​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​កាលពី​ថ្ងៃ​សុក្រ​បាន​ដាក់​ទណ្ឌកម្ម​លើ​មហាសេដ្ឋី​រុស្ស៊ី​លោក វី​កទ័រ វេ​ក​សែលបឺក (Viktor Vekselberg) សមាជិកគ្រួសារ​បី​នាក់​របស់​​អ្នកនាំពាក្យ​ប្រធានាធិបតីវ្ល៉ា​ឌី​មៀរ ពូ​ទីន និង សមាជិកសភា​នៅក្នុង​ការដាក់ទណ្ឌកម្ម​ចុង​ក្រោយ​សម្រាប់​ការ​លុកលុយ​របស់​ទីក្រុង​មូ​ស្គូលើ​អ៊ុ​យក្រែន​។​

​រុស្ស៊ី​បាន​រង​ការវាយប្រហារ​ដោយ​វិធានការ​មួយចំនួន​ចាប់តាំងពី​ការចាប់ផ្តើម​ការ​លុកលុយ​ថ្ងៃទី ២៤ ខែ​កុម្ភៈ ដែល​ជា​ការវាយប្រហារ​ដ៏​ធំ​បំផុត​លើ​រដ្ឋ​អឺរ៉ុប​ចាប់តាំងពី​ឆ្នាំ ១៩៤៥​ដែល​ទីក្រុង​មូ​ស្គូ​​និយាយថា​ជា “​ប្រតិបត្តិការ​ពិសេស​” ដើម្បី​រំសាយទ័ព​អ្នកជិតខាង​របស់​ខ្លួន និង​បណ្តេញ​មេដឹកនាំ​ដែល​ខ្លួន​ហៅ​ថា “​ពួក​ណា​ស៊ី​និយម​”​។

​ក្រសួង​រតនាគារ​អាម៉េរិក​បាន​និយាយ​នៅក្នុង​សេចក្តីថ្លែងការណ៍​មួយ​ថា អ្នក​ដែល​រង​ការវាយប្រហារ​ដោយ​ការដាក់ទណ្ឌកម្ម​កាលពី​ថ្ងៃ​សុក្រ​រួម​មាន​មនុស្ស ១០ នាក់​នៅក្នុង​ក្រុមប្រឹក្សាភិបាល​របស់​ធនា​គារ VTB ដែលជា​អ្នក​ផ្តល់​ប្រាក់​កម្ចី​ធំ​ទី​ពីរ​នៅក្នុង​ប្រទេស​រុស្ស៊ី និង​សមាជិក​សភា​ឌូ​ម៉ា​(Duma) ដែល​ជា​សភា​ជាន់​ទាប ចំនួន ១២ នាក់​។​

​រដ្ឋមន្ត្រី​ក្រសួង​រតនា​គារ​លោកស្រី ចា​ណេត យែ​លឡិន (Janet Yellen)​បាន​និយាយថា​”​ក្រសួង​រតនាគារ​បន្ត​ចាប់​ក្រុម​មន្ត្រី​រុស្ស៊ី​ឱ្យ​ទទួលខុសត្រូវ​ចំពោះ​ការជំរុញ​ឱ្យ​មាន​សង្គ្រាម​ដ៏​អយុត្តិធម៌​និង​​គ្មាន​ការបង្ក​ហេតុ​របស់​ពូ​ទីន​”​។​

​អ្នកនាំពាក្យ​របស់​លោក​ពូ​ទីន លោក ឌី​មី​ទ្រី ប៉េ​ស្កូវ (Dmitry Peskov) ត្រូវបាន​កំណត់​គោលដៅ​កាលពី​ថ្ងៃទី ៣​ខែ​មីនា​។​វិធានការ​កាលពី​ថ្ងៃ​សុក្រ​បាន​ពង្រីក​ដល់​ប្រពន្ធ​និង​កូន​ពេញវ័យ​ពីរ​នាក់​​របស់លោក​។​

​ក្រសួង​រតនាគារ​បាន​និយាយ​នៅក្នុង​ការចេញផ្សាយ​មួយ​ថា ពួកគេ​រស់នៅ​តាម “​របៀប​ប្រណីត ដែល​មិន​ស៊ីគ្នា​នឹង​ប្រាក់ខែ​មន្ត្រី​រដ្ឋការ​របស់​ប៉េ​ស្កូវ​”​។​

​កាលពី​ពាក់កណ្តាល​ខែ​កុម្ភៈ សភា​ជាន់​ទាប​របស់​រុស្ស៊ី​បាន​បោះឆ្នោត​ស្នើ​ឱ្យ​លោក​ពូ​ទីន​ទទួលស្គាល់​តំបន់​ផ្តាច់ខ្លួន​ចំនួន​ពីរ ដែល​គាំទ្រ​ដោយ​រុស្ស៊ី​នៅ​ភាគ​ខាងកើត​អ៊ុយ​ក្រែនថា​ជា​រដ្ឋ​ឯករាជ្យ​។​

​សមាជិកសភា ១១ នាក់ និង​ប្រធាន​សភា​លោក វីយ៉ា​ឆេ​ស្លាវ វ៉ូ​ឡូ​ឌី​ន (Vyacheslav Volodin)​ត្រូវបាន​បញ្ចូល​ទៅក្នុង​បញ្ជី​ទណ្ឌកម្ម​កាលពី​ថ្ងៃ​សុក្រ​ទី​១១​មីនា​៕

​ប្រធានាធិបតី​រុស្ស៊ី លោក វ្ល៉ា​ឌី​មៀរ ពូ​ទីន និង អ្នកនាំពាក្យ​លោក ឌី​មី​ទ្រី ប៉េ​ស្កូវ