​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អភិបាលក្រុង​គៀវ​និង​ជា​អតីត​ម្ចាស់​ជើងឯក​ប្រដាល់​ទម្ងន់​ធ្ងន់​លោក វី​តា​លី គ្លី​តស្កូ (Vitali Klitschko) បាន​និយាយ​កាលពី​ថ្ងៃ​សុក្រ​ទី​១១​មីនា​ថា គាត់​ជឿថា​មាន​មនុស្ស​ជិត ២ លាន​នាក់​បន្ត​នៅក្នុង​ទីក្រុង ដែល​កំពុង​ត្រូវបាន​ឡោម​ព័ទ្ធ​ដោយ​កងកម្លាំង​រុស្ស៊ី​ដែល​ទំនើប​ជាង​នៅ​ខ្សែត្រៀម​ជាច្រើន​។​

​លោក​បាន​និយាយថា រដ្ឋធានី​អ៊ុ​យក្រែន ដែល​ជា​ធម្មតា​មាន​ប្រជាជន​ចំនួន ៣,៥ លាន​នាក់ មាន​ការផ្គត់ផ្គង់​សំខាន់ៗ​គ្រប់គ្រាន់​ដើម្បី​ប្រើប្រាស់​រយៈពេល​ប៉ុន្មាន​សប្តាហ៍​ទៀត​ហើយ​ថា​បណ្តាញ​ផ្គត់ផ្គង់​​ចេញចូល​នៅតែ​បើកចំហ​សម្រាប់​ពេល​នេះ​។​

​ប្អូនប្រុស​របស់​គាត់​គឺ​លោក វ្ល៉ា​ឌី​មៀរ (Wladimir) ដែល​ជា​តារា​ប្រដាល់​ទម្ងន់​ធ្ងន់​ផង​ដែរ​នោះ បាន​បន្ថែម​នៅក្នុង​បទសម្ភាសន៍​រួមគ្នា​ថា​បុរស​និង​ស្ត្រី​មួយចំនួន​ដែល​បាន​អមដំណើរ​ជាមួយ​ក្រុម​​គ្រួសារ​របស់​ពួកគេ​ទៅ​កាន់​ទី​សុវត្ថិភាព​នៅ​ភាគ​ខាងលិច​ប្រទេស​កំពុង​វិលត្រឡប់​មក​វិញ​ដើម្បី​ចូលរួម​ក្នុង​ការការពារ​ទីក្រុង​។​

​លោក​វី​តា​លី​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័រ​នៅ​ឯ​មជ្ឈមណ្ឌល​ដឹកជ​ញ្ជូ​ន​ក្នុង​ទីក្រុង​គៀវ ទី​ដែល​គាត់​និង​ជំនួយការ​កំពុង​សម្រប​សម្រួល​ការផ្គត់ផ្គង់​អាហារ​និង​ថ្នាំពេទ្យ​ដល់​ហាង​និង​មនុស្ស​​ដែល​ជាប់គាំង​នៅ​តាម​ផ្ទះ​យ៉ាង​ដូច្នេះ​ថា “​យើង​ប៉ាន់ស្មាន​ថា​មនុស្ស​ជិត ២ លាន​នាក់​នៅ​តែ​ស្ថិត​ក្នុង​ទីក្រុង​គៀវ ហើយ​វា​មាន​សារៈសំខាន់​ខ្លាំងណាស់​ក្នុង​ការផ្តល់​សេវា​កម្ម​ដល់​ប្រជាជន​”​។​

​លោក​បាន​បន្ថែម​ជា​ភាសា​អង់គ្លេស​ថា “​ឥឡូវ​នេះ​យើង​មាន​អគ្គិសនី ភ្លើង​កម្តៅ ហ្គាស និង​ទឹក​”​។​

​លោក​បាន​ថ្លែងអំណរគុណ​ដល់​ប្រទេស​នានា​ដែល​បាន​បញ្ជូន​ការផ្គត់ផ្គង់​ទៅកាន់​អ៊ុ​យក្រែន ហើយ​បាន​ប៉ាន់ស្មាន​ថា​ទីក្រុង​គៀវ​មាន​ទំនិញ​សំខាន់ៗ​គ្រប់គ្រាន់​ដើម្បី​ប្រើប្រាស់​រយៈពេល​ពីរ​សប្តាហ៍​ទៀត​។​

​យោធា​របស់​រុស្ស៊ី​បាន​ទៅ​ជិត​ទីក្រុង​គៀវ​រួចហើយ​នៅ​ភាគ​ខាងលិច​និង​ភាគ​ពាយព្យ ទី​ដែល​មាន​ការប្រយុទ្ធ​គ្នា​យ៉ាង​ខ្លាំងក្លា ហើយ​បាន​ព្យាយាម​រុល​ទៅជិត​ភាគ​ខាងកើត​និង​ភាគ​ឦសាន​។​

​ក្រុមមន្ត្រី​អ៊ុយ​ក្រែ​ននិយាយថា គោលបំណង​ចុងក្រោយ​របស់​រុស្ស៊ី​គឺ​ឡោមព័ទ្ធ​ទី​ក្រុង​ក្នុង​គោលបំណង​ដណ្តើម​យក​រដ្ឋធានី​។​

​រូបភាព​ពី​ផ្កាយរណប​បានបង្ហាញ​កាលពី​ថ្ងៃ​សុក្រ​ថា កងកម្លាំង​រុស្ស៊ី​កំពុង​ប្រមូលផ្តុំ​ឡើង​វិញ​នៅ​ភាគ​ពាយព្យ​នៅក្នុង​អ្វីដែល​ចក្រភព​អង់គ្លេស​និយាយថា​អាច​ជា​ការត្រៀមខ្លួន​សម្រាប់​ការវាយលុក​​លើ​ទីក្រុង​ក្នុង​រយៈពេល​ប៉ុន្មាន​ថ្ងៃ​ទៀត​។​

​លោក​វី​តា​លី​បាន​និយាយថា “​គោលដៅ (​នៃ​ការឈ្លានពាន​របស់​រុស្ស៊ី​) គឺជា​រដ្ឋធានី​នៃ​ប្រទេស​អ៊ុ​យក្រែន​។ គោលដៅ​គឺ​ទីក្រុង​គៀវ​។ យើង​ត្រៀម​ខ្លួន​រួច​ជា​ស្រេច​ដើម្បី​ការពារ​ទីក្រុង​របស់​យើង​”៕

បងប្អូន​ត្រកូល​គ្លី​តស្កូ​ត្រៀមខ្លួន​ជាស្រេច​ដើម្បី​ការពារ​ទីក្រុង​គៀវ