​ដោយៈ​សុផល​/ប៉ោយប៉ែត​៖ ហាង​7-Eleven បានមក​បើក​សាខា​ថ្មី​មួយទៀត​នៅក្នុង​ក្រុង​ប៉ោយប៉ែត ខេត្តបន្ទាយមានជ័យ​កាលពី​ថ្ងៃ​សុក្រ ទី​១១ ខែ​មិនា កន្លងមកនេះ បន្ទាប់ពី​ហាង 7-Eleven បាន​បើក​ដំណើរការ​សាខា​ដំបូងបង្អស់​ប្រកបដោយ​ជោគជ័យ​នៅ​ជាយក្រុង​ភ្នំពេញ កាលពី​ឆ្នាំ​២០២១​។​

​លោក Chomrom Jenchai នាយក​គ្រប់គ្រង នៃ​ក្រុមហ៊ុន CP All (Cambodia) Co., Ltd, ដែលជា​ក្រុមហ៊ុន​បុត្រ​សម្ព័ន្ធ​របស់​ក្រុមហ៊ុន CP All Public Company Limited និង​អ្នកស្រី​Phu Cherryna នាយក​ប្រតិបត្តិ​នៃ​ក្រុមហ៊ុន ANCO Group បាន​អញ្ជើញ​ចូលរួម​ជា​ភ្ញៀវ​កិ​តិ្ត​យស​ក្នុងការ​បើកសម្ពោធ​សាខា​ហាង 7-Eleven Season Mall ប៉ោយប៉ែត ដែលជា​សាខា​ថ្មី​មួយទៀត​នៅក្នុង​ប្រទេស​កម្ពុជា​។

​ហាង 7-Eleven នៅ​ក្រុង​ប៉ោយប៉ែត​នេះ មាន​ទីតាំង​ស្ថិតនៅ​ផ្សារ​ទំនើប Season Mall ជាម​ជ្ឃ​មណ្ឌល​ផ្សារ​ទំនើប​សហគមន៍​ខ្នាត​ធំ ព័ទ្ធជុំវិញ​ដោយ​អាគារ​ស្នាក់អាស្រ័យ និង​ជាម​ជ្ឃ​មណ្ឌល​ពាណិជ្ជកម្ម​ផងដែរ នៅ​ក្រុង​ប៉ោយប៉ែត​។

​លោក​Chomrom Jenchai នាយក​គ្រប់គ្រង នៃ​ក្រុមហ៊ុន CP All (Cambodia) Co. បាន​ថ្លែងថា 7-Eleven យើង​មានការ​បេ្ត​ជ្ញា​ខ្ពស់ ក្នុងការ​ចែកចាយ​ផលិតផល និង​បំរើ​សេវាកម្ម​ប្រកបដោយ​គុណភាព​ខ្ពស់​ជូន​អតិថិជន ដើម្បី​បង្កើន​នូវ​គុណភាព​ជីវិត ដោយមាន​ការជ្រើសរើស​នូវ​ផលិតផល​ជាច្រើន​ប្រភេទ និង​ការ​ប្រកាន់ខ្ជាប់​ទៅតាម​ពាក្យស្លោក​របស់​ក្រុមហ៊ុន CP All ថា​«​រួមគ្នា​ច្នៃប្រឌិត​និង​ចែករំលែក​នូវ​ឳ​កាស​អោយ​គ្នា​ទៅវិញទៅមក​” ។​

​លោក Chomrom Jenchai មានប្រសាសន៍​បន្ថែមថា “ ស្ថិតក្រោម​ការរីក​រាល​ដាល​នៃ​ជំងឺ​កូ​វីដ​-19 នេះ ហាង 7-Eleven​នៅក្នុង​ប្រទេស​កម្ពុជា​គ្រប់​សាខា​ទាំងអស់ បាន​អនុវត្ត​វិធានការ​សុខាភិបាល​យ៉ាង​តឹងរ៉ឹង​ស្របទៅតាម​វិធានការ​របស់​រដ្ឋាភិបាល​កម្ពុជា​ក្នុងការ​ទប់ស្កាត់​ការរីក​រាលដាល​នៃ​ជំងឺឆ្លង ដើម្បី​រក្សា​នូវ​សុវត្ថិភាព​ដល់​អតិថិជន និង​បុគ្គលិក​ទាំងអស់​” ។​

​បច្ចុប្បន្ននេះ ប្រទេស​កម្ពុ​ជាមាន​សាខា​ហាង 7-Eleven បើក​ឱ្យ​ដំណើរការ​ទាំងអស់​ចំនួន​៧ សាខា ក្នុងនោះ​សាខា​ដំបូង​គេ​បង្អស់​គឺ សាខា​ជ្រោយចង្វារ ដែល​បាន​បើក​ដំណើរ​នៅក្នុង​ខែសីហា ឆ្នាំ​២០២១ និង​សាខា​PTT ព្រែក​ព្នៅ សាខា​PTT ព្រៃ​កី សាខា​PTT ច្បារអំពៅ សាខា​PTT ផ្សារ​តូច សាខា Rule មហាវិថី​ព្រះមុនីវង្ស និង​សាខា​ចុងក្រោយ​គេ​បង្អស់​គឺ សាខា​ផ្សារ Season Mall ប៉ោយប៉ែត ៕Ph​