​ប្រែ​សម្រួល : កញ្ញា​ដា​លី​ស (The Drive) ៖ ជម្លោះ​ក្នុង​ប្រទេស​អ៊ុយ​ក្រែន​កំពុង​ក្លាយ​ជា​ការបង្ហាញ​ពី​ប្រភេទ​អាវុធ​ថ្មើរជើង​របស់​បរទេស​យ៉ាង​ឆាប់រហ័ស​ជា​ពិសេស​ប្រព័ន្ធ​អាវុធ​ប្រឆាំង​យន្តហោះ​​និង​ប្រឆាំង​រថក្រោះ​លី​លើ​ស្មា​ជាច្រើន​ប្រភេទ​។ ការពិភាក្សា​ជា​បន្តបន្ទាប់​អំពី​ការដឹកជញ្ជូន​ជំនួយ​យោធា​ទាំងនេះ​បាន​លប់​ជិតឈឹង​នូវ​ការប្រើប្រាស់​អាវុធ​ផលិត​ក្នុងស្រុក​របស់​កងកម្លាំង​អ៊ុ​យក្រែន ដែល​ភាគច្រើន​មិន​ដែល​ស្គាល់​នៅ​ក្រៅប្រទេស​។ នេះ​រួម​បញ្ចូល​ទាំង​កាំភ្លើង​វែង ដែល​គេ​ស្គាល់​ជា​ទូទៅ​ថា ម៉ល់​យុក​(Malyuk) ដែល​កំពុង​ប្រើប្រាស់​យ៉ាង​ខ្លាំងក្លា​ដោយ​អង្គភាព​កងកម្លាំង​ប្រតិបត្តិ​​ការ​ពិសេស​របស់​អ៊ុយ​ក្រែន​ក្នុងចំណោម​កាំភ្លើង​ផ្សេងទៀត​។​

Malyuk ជា​ពាក្យ​អ៊ុ​យក្រែន បកប្រែ​ថា “​ទារក​” ឬ “​កូន​ង៉ែត​” ជា​ភាសា​អង់គ្លេស តាម​ពិត​គឺ​ជា​ឈ្មោះ​ដែល​បាន​ដាក់​ឱ្យ​កាំភ្លើង​គំរូ​មួយ​នេះ ដែល​ក្រុមហ៊ុន​ឈ្មោះ InterProInvest (IPI) បានដាក់​បង្ហាញ​ជា​លើក​ដំបូង​ក្នុង​ឆ្នាំ ២០១៥​។ ក្រុមហ៊ុន​បច្ចុប្បន្ន​កំពុង​ធ្វើ​ទីផ្សារ​កាំភ្លើង​នេះ​ក្រោម​ឈ្មោះ​ថាវុ​លកង់​( Vulcan) ឬ Vulcan-M ប៉ុន្តែ​គេ​នៅតែ​ចូលចិត្ត​ហៅ​ឈ្មោះ​ដើម​របស់​វា​ជាង​។​

Mayluk មិនមែន​ជា​កាំភ្លើង​រចនា​ថ្មី​ទាំង​ស្រុង​នោះទេ​។ វា​ជា​ស៊េរី​កាំភ្លើង AK ស្ដង់ដារ ដែល​វេច​ខ្ចប់​ឡើងវិញ​នៅក្នុង​តួ​ថ្មី ដែល​ចេញ​ជា​កាំភ្លើង​ថ្មី​មាន​ដង​កាណុង​ប្រវែង ១៦,៣ អ៊ី​ញ​មាន​ប្រវែង​តួខ្លួន​​សរុប​ប្រហែល ២៨ អ៊ីង និង​ទម្ងន់​ក្រោម ៣,៨ គីឡូក្រាម​ពេល​គ្មាន​គ្រាប់​។ ដូច​កាំភ្លើង​ប្រភេទ AK ផ្សេង​ដែរ កំណែ​ថ្មី​នេះ​មាន​បង់​សម្រាប់​បាញ់​គ្រាប់កាំភ្លើង​សូ​វៀត​ទំហំ ៧,៦២x៣៩​មិល្លីម៉ែត្រ និង ៥,៤៥x៣៩​មិល្លីម៉ែត្រ​ក៏ដូចជា​គ្រាប់​ស្តង់ដារ​របស់​អង្គការ​ណា​តូ ៥,៥៦x៤៥​មិល្លីម៉ែត្រ ហើយ​ពួក​វា​អាច​ប្រើ​បាន​ជាមួយ​បង់​កាំភ្លើង AK ដែល​មាន​ស្រាប់​ណាមួយ​ក៏បាន​។

​ផ្នែក​ខាងលើ​នៃ​កាំភ្លើង​ក៏​មាន​គន្លាក់​ស៊ក​ភិកខា​ធី​នី​( Picatinny) ស្តង់ដារ​អាម៉េរិក​ផងដែរ ដែល​អនុញ្ញាត​ឱ្យ​ភ្ជាប់​ឧបករណ៍​អុប​ទិ​កផ្សេងៗ​ហើយ​មាន​គន្លាក់​ស៊ក​មួយទៀត​នៅ​ពីក្រោម​ផ្នែក​ខាង​​មុខ​សម្រាប់​ភ្ជាប់​ជើង​បង្កង​បាញ់​និង​គ្រឿង​ប្រដាប់ប្រដា​ភ្ជាប់​ផ្សេងទៀត​។ កាំភ្លើង​នេះ​ក៏​មាន​គន្លាក់​ស៊ក​ផ្សេងទៀត​នៅ​សងខាង​ផងដែរ​សម្រាប់​បំពាក់​ឡាស៊ែរ​និង​ភ្លើង​ពិល ហើយ​ក្បាល​កាណុង​ត IPI ជួយ​ទប់​សំឡេង​កាំភ្លើង​កុំឱ្យ​លាន់​ខ្លាំង​។​

​អ្វី​ដែល​សំខាន់​បំផុត​អំពី​កាំភ្លើង Mayluk គឺថា​វា​មាន​កន្លែង​សម្រាប់​ដាក់​បង់គ្រាប់​នៅ​ខាងក្រោយ​កៃកាំភ្លើង​។ កាំភ្លើង​យោធា​ទំនើប​ភាគច្រើន​ដាក់​បង់​កាំភ្លើង​នៅ​ពីមុខ​កៃ​កាំភ្លើង​។

​គំនិត​ចម្បង​នៅ​ពីក្រោយ​ការដាក់​បង់គ្រាប់​នៅ​ពីក្រោយ​កៃ​បែបនេះ​គឺ​ដើម្បី​កាត់បន្ថយ​ប្រវែង​កាំភ្លើង ដោយ​ធ្វើឱ្យ​កាំភ្លើង​ងាយស្រួល​កាន់ ដោយ​មិន​ចាំបាច់​ចំណាយ​ចន្លោះ​ទំនេរ​ចោល​ទទេ​ច្រើនពេក​៕

កាំភ្លើង Malyuk កំពុង​ប្រើ​យ៉ាង​សកម្ម​ក្នុង​ជួរ​កងកម្លាំង​ពិសេស​របស់​អ៊ុ​យក្រែន