជាតិ​។​

​រដ្ឋាភិបាល​ក្រុង​ប៉េកាំង​មិន​ព្រម​ថ្កោលទោស​ប្រតិបត្តិការ​យោធា​របស់​រុស្ស៊ី​ចូលក្នុង​អ៊ុយ​ក្រែនថា​ជា​«​ការឈ្លានពាន​»​មួយ​ទេ​និង​បាន​រិះគន់​ទណ្ឌកម្ម​របស់​បណ្តា​ប្រទេស​លោកខាងលិច​លើ​រុស្ស៊ី​។​

​កាលពី​ថ្ងៃ​សុក្រ​លោក​លី បាន​និយាយថា «​សេដ្ឋកិច្ចពិភពលោក​កំពុង​ទ្រេតទ្រោត​ទន់​ជើង​ដោយសារ​ជំងឺឆ្លង ដូច្នេះ​ការដាក់ទណ្ឌកម្ម​នឹង​បង្ក​ផលប៉ះពាល់​លើ​ការ​រើប​រើ​របស់​សេដ្ឋកិច្ច​ពិភពលោក​និង​ធ្វើ​​អោយ​ខូច​ប្រយោជន៍​គ្រប់គ្នា​»​។​

​នៅពេល​ត្រូវ​បាន​គេ​សួរ​អំពី​ការ​ដែល​រដ្ឋាភិបាល​ក្រុង​ប៉េកាំង​មិន​ព្រម​ថ្កោលទោស​អំពើ​របស់​រុស្ស៊ី លោក​លី​បាន​និយាយថា​«​ចិន​តែងតែ​ប្រកាន់​គោលនយោបាយ​ការបរទេស​ឯករាជ្យ​មួយ​សំរាប់​សន្តិភាព ​ហើយ​ការអភិវឌ្ឍ​ទំនាក់ទំនង​ទ្វេភាគី​របស់​យើង​មិន​ដែល​ផ្តោត​លើ​ភាគី​ទី​បី​ទេ​»​។​លោក​បាន​បន្ថែមថា រដ្ឋាភិបាល​ក្រុង​ប៉េកាំង​មានបំណង​បង្កើត​«​កិច្ចខិតខំ​បែប​ស្ថាបនា​»​ដើម្បី​រក្សា​សន្តិភាព​និង​ស្ថិរ​​ភាព​៕

​ក្នុង​សន្និសីទកាសែត​នៅ​ក្រុង​ប៉េកាំង​កាលពី​ថ្ងៃ​១១​មីនា លោក​លី មិន​បាន​ឆ្លើយ​ទៅ​នឹង​សំណួរ​ថា​តើ​ចិន​មាន​បាន​ត្រៀម​ផ្តល់​ការគាំទ្រ​សេដ្ឋកិច្ច​និង​ហិរញ្ញវត្ថុ​ដល់​រុស្ស៊ី​ដែរឬទេ​ឬក៏​នឹង​មិន​ថ្កោលទោស​រដ្ឋា​ភិ​​បាល​ក្រុង​មូ​ស្គូ​ឬ​ទោះជា​រុស្ស៊ី​ធ្វើ​អ្វី​ក៏ដោយ​