ដោយៈ ប​.​ខុន / ភ្នំពេញៈ ប៉ុស្តិ៍​ប៉ម ចំនួន ១២ ដែល​ឧបត្ថម្ភ​ការសាងសង់​ឡើង ដោយ​អ្នកឧកញ៉ា ទ្រី ភាព នៅលើ​ឆ្នេរសមុទ្រ ក្រុងព្រះសីហនុ ត្រូវបានធ្វើ​ពិធី​ប្រគល់ ទទួល​នៅ​ព្រឹក ថ្ងៃទី​១៤ ខែមីនា ដោយ​លោក គួច ចំរើន អភិបាលខេត្ត​ព្រះសីហនុ និង​អ្នកឧកញ៉ា ទ្រី ភាព សម្រាប់​ឆ្មាំ​សមុទ្រ ប្រើប្រាស់ ក្នុងការ​ការពារ​សុវត្ថិភាព ដល់​ភ្ញៀវ​លេង​កម្សាន្ត នៅតាម​ឆ្នេរ​។​

​លោក គួច ចំរើន អភិបាលខេត្ត​ព្រះសីហនុ បាន​មានប្រសាសន៍ នៅក្នុង​ពិធី​ប្រគល់ ទទួល ប៉ុស្តិ៍​ប៉ម​នេះ​ថាៈ ថ្ងៃនេះ យើង​ធ្វើ​ពិធី​សម្ពោធ​ដាក់ឱ្យ​ប្រើប្រាស់ ជា​ផ្លូវការ នូវ​ប៉ុស្តិ៍​យាម ឬ​ប៉ម​យាម សម្រាប់​ឆ្មាំ​សមុទ្រ​របស់​យើង នៅតាម​បណ្តោយ​ឆ្នេរសមុទ្រ ក្នុង​ក្រុងព្រះសីហនុ មាន​ចំនួន ១២ ប៉ម​។ ដោយសារ​ការខិតខំ របស់​រាជរដ្ឋាភិបាល បានសម្រេច​អនុញ្ញាត ឱ្យ​យើង​ប្រើប្រាស់ នូវ​ថវិកា សម្រាប់ធ្វើ​ការអភិវឌ្ឍ ខេត្ត​ព្រះសីហនុ​។ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​ចំណាយ​ថវិកា​យ៉ាងច្រើន ដើម្បី​កែលម្អ​ផ្លូវថ្នល់ ឆ្នេរសមុទ្រ និង​ហេដ្ឋារចនាសម្ព័ន្ធ មួយចំនួន ក្នុង​ខេត្ត​ព្រះសីហនុ ដែល​ដឹកនាំ​ស្ថាបនា ដោយ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ និង​ជា​ប្រធាន​គណៈកម្មាធិការ ជាតិ​គ្រប់គ្រង និង​អភិវឌ្ឍន៍ តំបន់ឆ្នេរ​សមុទ្រ​កម្ពុជា​។​

​លោក​អភិបាលខេត្ត បានលើកឡើង​ទៀតថាៈ យើង​បាន​បើក​ឆ្នេរសមុទ្រ​របស់​យើង ជា​លំហរ​សាធារណៈ សម្រាប់​ឱ្យ​ភ្ញៀវ​ជាតិ អន្តរជាតិ មកលេង​កម្សាន្ត​សប្បាយ​។ ពីមុន ឆ្នេរ​នេះ ត្រូវបាន​ប្រើប្រាស់ របស់​ឯកជន ពុំមាន​លំហរ​សាធារណៈ ក្រោយ​កិច្ចខិតខំ​ប្រឹងប្រែង របស់​យើង បានធ្វើឱ្យ​ឆ្នេរ​នេះ ក្លាយជា​លំហរ​សាធារណៈ មាន​ប្រវែង​ជាង ១៦ គីឡូម៉ែត្រ និង ពយ​ជាង ៤ គីឡូម៉ែត្រ​។ យើង​បានរៀបចំ ដាក់​ពោង​សុវត្ថិភាព​ដើម្បី​បែងចែក​តំបន់ សម្រាប់​អ្នក​ហែល​ទឹក​លេង ឱ្យមាន​សុវត្ថិភាព ពី​ទូក កាណូត ឬ មធ្យោបាយ​ផ្សេងៗ និង​ជា​របាំង​សុវត្ថិភាព នៅពេល​មាន​ខ្យល់ ឬ​ប្រការ​ណាមួយ​។
​ប៉ម​ទាំង ១២ នេះ ជា​អំណោយ​របស់​អ្នកឧកញ៉ា ទ្រី ភាព ជូន​ដល់​រដ្ឋបាលខេត្ត ប្រើប្រាស់ ជា​សម្បត្តិ​រួម របស់​យើងទាំងអស់គ្នា​។​

​ក្នុងឱកាស​ខាងលើ លោក គួច ចំរើន បានធ្វើ​ការណែនាំ ដល់​បងប្អូន​ឆ្មាំ​សមុទ្រ ត្រូវ​ប្រើប្រាស់​ប៉ម ឱ្យបាន​ត្រឹមត្រូវ ដោយ​ឆ្មាំ​ម្នាក់ៗ ត្រូវមាន​កញ្ចែ មេក្រូ និង​សម្ភារៈ មួយចំនួនទៀត ដើម្បី​ផ្តល់ព័ត៌មាន និង​ជួយសង្គ្រោះ ដល់​អ្នកទេសចរ មកលេង​ទឹក ក្នុងករណី​មាន​ឧប្បត្តិហេតុ ចៃដន្យ​ណាមួយ​។​

​នៅក្នុង​ពិធី​ប្រគល់​ទទួល​ប៉ុស្តិ៍​នេះ អ្នកឧកញ៉ា ទ្រី ភាព ក៏បាន​នាំយក​ថវិកា​សម្តេច​តេ​ជោ និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ឧបត្ថម្ភ​ជូន បុគ្គលិក​សម្អាត​ឆ្នេរ និង​ឆ្មាំ​សមុទ្រ ចំនួន ៧៥ នាក់ ដោយ​ម្នាក់ៗ ទទួលបាន​ថវិកា ១០ ម៉ឺន​រៀល​៕/V​