ប្រែ​សម្រួលៈ​បំណង​(​ដេល្លី​ម៉េល​)៖ កងទ័ពអាកាស​តៃវ៉ាន់​បាន​និយាយថា យន្តហោះ​មី​រ៉ា​ច ២០០០ (Mirage 2000 )​ផលិត​នៅ​បារាំង​បាន​ធ្លាក់​នៅ​ឯនាយ​ឆ្នេរ​ខាងកើត​របស់​កោះ តែ​អាកាសយានិក​​ត្រូវ​បាន​ជួយ​សង្គ្រោះ​ក្រោយ​ចុច​គន្លឹះ​លោត​ឆត្រយោង​ចេញ​ដោយ​សុវត្ថិភាព​កាលពី​ព្រឹក​ថ្ងៃ​ចន្ទ​។​

​កងទ័ពអាកាស​បាន​និយាយថា វរសេនីយ៍ទោ ហួ​ង ជុង​-​កាយ​(Huang Chung-kai)​បាន​ចុច​គន្លឹះ​លោត​ឆត្រយោង​ចេញពី​យន្តហោះ​នៅ​ម៉ោង​ប្រមាណ​១១​កន្លះ​ព្រឹក​ក្រោយ​រាយការណ៍​បញ្ហា​ម៉ាស៊ីន​។​​ហួង​បាន​ចេញដំណើរ​ប្រមាណ​មួយ​ម៉ោង​មុន​ចេញពី​មូលដ្ឋានទ័ព​អាកស​តៃទុង​(Taitung)​ក្នុង​បេសកកម្ម​ហ្វឹកហាត់​ធម្មតា ។​លោក​ត្រូវបាន​ឧទ្ធម្ភាគចក្រ​សង្គ្រោះ​ស្រង់​ចេញពី​ទឹក​។​

​សូមបញ្ជាក់​ថា កងទ័ពអាកាស​តៃវ៉ាន់​មាន​បញ្ហា​គ្រឿង​បរិក្ខា​ចាស់​និង​ពិបាក​រក​ទិញ​គ្រឿងបន្លាស់​ចំ​ពេល​ចិន​ព្យាយាម​ដាក់​កោះ​សេរីនិយម​នេះ​អោយ​នៅ​ឯកោ​និង​អាច​ប្រើ​កម្លាំង​ទ័ព​វាយយក​ក្នុងករណី​​ចាំបាច់​។​

​តៃវ៉ាន់​កំពុង​ដំណើរការ​យន្តហោះ​Mirage 2000​ចំនួន​៥៥​គ្រឿង រួម​ជាមួយ​យន្តហោះ​ផលិត​នៅ​អាម៉េរិក​F-16​ចំនួន​១៤០​គ្រឿង និង​យន្តហោះ​ប្រយុទ្ធ​IDF​ផលិត​ក្នុងស្រុក​ចំនួន​១២៩​គ្រឿង​។​

​ជាមួយនឹង​បញ្ហា​អាយុកាល​ចាស់ យន្តហោះ​ប្រយុទ្ធ​តៃវ៉ាន់​ក៏​ខូច​សឹក​រិល​ដោយសារតែ​ចេញ​ទៅ​ស្ទាក់​ដេញ​យន្តហោះ​ប្រយុទ្ធ​ចិន​ញឹកញាប់​ពេក​នៅក្នុង​តំបន់​ការពារ​ដែនអាកាស​តៃវ៉ាន់​ដែល​ចិន​ប៉េកាំង​ថា​ស្ថិត​​ក្នុង​ដែន​អធិបតេយ្យ​របស់ខ្លួន​៕

​យន្តហោះ​Mirage 2000​ចេញដំណើរ​ពី​ផ្លូវ​ហាយវ៉េ​តៃវ៉ាន់​មួយ​ក្នុងអំឡុងពេល​ហ្វឹកហាត់​ចុះ​ឡើង​លើ​ផ្លូវថ្នល់​កាលពី​ឆ្នាំ​២០១៤