​ប្រែ​សម្រួល : កញ្ញា​ដា​លី​ស,បំណង (​ដេល្លី​ម៉េល​) ៖ សហរដ្ឋ​អាម៉េរិក​និង​ចិន​នឹង​បញ្ជូន​ជំនួយការ​កំពូល​ទៅ​ជួប​គ្នា​នៅ​ទីក្រុង​រ៉ូម​នៅ​ថ្ងៃ​ចន្ទ​ទី​១៤​មីនា​នេះ​ចំ​ពេល​មាន​ភាព​តានតឹង​កាន់តែខ្លាំង​ឡើង​រវាង​ប្រទេស​​ទាំង​ពីរ​ជុំវិញ​សង្គ្រាម​រុស្ស៊ី​-​អ៊ុ​យក្រែន និង ខណៈ​ដែល​សហរដ្ឋ​អាម៉េរិក​និយាយថា រុស្ស៊ី​បាន​ស្នើសុំ​ឧបករណ៍​យោធា​ពី​ចិន​ដើម្បី​ជួយ​ជំរុញ​យុទ្ធនាការ​របស់ខ្លួន​។​

​នៅមុន​កិច្ចចរចា ទីប្រឹក្សា​សន្តិសុខ​ជាតិ​សេត​វិមាន លោក ជេ​ក ស៊ុល​លី​វ៉ាន់ (Jake Sullivan) បាន​ព្រមាន​ចិន​យ៉ាង​បើក​ចំហ​ឱ្យ​ចៀសវាង​ជួយ​រុស្ស៊ី​ឱ្យ​គេច​ពី​ការដាក់ទណ្ឌកម្ម​របស់​ពិភពលោក ដែល​ធ្វើឱ្យ​ប៉ះពាល់​យ៉ាងខ្លាំង​ដល់​សេដ្ឋកិច្ច​រុស្ស៊ី​។ លោក​បាន​និយាយថា “​យើង​នឹង​មិន​អនុញ្ញាត​ឱ្យ​រឿង​នោះ​បន្ត​ទៅមុខ​បានឡើយ​”​។​

​ក្រុមមន្ត្រី​អាម៉េរិក​ក៏​កំពុង​ចោទប្រកាន់​ចិន​ផងដែរ​ថា​ជួយ​ផ្សព្វផ្សាយ​ព័ត៌មាន​មិន​ពិត​របស់​រុស្ស៊ី ដែល​អាច​ជា​លេស​សម្រាប់​កងកម្លាំង​របស់លោក វ្ល៉ា​ឌី​មៀរ ពូ​ទីន​វាយប្រហារ​អ៊ុយ​ក្រែន​ដោយ​អាវុធ​គីមី​​ឬ​ជីវសាស្ត្រ​។​

​ការ​លុកលុយ​របស់​រុស្ស៊ី​លើ​អ៊ុយ​ក្រែន​បាន​ធ្វើឱ្យចិន​ស្ថិតក្នុង​ទីតាំង​ផុយស្រួយ​ជាមួយនឹង​ដៃគូ​ពាណិជ្ជកម្ម​ធំ​បំផុត​ទាំង​ពីរ​គឺ​សហរដ្ឋ​អាម៉េរិក​និង​សហភាព​អឺរ៉ុប​។ ចិន​ត្រូវ​ការចូល​ទៅ​កាន់​ទីផ្សារ​ទាំងនោះ ប៉ុន្តែ​ចិន​ក៏​បាន​បង្ហាញ​ការគាំទ្រ​សម្រាប់​ទីក្រុង​មូ​ស្គូ​ផងដែរ ដោយ​បាន​ចូលរួម​ជាមួយ​រុស្ស៊ី​ក្នុង​ការប្រកាស​មិត្តភាព “​ដោយ​គ្មាន​ដែន​កំណត់​”​។​

​នៅក្នុង​កិច្ច​ពិភាក្សា​របស់​គាត់​ជាមួយ​ទីប្រឹក្សា​គោលនយោបាយ​ការបរទេស​ជាន់ខ្ពស់​របស់​ចិន​លោក យ៉ាង ជី​ឈី (Yang Jiechi)​លោក​ស៊ុល​លី​វ៉ាន់នឹង​ស្វែងរក​ការ​រឹតត្បិត​នៅក្នុង​អ្វី​ដែល​ទីក្រុង​ប៉េកាំង​​នឹង​ធ្វើ​សម្រាប់​ទីក្រុង​មូ​ស្គូ​។​

​លោក​បាន​ប្រាប់ CNN ក្នុង​បទសម្ភាសន៍​នៃ​កម្មវិធី​ព័ត៌មាន​ថ្ងៃអាទិត្យ​ថា​”​ខ្ញុំ​នឹង​មិន​អង្គុយ​នៅ​ទីនេះ​ជា​សាធារណៈ​និង​ប្រលែង​លេង​ជាមួយ​ការគំរាមកំហែង​នោះឡើយ​។​ប៉ុន្តែ​អ្វី​ដែល​ខ្ញុំ​នឹង​ប្រាប់​អ្នក​គឺ​​ថា​យើង​កំពុង​ទាក់ទង​ដោយផ្ទាល់​និង​ជា​លក្ខណៈ​ឯកជន​ទៅ​កាន់​ទីក្រុង​ប៉េកាំង​ថា ពិតជា​នឹង​មាន​ផលវិបាក ប្រសិនបើ​ចិន​ជួយ​រុស្ស៊ី​បំពេញ​ការខាតបង់​របស់​ខ្លួន​ពី​ការដាក់ទណ្ឌកម្ម​”​។​

​លោក​និយាយថា “​យើង​នឹង​មិន​អនុញ្ញាត​ឱ្យ​រឿងនេះ​បន្ត​ទៅមុខ​និង​អនុញ្ញាត​ឱ្យ​មាន​ខ្សែជីវិត​សម្រាប់​រុស្ស៊ី​ពី​ទណ្ឌកម្មសេដ្ឋកិច្ច​ទាំង​នេះ​ពី​ប្រទេស​ណាមួយ​ក្នុង​ពិភពលោក​បាន​ឡើយ​”​។​

​លោក​បាន​ប្រាប់​CNN​កាលពី​ថ្ងៃអាទិត្យ​ថា រដ្ឋាភិបាល​ក្រុង​វ៉ាស៊ីនតោន​ជឿថា​ចិន​ដឹង​ផែនការ​ខ្លះ​របស់​រុស្ស៊ី​ក្នុង​ការចូល​ឈ្លានពាន​អ៊ុយ​ក្រែន​មុន​ពេល​វា​កើត​ឡើង ទោះ​ជា​មិន​ដឹង​វា​ល្អិតល្អន់​ក្តី​។​ក្រោយ​ការ​​ឈ្លានពាន​បានចាប់ផ្តើម រុស្ស៊ី​បាន​ស្វះស្វែង​រក​គ្រឿង​សព្វាវុធ​និង​ការគាំទ្រ​ពី​ចិន​។​

​តែ​នៅពេល​សួរ​អំពី​សំណើ​របស់​រុស្ស៊ី​សំរាប់​ជំនួយ​យោធា ដែល​សារព័ត៌មាន​Financial Times​បាន​រាយការណ៍​ដំបូង​គេ លោក លីវ ប៉េង​យូ(Liu Pengyu) អ្នកនាំពាក្យ​ស្ថានទូត​ចិន​ប្រចាំ​ក្រុង​វ៉ាស៊ីនតោន​បាន​និយាយ​​ថា​«​ខ្ញុំ​មិនដែល​ឮ​រឿង​ណឹងផង​»​។​លោក​បាន​និយាយថា ចិន​មើលឃើញ​សភាពការណ៍​បច្ចុប្បន្ន​នៅ​អ៊ុ​យក្រែន​«​គួរអោយ​ព្រួយបារម្ភ​»​និង​«​យើង​គាំទ្រ​ហើយ​លើក​ទឹកចិត្ត​អោយមាន​កិច្ចខិតខំ​ស្វែងរក​​ដំណោះស្រាយ​ដោយ​អហិង្សា​មួយ​ចំពោះ​វិបត្តិ​នេះ​»​។​

​លោក​លីវ បាន​និយាយថា «​គួរ​ខិតខំ​ជា​អតិបរមា​ដើម្បី​គាំទ្រ​រុស្ស៊ី​និង​អ៊ុយ​ក្រែន​នៅក្នុង​ការ​បន្ត​កិច្ចច​រចា ទោះ​ជា​សភាពការណ៍​លំបាក​ក្នុង​ការបង្កើត​ចេញ​លទ្ធផល​ដោយ​សន្តិវិធី​មួយ​»​ក្តី​៕

​ទីប្រឹក្សា​សន្តិសុខ​ជាតិ​សេត​វិមាន លោក ជេ​ក ស៊ុល​លី​វ៉ាន់ ព្រមាន​ថា ចិន​នឹង​ជួប​ផលវិបាក​បើ​រដ្ឋាភិបាល​ក្រុង​ប៉េកាំង​ជួយ​អោយ​រុស្ស៊ី​គេច​ពី​ទណ្ឌកម្ម​។​លោក​នឹង​ជួបពិភាក្សា​ជាមួយ​មន្ត្រីជាន់ខ្ពស់​ចិន​​លោក​យ៉ាង ជី​ឈី នៅ​ថ្ងៃ​ចន្ទ​ទី​១៤​មីនា​