​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ វីដេអូ​ឃ្លីប​មួយ​បាន​បង្ហាញ​គ្រាដែល​ក្រុម​អ្នក​ប្រយុទ្ធ “​ស្ម័គ្រចិត្ត​” ស៊ី​រី​កំពុងកាន់​ទង់​អក្សរ “Z” ដែល​គាំទ្រ​រុស្ស៊ី​យ៉ាង​មាន​មោទនភាព​ខណៈដែល​ពួកគេ​ត្រៀម​ចូលរួម​​ការ​លុកលុយ​ខុស​ច្បាប់​របស់​ទីក្រុង​មូ​ស្គូលើ​អ៊ុ​យក្រែន​។​

​ប៉ុស្តិ៍​ទូរទស្សន៍​ក្រសួងការពារជាតិ​រុស្ស៊ី​បាន​ចែករំលែក​ឈុត​ខ្លីៗ​នៃ​អ្នក​ប្រយុទ្ធ​ស៊ី​រី​ត្រៀម “​ស្ម័គ្រចិត្ត​” នៅ​អ៊ុ​យក្រែន ខណៈ​ដែល​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី បាន​ថ្កោលទោស​លោក វ្ល៉ា​ឌី​មៀរ ពូ​ទីន ចំពោះ​ការជួល “​ឃាតករ​” បរទេស​។​

​នៅក្នុង​វីដេអូ​នោះ​គេ​ឃើញ​ទាហាន​ស៊ីឈ្នួល​ស៊ី​រី​ប្រដាប់​ដោយ​អាវុធ​រាប់​សិប​នាក់​បាន​តម្រៀបជួរ​គ្នា ខណៈ​ទាហាន​ពាក់​ក្រណាត់​ជួតក្បាល​ម្នាក់​កាន់​សញ្ញា “Z” យ៉ាង​មាន​មោទនភាព​ដែល​បាន​ក្លាយជា​​និមិត្តសញ្ញា​គាំទ្រ​សង្គ្រាម​របស់​ទីក្រុង​មូ​ស្គូ​។​

​ក្រោយមក​រូបភាព​ដ៏​គួរ​ខ្លាច​ផ្សេងទៀត​បាន​បង្ហាញ ក្រុម​នេះ​ច្រៀង គ្រវីទង់ជាតិ​រុស្ស៊ី​ទាំង​ក្តី​អំណរ និង​កាន់​ផ្ទាំង​រូបភាព​ប្រធានាធិបតី​ពូ​ទីន​។​

​នៅក្នុង​កិច្ចប្រជុំ​មួយ​របស់​ក្រុមប្រឹក្សា​សន្តិសុខ​របស់​រុស្ស៊ី រដ្ឋមន្ត្រី​ការពារជាតិ​លោក​សឺ​ហ្គេ សយ​ហ្គូ (Sergei Shoigu)​បាន​និយាយថា អ្នកស្ម័គ្រចិត្ត ១៦.០០០​នាក់​នៅ​មជ្ឈិមបូព៌ា​បាន​ត្រៀម​ខ្លួន​រួច​​ជា​ស្រេច​ដើម្បី​ប្រយុទ្ធ​រួម​ដៃ​ជាមួយ​កងកម្លាំង​ដែល​គាំទ្រ​ដោយ​រុស្ស៊ី​នៅក្នុង​តំបន់​ដុន​បាស​ភាគ​ខាងកើត​អ៊ុ​យក្រែន​។​

​ចំណាត់ការ​នេះ ដែល​កើតឡើង​តែ​ជាង​ពីរ​សប្តាហ៍​ចាប់តាំងពី​ប្រធានាធិបតី​រុស្ស៊ី​បាន​បញ្ជា​ឱ្យ​មាន​ការឈ្លានពាន​យ៉ាង​ឃោរឃៅ​នោះ អនុញ្ញាត​ឱ្យ​រុស្ស៊ី​ដាក់ពង្រាយ​ទាហាន​ស៊ីឈ្នួល​ក្បាលរឹង​មក​ពី​សមរភូមិ​ជម្លោះ​ដូច​ជា​ស៊ី​រី ដោយ​មិន​ប្រថុយ​បាត់បង់​ជីវិត​ទាហាន​រុស្ស៊ី​បន្ថែមទៀត​៕

​ទាហាន​ស៊ីឈ្នួល​ដែល​គេ​សន្មត់​ថា​មក​ពី​ស៊ីរី​កំពុងកាន់​ទង់​អក្សរ Z ដើម្បី​ប្រយុទ្ធ​សម្រាប់​រុស្ស៊ី​នៅ​អ៊ុ​យក្រែន​