​ប្រែ​សម្រល : កញ្ញា​ដា​លី​ស (​ដេល្លី​ម៉េល​) ៖ អ្នក​ប្រហែល​អាច​ស្រមៃ​បាន​នូវ​ពាក្យពេចន៍​ដ៏​រំភើប​ដែល​និយាយ​ដោយ​វីរនារី​វ័យក្មេង​ក្នុង​រឿង​ហូលីវូដ ៖ “​បង​ដឹង​ហើយ អូន​ប្រាកដ​ណា​ថា បង​នឹង​សម្លឹង​មើល​អូន​ក្នុង​រូបថត​នេះ​។ ពីព្រោះ​បង​តែងតែ​សម្លឹងមើល​មក​អូន​តាម​របៀប​នេះ​”​។​

“​អូន​បន់​ឱ្យ​ស្ត្រី​គ្រប់រូប​មាន​គេ​សម្លឹង​មើល​បែបនេះ​។ មាន​តែ​មនុស្ស​ស្រលាញ់​ស្មោះ​ទេ​ដែល​សម្លឹង​មើល​បែបនេះ​។ អូន​តែងតែមាន​អារម្មណ៍​ដឹង​ពី​ស្នេហា​របស់​បង​។ ដរាបណា​បង​នៅតែ​មើល​មក​បែប​នេះ អូន​មិន​ខ្លាច​អ្វី​ទាំងអស់​”​។​

“​យើង​នៅ​មាន​រឿងរ៉ាវ​ជាច្រើន​នៅ​ចាំ​ខាង​មុខ​យើង​។ ដូច្នេះ​សូម​បង​ថែរក្សា​ខ្លួន​។ យើង​ត្រូវតែ​សម្រេច​អ្វី​គ្រប់យ៉ាង​ដែល​យើង​សុបិន​រួមគ្នា​។ រីករាយ​ថ្ងៃកំណើត​, ម្ចាស់​ស្នេហ៍​អូន​! អូន​សន្យា​សម្លឹង​មើល​បង​វិញ​។ សម្លឹង​មើល​បែបនេះ​។ ជានិច្ច​!”​។​

​ប៉ុន្តែ​អ្នក​នឹកស្មាន​ខុស​ហើយ​។ ពាក្យពេចន៍​ដ៏​ស្មោះ​អស់ពីដួងចិត្ត​ទាំងនេះ​ត្រូវ​បាន​សរសេរ​ដោយ​លោក​ជំទាវ អូ​ឡេ​ណា ហ្សេ​លេន​ស្កា (Olena Zelenska) កាលពី​ថ្ងៃទី ២៥ ខែ​មករា អម​ជាមួយ​រូបថត​​ស​ខ្មៅ​របស់​ស្វាមី​របស់​លោកស្រី ដែល​រៀបការ​នឹង​គ្នា ១៨ ឆ្នាំ នេះ​បើ​តាម​សារ​បង្ហោះ​របស់​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី​នៅលើ Instagram សម្រាប់​ខួបកំណើត​របស់គាត់​។ បន្ទាប់មក សារ​នេះ​បានទទួល​ការចាប់អារម្មណ៍​បន្តិច​ម្តងៗ​។​

​តែ​៣០​ថ្ងៃ​ក្រោយមក រុស្ស៊ី​បាន​ចូល​ឈ្លានពាន​អ៊ុ​យក្រែន​។ ឥឡូវនេះ ក្រសែភ្នែក​របស់​ពិភពលោក​កំពុង​សម្លឹង​មើល​គូ​ស្វាមីភរិយា​ដ៏​អស្ចារ្យ​នេះ​ដែល​បានធ្វើឱ្យ​ពួកយើង​ទាំងអស់គ្នា​ទន់​ចិត្ត​ជាមួយនឹង​ការ​​តាំងចិត្ត ការ​ស្នេហា​ជាតិ និង​ភាពក្លាហាន​របស់​ពួកគេ ហើយ​បាន​ទាញ​យើង​ឱ្យ​ចូលទៅ​ក្នុង​រឿងរ៉ាវ​ស្នេហា​ដ៏​វីរភាព​របស់​ពួកគេ ដែល​ចាប់ផ្តើម​តាំងពី ២៧ ឆ្នាំមុន​។​

​អ្នក​ទាំង​ពីរ​មិន​ដែល​ខ្លាច​ក្នុង​ការប្រកាស​ពី​សេចក្តីស្រឡាញ់​ចំពោះ​គ្នា​ទៅវិញទៅមក​ក្នុង​សារ​បង្ហោះ​តាម​បណ្តាញ​សង្គម​នោះឡើយ​។​

​នៅក្នុង​សារ​បង្ហោះ​មួយ​កាលពី​ខែ​មករា ឆ្នាំ ២០២០ លោកស្រី​អូ​ឡេ​ណា​បាន​ពណ៌នា​អំពី “​បុរស​ពិត​” ដែល​ផ្តល់​ក្តីស្រឡាញ់​ពេញ​បេះដូង​និង​ធ្វើឱ្យ​លោកស្រី​ពេញលេញ​ម្ចាស់​ស្នេហ៍​ដែល​វត្តមាន​របស់​គាត់​​ត្រូវ​លោកស្រី​ដឹង​ជា​និច្ច​នៅ​ពេល​ពួកគេ​នៅ​ឆ្ងាយ​ពីគ្នា និង ក្តី​សុ​បិនរួម​របស់​អ្នក​ទាំង​ពីរ​បាន​បំផ្លាញ​អស់​ការភ័យខ្លាច​ទាំងពួង​។ លោកស្រី​បាន​សរសេរថា “​សុវត្ថិភាព​។ កក់ក្ដៅ​។ មិន​ដែល​ស្ងប់ស្ងាត់ ប៉ុន្តែ​តែងតែ​គួរឱ្យ​ចាប់អារម្មណ៍​។ នេះ​ហើយ​ជា​របៀប​ដែល​អ្នក​មាន​អារម្មណ៍​ចំពោះ នៅពេល​បុរស​ពិត​នៅក្បែរ​អ្នក​។ អ្នក​អាច​ពឹងពាក់​បាន​ចំពោះ​អ្វីៗ​គ្រប់យ៉ាង​”​។​

​សម្រាប់​ថ្ងៃ​កំណើត​របស់​លោកស្រី​កាលពី​ខែ​កុម្ភៈ​ឆ្នាំមុន លោក​វ៉ូ​ឡូ​ឌី​មៀរ​បាន​សរសេរ​អំពី​លោកស្រី​អូ​ឡេ​ណា យ៉ាង​ដូច្នេះ​ថា “​បង​ចូលចិត្ត​របៀប​ដែល​អូន​គិត​។ អរគុណ​សម្រាប់​ការ​នៅ​ទីនោះ​។​…​សម្រាប់​​ការពិត​, សម្រាប់​ការ​សម្លឹងមើល​, សម្រាប់​ការនិយាយ​សំណើច​។ សម្រាប់​គ្រា​ដែល​បង​មិនមែន​ជា​បង​ពេល​គ្មាន​អូន​។ … សូម​អរគុណ​អូន​សម្រាប់​អ្វីៗ​គ្រប់យ៉ាង​”​។​

​ភាសា​កាយវិការ​របស់​អ្នក​ទាំង​ពីរ​គឺ​មាន​ថាមពល​ខ្លាំងណាស់​។ រូបថត​ជា​ច្រើន​សន្លឹក​នៅលើ​គណនី Instagram របស់​លោកស្រី​អូ​ឡេ​ណា​បាន​បង្ហាញ​ប្តី​និង​ប្រពន្ធ​នេះ​នៅ​ក្បែរ​គ្នា ញញឹម កាន់​ដៃ​គ្នា លាប​មុខ Superhero ជាមួយ​កូនៗ​។​

​អ្នក​ទាំង​ពីរ​មើលទៅ​មិន​អាច​បំបែក​បាន​ឡើយ​។ ហើយ​ឥឡូវនេះ​ពួកគេ​ត្រូវការ​គ្នា​ទៅវិញទៅមក​ជាង​ពេលណាៗ​ទាំងអស់​។​ដោយ​បង្ខំចិត្ត​លាក់​ខ្លួន​ក្រោម​សំឡេង​ស៊ី​រ៉ែ​ន​ព្រមាន​អំពី​ការវាយប្រហារ​តាម​​អាកាស លោកស្រី​អូ​ឡេ​ណា​ដឹង​ថា លោកស្រី​ក៏​ដូច​ស្វាមី​ដែរ​គឺ​ត្រូវបាន “​កំណត់​គោលដៅ​សម្លាប់ចោល​” ពី​សំណាក់​លោក វ្ល៉ា​ឌី​មៀរ ពូ​ទីន​។​

​ប៉ុន្តែ​លោកស្រី​បាន​រះ​ត្រដែត​ក្នុងតួនាទី​ថ្មី​ដ៏​គួរ​ឱ្យ​ស្ញប់ស្ញែង​ក្នុងនាម​ជា “​គោលដៅ​ទី​ពីរ​” របស់​ពូ​ទីន ជាមួយនឹង​ភាពក្លាហាន​ដ៏​គួរឱ្យភ្ញាក់ផ្អើល ដោយ​បដិសេធ​មិន​រត់​ចេញពី​ប្រទេស​ជាមួយ​កូនៗ​និង​មិន​​ត្រឹម​បង្ក​ការភ្ញាក់ផ្អើល​ចំពោះ​អ៊ុយ​ក្រែន​ប៉ុណ្ណោះទេ តែ​ថែមទាំង​ពិភពលោក​ស៊ីវិល័យ​ទាំងមូល​ជាមួយនឹង​កិត្តិយស​និង​សេចក្តីថ្លៃថ្នូរ​របស់លោក​ស្រី​នៅ​ក្រោម​ភ្នក់ភ្លើងសង្គ្រាម​។​

​ប៉ុន្មាន​ម៉ោង​បន្ទាប់​ពី​រុស្ស៊ី​បាន​វាយប្រហារ​អ៊ុយ​ក្រែនជា​លើកដំបូង​កាល​ពី​ពីរ​សប្តាហ៍​មុន លោកស្រី​អូ​ឡេ​ណា​អាយុ ៤៤ ឆ្នាំ​បាន​សរសេ​រលើ Instagram ថា “​ខ្ញុំ​នឹង​មិន​មាន​ការ​ភ័យ​ស្លន់ស្លោ​និង​ស្រក់​ទឹកភ្នែក​ឡើយ​។ ខ្ញុំ​នឹង​ស្ងប់​អារម្មណ៍​និង​មាន​ទំនុកចិត្ត​ជា​និច្ច​។ កូនៗ​របស់ខ្ញុំ​កំពុង​សម្លឹងមើល​មក​ខ្ញុំ​។ ខ្ញុំ​នឹង​នៅក្បែរ​ពួកគេ​។ ហើយ​នៅ​ក្បែរ​ស្វាមី​ខ្ញុំ​។ ហើយ​ជាមួយ​អ្នក​ទាំងអស់​គ្នា​”​។​

​ដូច្នេះ​តើ​ម្ដាយ​កូន​ពីរ​រូប​នេះ ដែល​ជា​អ្នកនិពន្ធ​មានទឹក​ដៃ​មួយ​រូប​ដែល​មិន​សប្បាយចិត្ត​ពេល​ស្វាមី​ប្រកាស​ឈរឈ្មោះ​ជា​ប្រធានាធិបតី អាច​រក្សា​ការ​តាំងចិត្ត​ដ៏​អស្ចារ្យ​បែប​នេះ​បាន​យ៉ាងដូចម្ដេច​? ហើយ​តើ​លោកស្រី​អាច​ឆក់​យក​បេះដូង​អតីត​តារា​កំប្លែង​ដែល​ទទួលបាន​ការគោរព​និង​ការកោតសរសើរ​ពី​លោក​ខាងលិច​យ៉ាងដូចម្តេច​?

​បទសម្ភាសន៍​ខ្លី​ពី​ប៉ុន្មាន​ឆ្នាំ​មុន​នៅក្នុង​សារព័ត៌មាន​អ៊ុ​យក្រែន ដែល​ទទួលបាន​ដោយ​សារព័ត៌មាន​ដេល្លី​ម៉េល​បាន​បង្ហាញ​រឿងរ៉ាវ​ស្នេហា​ដែល​គួរឱ្យ​ទាក់ទាញ​ជាង​សំណេរ​របស់​លោកស្រី​អូ​ឡេ​ណា​សរសេរ​​នៅលើ​អ៊ី​ន​ធឺ​ណេ​តទៅទៀត​។​

​ដោយ​មាន​អាយុ​ក្មេង​ជាង​លោក​វ៉ូ​ឡូ​ឌី​មៀរ​ត្រឹមតែ ១២ ថ្ងៃ លោកស្រី​អូ​ឡេ​ណា​ក៏​ដូច​ជា​ប្តី​របស់​លោកស្រី​បាន​ធំ​ដឹងក្តី​នៅក្នុង​អតីត​ទីក្រុង​រុករក​រ៉ែ គ្រីវ​យី​រី (Kryvyi Rih) នៅ​ភាគ​កណ្តាល​អ៊ុ​យក្រែន​។ ថ្វីត្បិតតែ​រៀន​នៅ​សាលា​ដូចគ្នា ក៏​ប៉ុន្តែ​ពួកគេ​កម្រ​សារភាព​ស្នេហ៍​ចំពោះ​គ្នា​ណាស់​។ លោក​ហ្សេ​លេន​ស្គី​បាន​បង្ហើប​ពី​អារម្មណ៍​របស់​គាត់​ចំពោះ​លោក​ស្រី​អូ​ឡេ​ណាថា “​ទាល់តែ​ដល់​ថ្ងៃ​ចុងក្រោយ​នៃ​ការសិក្សា​នៅ​សាលា​វិទ្យាល័យ ទើប​ខ្ញុំ​ប្តេជ្ញា​តាម​ស្រឡាញ់​នាង​ឱ្យបាន​”​។​

​អូ​ឡេ​ណា​បាន​បន្ត​ការសិក្សា​ផ្នែក​ស្ថាបត្យកម្ម ខណៈ​លោក​វ៉ូ​ឡូ​ឌី​មៀរ​សិក្សា​ផ្នែក​ច្បាប់​នៅ​សាកលវិទ្យាល័យ​ជាតិ​គ្រីវ​យី​រី​។​

​ក្នុងនាម​ជា​និស្សិត​ទើប​ចូល​រៀន​ថ្នាក់​បរិញ្ញាបត្រ​នៅ​ឆ្នាំ ១៩៩៥ គាត់​បាន​ជួប​អូ​ឡេ​ណាតាម​ផ្លូវ ហើយ​បាន​សុំ​ខ្ចី​កាស្សែត​វីដេអូ​ដែល​នាង​កំពុង​កាន់ បើទោះបីជា​បាន​មើល​ខ្សែភាពយន្ត​នោះ ៨ ដង​រួច​ហើយ​ក៏​ដោយ ដើម្បី​បាន​លេស​សុំ​លេខ​ទូរស័ព្ទ​នាង ដូច្នេះ​គាត់​អាច​សង​កាស្សែត​ទៅ​នាង​វិញ​។ មនោសញ្ចេតនា​បាន​រីកដុះដាល ដោយ​លោក​វ៉ូ​ឡូ​ឌី​មៀរ​ពណ៌នា​ថា​គាត់ “​ធ្លាក់​ក្នុង​អន្លង់​ស្នេហ៍​យ៉ាង​ជ្រាលជ្រៅ​ងើប​វិញ​មិន​រួច​”​។​

​ដោយ​សុបិន​ចង់​ចាប់​អាជីព​ជា​តារា​កំប្លែង​នៅ​ឆ្នាំ ១៩៩៧ គាត់​បាន​បង្កើត​ក្រុមហ៊ុន​ផលិតកម្ម Kvartal 95 ដោយ​ជ្រើសរើស​លោក​ស្រី​អូ​ឡេ​ណា​ជា​អ្នកនិពន្ធ​។ គោលបំណង​របស់​ក្រុមហ៊ុន​គឺ​ផលិត​កំប្លែង​ចម្អក​ដាក់​ពួក​អ្នកនយោបាយ វាយ​សំពង​អំពើពុករលួយ​ក្នុង​ប្រទេស​អ៊ុ​យក្រែន ហើយ​គូស្នេហ៍​នេះ​បាន​ចំណាយ​ពេល​ឆ្នាំ​ចុងក្រោយ​របស់​ពួកគេ​នៅ​សាកលវិទ្យាល័យ​បង្កើត​ស្គ្រីប​កំប្លែង​រួមគ្នា​។​

​ផលិតកម្ម Kvartal 95 បាន​រីកចម្រើន​យ៉ាង​ឆាប់រហ័ស ដោយ​ប្រមូលផ្តុំ​មិត្តភក្តិ​និង​សហការី​បាន​រាប់រយ​នាក់​។ ក្រោយ​ធ្វើដំណើរ​ទូទាំង​ប្រទេស​អ៊ុ​យក្រែន និង​បណ្តា​ប្រទេស​អតីត​សហភាពសូវៀត​ផ្សេងទៀត​ដើម្បី​សម្តែង​កំប្លែង គូស្នេហ៍​នេះ​បាន​រៀបការ​នៅ​ខែ​កញ្ញា ឆ្នាំ ២០០៣ ។​

​កូនស្រី​របស់​ពួកគេ​ដែល​បច្ចុប្បន្ន​មាន​អាយុ ១៧ ឆ្នាំ​បាន​កើត​នៅ​ខែ​កក្កដា​ឆ្នាំ​២០០៤ ហើយ​គូស្នេហ៍​ទាំងពីរ​បាន​ផ្លាស់​ទៅ​រដ្ឋធានី​គៀវ​។​

​នៅ​អំឡុង​គ្រា​នោះ លោក​ហ្សេ​លេន​ស្គី​បានចាប់ផ្តើម​សម្តែង​ក្នុង​រឿង​ភាគ​ទូរទស្សន៍ ដោយ​បាន​បង្ហាញខ្លួន​នៅក្នុង​រដូវ​កាល​ដំបូង​រឿង​ភាគ​អ៊ុ​យក្រែន Dancing With The Stars ។​

​នៅពេល​អាជីព​សម្តែង​របស់​គាត់​រះ​ត្រដែត​ឡើង វា​ហាក់ដូចជា​លោកស្រី​ចាប់​ស្រ​អាប់រស្មី​។ ថ្មីៗ​នេះ លោកស្រី​បាន​រំលឹកថា “​មាន​ពេល​មួយ​ខ្ញុំ​ត្រូវ​ថយ​ចេញ​ឆ្ងាយ ព្រោះ​គាត់​តែងតែ​ងប់​នឹង​ការងារ​”​។​

“​ហើយ​នៅពេល​ដែល​វា​ជា​ការងារ​ច្នៃប្រឌិត​ហើយ​មាន​មនុស្ស​គួរឱ្យ​ចាប់អារម្មណ៍​ជា​ច្រើន​នៅ​ជុំវិញ​នោះ អ្នក​ដឹង​ថា​ប្រហែលជា​ឥឡូវ​នេះ​អ្នក​មិនសូវ​ចាប់អារម្មណ៍​ចំពោះ​គាត់​ដូច​មុន​ទៀត​ទេ​។ …​អរគុណ​ព្រះ​ជា​ម្ចាស់​ដែល​គាត់​និង​ខ្ញុំ​មាន​ការអត់ធ្មត់​គ្រប់គ្រាន់ ហើយ​អ្វីៗ​ដំណើរការ​ទៅ​ដោយ​រលូន​គ្រប់គ្រាន់​”​។​

​ទន្ទឹមនឹងនោះ ក្រៅពី​តស៊ូ​ដើម្បី​ការពារ​អាពាហ៍ពិពាហ៍ អ្នក​ទាំង​ពីរ​បាន​បង្ហាញ​នូវ​អារម្មណ៍​មិន​សប្បាយចិត្ត​កាន់តែ​ខ្លាំង​ឡើង​ចំពោះ​ការឈឺចាប់​របស់​ប្រជាជន​អ៊ុ​យក្រែន​។ ជាមួយនឹង​ការតែងតាំង​មហាសេដ្ឋី ប៉េ​ត្រូ ផូ​រ៉ូ​សិន​កូ (Petro Poroshenko) ជា​ប្រធានាធិបតី​ក្នុង​ឆ្នាំ ២០១៤ លោកស្រី​បាន​និយាយថា​ប្រទេស​នេះ​កាន់តែ​ផ្តាច់ការ​ទៅៗ ដោយ​បន្ថែម​ថា “​នោះ​ហើយ​ជា​ពេល​ដែល​យើង​សម្រេច​ចិត្ត​ធ្វើ​អ្វីមួយ​ដើម្បី​សង្គ្រោះ​លទ្ធិប្រជាធិបតេយ្យ​របស់​យើង​ឡើងវិញ​”​។​

“​នៅពេល​ដែល​ប៉ុស្តិ៍​ទូរទស្សន៍​ធ្លាក់​ក្រោម​ការគ្រប់គ្រង​របស់​ថ្នាក់ដឹកនាំ យើង​បានដឹង​ថា ប្រសិនបើ​យើង​មិន​ធ្វើ​សកម្មភាព​ទេ យើង​នឹង​បញ្ចប់​ក្នុង​ស្ថានភាព​ដូចគ្នា​ជាមួយ​រុស្ស៊ី​”​។​

​អ្នក​ទាំង​ពីរ​ខូចចិត្ត​ជា​ខ្លាំង​នៅពេល​ដែល​ពួក​បំបែក​ខ្លួន​ដែល​គាំទ្រ​ដោយ​រុស្ស៊ី​បាន​ចាប់ផ្តើម​ធ្វើ​សង្គ្រាម​ដើម្បី​កាត់​យក​ឧបទ្វីប​គ្រី​មេនៅ​ឆ្នាំនោះ ពោលគឺ​មួយឆ្នាំ​គត់​បន្ទាប់ពី​កូនប្រុស​របស់​អ្នក​ទាំង​ពីរ​បាន​ប្រសូត ដែល​ឥឡូវនេះ​រូបគេ​មាន​អាយុ ៩ ឆ្នាំ​។​

​លោកស្រី​អូ​ឡេ​ណា​បាន​និយាយថា “​វ៉ូ​ឡូ​ឌី​មៀរ​បានមក​ផ្ទះ ហើយ​សម្លឹង​មើល​កូនៗ​របស់​យើង​ជាមួយ​កែវភ្នែក​សោកសៅ​។ ខ្ញុំ​បាន​សុំ​ឱ្យ​គាត់​ស្ងប់​អារម្មណ៍​។ យើង​ត្រូវធ្វើ​អ្វី​មួយ​អំពី​វា​”​។​

​ចាប់ពី​ឆ្នាំ ២០១៥ មក លោក​វ៉ូ​ឡូ​ឌី​មៀរ​បាន​សម្តែង​ក្នុង​រឿង​ភាគ​ទូរទស្សន៍ “​អ្នក​បម្រើ​ប្រជាជន​” (Servant Of The People) ដែល​ក្នុងនោះ​គាត់​បាន​ដើរតួ​ជា​គ្រូបង្រៀន​ប្រវត្តិសាស្ត្រ​ឈ្មោះ ហូ​ឡូ​បូ​រ៉ូដ​កូ (Holoborodko) ដែល​បាន​ជាប់ឆ្នោត​ជា​ប្រធានាធិបតី​ដោយ​មិន​នឹកស្មាន​ដល់ បន្ទាប់​ពី​វីដេអូ​ឃ្លីប​មួយ​បាន​ល្បី​ពេញ​អ៊ី​ន​ធឺ​ណេត​។ ទាំង​លោកផូ​រ៉ូ​សិន​កូនិង​លោកពូទីន​គឺជា​គោលដៅ​នៃ​ការ​តិះដៀល​ក្នុង​រឿង​ភាគ​នេះ​។​

​លោកស្រី​អូ​ឡេ​ណា​បាន​ស្នាក់នៅ​ផ្ទះ​ខណៈពេ​ល​ដែល​លោក​វ៉ូ​ឡូ​ឌី​មៀរ​ចេញ​ទៅ​សម្តែង​សម្រាប់​ទាហាន​នៅ​ខ្សែត្រៀម​ជួរមុខ​។ ការសម្តែង “​គឺ​សរសេរ​ចេញ​ពី​បេះ​ដូង​”​ប៉ុន្តែ​យ៉ាងណា​ក៏ដោយ​វា​បាន​ធ្វើឱ្យ​ជីវិត​​គ្រួសារ​របស់​លោកស្រី​ជួប​គ្រោះថ្នាក់​។ បន្ទាប់​ពី​គំនូរព្រាង​អំពី​មេដឹកនាំ​ឆេច​ឈ្នី​លោក រ៉ា​មហ្សា​ន កា​ឌី​រ៉ូវ (Ramzan Kadyrov) ស្រក់​ទឹកភ្នែក បាន​នាំឱ្យ​មាន​ការ​គំរាម​សម្លាប់​ប្តី​ប្រពន្ធ​ទាំង​ពីរ​​បាន​ជួល​សន្តិសុខ​ការពារ​ខ្លួន​។​

​នៅ​ទីបំផុត លោកស្រី​អូ​ឡេ​ណា​មិន​បាន​ទទួលយក​ការការពារ​ខ្លួន​ទេ ប៉ុន្តែ​ផ្តល់​អង្គរក្ស​សម្រាប់​ការពារ​កូនៗ​។​

​នៅពេល​ផលិតកម្ម Kvartal 95 បាន​បង្កើត​គណបក្ស​នយោបាយ​មួយ​ដែល​មានឈ្មោះ​ថា “​អ្នក​បម្រើ​ប្រជាជន​” (Servant Of The People) ក្នុង​ឆ្នាំ​២០១៧ វា​គឺ​មាន​គោលបំណង​បញ្ឈប់​អ្នកដទៃ​កុំឱ្យ​ប្រើ​ឈ្មោះ​នេះ​ក្នុង​គោលបំណង “​នយោបាយ​ឃោរឃៅ​” ប៉ុន្តែ​បាន​ក្លាយជា​គូប្រជែង​ពិតប្រាកដ​យ៉ាង​ឆាប់រហ័ស​។ ដើមឡើយ លោកស្រី​អូ​ឡេ​ណា​បាន​ប្រឆាំង​ដាច់ខាត​ចំពោះ​មហិច្ឆិតា​នយោបាយ​របស់​ស្វាមី​លោកស្រី ពីព្រោះ “​អ្វីៗ​គ្រប់យ៉ាង​នឹង​ផ្លាស់ប្តូរ​”​។​

​លោកស្រី​បាន​និយាយថា លោកស្រី​ទើបតែ​បានដឹង​ថា​ស្វាមី​ឈរឈ្មោះ​ជា​ប្រធានាធិបតី​ពេលដែល​បាន​អាន​ដំណឹង​នេះ​នៅលើ​បណ្តាញ​សង្គម​ប៉ុណ្ណោះ ព្រោះ​ស្វាមី​ភ្លេច​ប្រាប់​លោក​ស្រី ប៉ុន្តែ​បាន​បន្ថែមថា “​យើង​បាន​ពិភាក្សា​គ្នា​ជា​យូរ​មក​ហើយ ហើយ​ខ្ញុំ​បាន​និយាយថា ខ្ញុំ​នឹង​គាំទ្រ​គាត់​ជានិច្ច​”​។

​កូនប្រុស​របស់​ពួកគេ​ដែល​ពេលនោះ​មាន​អាយុ​៦​ឆ្នាំ​មាន​អារម្មណ៍​បាក់​ទឹកចិត្ត​ចំពោះ​អាជីព​ថ្មី​របស់​ឪពុក​។ កូនប្រុស​បារម្ភ​ខ្លាច​គាត់​មិន​អាច​លេង​កីឡា​ជាមួយ​ខ្លួន​បាន​តទៅទៀត ខណៈ​កូនស្រី​របស់​ពួកគេ​កើត​ជំងឺ​ថប់​បារម្ភ​។​

​លោកស្រី​អូ​ឡេ​ណា​បាន​សារភាព​ថា “​កូនស្រី​មិន​ចង់​ឱ្យ​ឪពុក​នាង​ក្លាយ​ជា​អ្នកតំណាង​ឥស្សរជន​នយោបាយ​ដូច​ដែល​នាង​បាន​ឃើញ​នៅ​លើ​កញ្ចក់​ទូរទស្សន៍​ទេ​”​។​

“​នាង​យំ​ហើយ​និយាយ​ថា តើ​ខ្ញុំ​អាច​ទៅ​សាលារៀន​បាន​ដោយ​របៀប​ណា តើ​ពួកគេ​នឹង​និយាយ​អ្វី​ប្រាប់​ខ្ញុំ​? ប៉ុន្តែ អរគុណ​ព្រះ​ដែល​ស្ថានភាព​នៅ​សាលា​រឿង​គឺ​ធម្មតា​។ មាន​អ្នក​ឡែបខាយ​បន្តិច​ដែរ ប៉ុន្តែ​នោះ​ជា​រឿង​ធម្មតា​ទេ​”៕

​រឿងរ៉ាវ​ស្នេហា​របស់​លោក​ហ្សេ​លេន​ស្គី​និង​លោកស្រី​អូ​ឡេ​ណា​កំពុង​ទទួល​ការចាប់អារម្មណ៍​ជុំវិញ​ពិភពលោក​