ដោយៈ​សុផល​/​ភ្នំពេញ​:​តំបន់​ប្រវត្តិសាស្ត្រ​ដើម​ពោធិ៍ ទុំ​ទាវ នឹងត្រូវ​រៀបចំ​អភិវឌ្ឍន៍ កែលម្អ ជា​រមណីយដ្ឋាន​ប្រវត្តិសាស្ត្រ ទាក់ទាញ​ភ្ញៀវទេសចរ​ជាតិ និង​អន្តរជាតិ​។​នេះ​បើតាម​ប្រភព​រដ្ឋបាលខេត្ត​ត្បូងឃ្មុំ កាលពី​ថ្ងៃទី​១៤ ខែមីនា​។

​រដ្ឋបាលខេត្ត​ត្បួ​ង​ឃ្មុំ​បានឱ្យដឹងថា លោក​បណ្ឌិត ជាម ច័ន្ទ​សោភ័ណ អភិបាលខេត្ត​ត្បូងឃ្មុំ និង​លោកស្រី ម៉េង វ៉ាន់ដា​នី​ន កាលពី​ចុង​សប្តាហ៍​កន្លងទៅនេះ បាន​ដឹកនាំ​មន្ត្រី​ជំនាញ​ចុះ​ពិនិត្យ សិក្សា​អំពី​ទីតាំង​ប្រវត្តិសាស្ត្រ​ដើម​ពោធិ៍​ទុំ​ទាវ ស្ថិតនៅ​ភូមិ​ជើង​ខាល ឃុំ​មង់​រៀវ ស្រុក​ត្បូងឃ្មុំ ខេត្ត​ត្បូងឃ្មុំ​។​

​ក្នុងឱកាស​នោះ​លោក​អភិបាលខេត្ត បាន​ណែនាំ​ដល់​មន្ត្រី​ជំនាញ​ទាំងអស់ ត្រូវ​សិក្សា​រៀបចំ​ទីតាំង​ប្រវត្តិសាស្ត្រ​មួយ​នេះ ឱ្យក្លាយ​ទៅជា​តំបន់​ទេសចរណ៍​ប្រវត្តិសាស្ត្រ​សម្រាប់​ប្រជាពលរដ្ឋ​មក​ទស្សនា​កម្សាន្ត និង​សិក្សា​ពី​ប្រវត្តិសាស្ត្រ ទាំង​ភ្ញៀវ​ជាតិ និង​អន្តរជាតិ​។ ជំហាន​ដំបូង​ត្រូវ​សិក្សា​ធ្វើ​របង​ព័ទ្ធជុំវិញ និង​ដាំ​កូនឈើ​បន្ថែម​លើ​បរិវេណ​ដើម​ពោធិ៍​ប្រវត្តិសាស្ត្រ​មួយ​នេះ ក្នុងនោះ​ក៏ត្រូវ​រៀបចំ​ឱ្យមាន​បង្គន់​អនាម័យ​ផងដែរ​។​

​លោក​បណ្ឌិត ជាម ច័ន្ទ​សោភ័ណ មានប្រសាសន៍​បន្តថា ទីតាំង​ប្រវត្តិសាស្ត្រ​ដើម​ពោធិ៍​ទុំ​ទាវ​នេះ គឺជា​ទីតាំង​ប្រវត្តិសាស្ត្រ​ដ៏​ទាក់ទាញ​មួយ​សម្រាប់​ភ្ញៀវទេសចរ​ជាតិ​អន្តរជាតិ​.​ប៉ុន្តែ​ដោយ​កន្លងមក​យើង​មិនទាន់​បានរៀបចំ​ឱ្យមាន​សោភ័ណ​ភាពល្អ​ហើយ​ម្យ៉ាង​ភ្ញៀវទេសចរ​មួយចំនួន​មិន​ស្គាល់​ទីតាំង​ច្បាស់លាស់​ផង​នោះ​ទើប​ធ្វើឱ្យ​តំបន់​ទេសចរណ៍​ប្រវត្តិសាស្ត្រ​មួយ​នេះ​ត្រូវបាន​មើលរំលង​។​ប៉ុន្តែ​ចាប់ពីពេលនេះ​តទៅ​អាជ្ញាធរខេត្ត​នឹង​រៀបចំ​តំបន់​ប្រវត្តិសាស្ត្រ​មួយ​នេះ​ឱ្យក្លាយ​ទៅជា​តំបន់​ដ៏​ទាក់ទាញ​សម្រាប់​ភ្ញៀវទេសចរ​ជាតិ​អន្តរជាតិ​ចូលមក​ទស្សនា​កម្សាន្ត និង​ស្គា​ល់ពី​ប្រវត្តិសាស្ត្រ​ទុំ​ទាវ​។​

​គួរ​បញ្ជាក់ថា កាលពីពេល​កន្លងទៅ​ថ្មីៗ​នេះ ដើម​ពោធិ៍​ក្នុង​តំបន់​ប្រវត្តិសាស្ត្រ​ទុំ​ទាវ​ដ៏​ធំ​មួយ ដែល​គេ​ឱ្យ​ឈ្មោះថា ដើម​ពោធិ៍​អ្នកតា​ក្រហម​-​ក ត្រូវបាន​ខ្យល់​កន្ត្រាក់​បោក​ដួលរលំ ហើយ​ត្រូវបាន​អាជ្ញាធរខេត្ត​រៀបចំ​ដាំ​ឡើងវិញ​។ ក្រោយ​ការដួលរលំ​ដើម​ពោធិ៍​ដ៏​ធំ​មួយ​នេះ តំបន់​ប្រវត្តិសាស្ត្រ​ទុំ​ទាវ ត្រូវបាន​ប្រជាពលរដ្ឋ​មានការ​ចាប់អារម្មណ៍​ចង់ឃើញ និង​ស្គាល់ ដោយបាន​ចូលទៅ​ទស្សនា​ជា​បន្តបន្ទាប់ ពិសេស​ប្រជាពលរដ្ឋ​ពី​បណ្ដា​ខេត្ត​នានា​៕srn​