​ប្រែ​សម្រួលៈ​បំណង​(​ដេល្លី​ម៉េល​)៖ កិច្ចពិភាក្សា​ជុំ​ទី​៤ រវាង​រុស្ស៊ី​និង​អ៊ុយ​ក្រែន​នៅ​ថ្ងៃ​ចន្ទទី​១៤​មីនា​នេះ​នឹង​ផ្តោត​លើ​បទ​ឈប់​បាញ់​មួយ ការដក​ទ័ព​និង​ការធានា​សន្តិសុខសំរាប់​អ៊ុ​យក្រែន នេះ​បើ​តាម​អ្នក​​ចរចា​អ៊ុយ​ក្រែនលោក មី​ហៃ​ឡូ ប៉ូ​ដូលី​យ៉ាក​(Mykhailo Podolyak)​បានបញ្ជាក់ ។​

​លោក​បាន​និយាយ​ក្នុង​បណ្តាញ​សង្គម​ថា គោលជំហរ​របស់​អ៊ុយ​ក្រែន​មិន​ផ្លាស់ប្តូរ គឺ​ទាមទារ​អោយ​មាន​បទ​ឈប់​បាញ់​មួយ​មុន​កិច្ច​ពិភាក្សា​ស្តីពី​ទំនាក់ទំនង​នាពេល​អនាគត​អាច​កើតឡើង​។​«​ការចរចា​ ជុំ​ទី​៤ ផ្តោត​លើ​សន្តិភាព បទ​ឈប់​បាញ់ ការដក​ទាហាន​បន្ទាន់​…​និង​ការធានា​សន្តិសុខ​។​វា​ជា​ការពិភាក្សា​ដ៏​លំបាក​»​។​

​នៅពេល​កិច្ចពិភាក្សា​ជុំ​ទី​៤​ហៀបនឹង​កើតឡើង ការប្រយុទ្ធ​គ្នា​នៅ​បន្ត​តាម​ជាយក្រុង​គៀវ​នៅ​ភាគ​ខាងលិច ខាងកើត​និង​ភាគ​ឦសាន នេះ​បើ​តាម​ការិយាល័យ​ប្រធានាធិបតី​អ៊ុយ​ក្រែន​បាន​បញ្ជាក់​​កាលពី​ថ្ងៃ​ចន្ទ ។​ពួក​មន្ត្រី​តំបន់​ក៏​ត្រៀម​ការជម្លៀស​មនុស្ស​បន្ថែម​ចេញពី​តំបន់​គោលដៅ​វាយប្រហារ​។​

​សម្លេង​ព្រមាន​អំពី​ការវាយប្រហារ​តាម​អាកាស​ក៏​ត្រូវបាន​គេ​ឮ​នៅក្នុង​ទីក្រុង​នានា នៅ​ពាសពេញ​ប្រទេស​កាលពី​រំលង​អធ្រាត​ថ្ងៃ​អាទិត្យ តាំង​ពី​ក្បែរ​ព្រំដែន​រុស្ស៊ី​នៅ​ខាងកើត​ដល់​តំបន់ភ្នំ​កា​ប៉ា​ស្យុង​នៅ​​ភាគ​ខាងលិច​។​

​ការវាយប្រហារ​តាម​អាកាស​ក៏​ត្រូវ​ចំ​អាគារ​មនុស្ស​រស់​នៅ​ក្បែរ​ទីក្រុង មី​កូឡាយ​(Mykolaiv) ទីក្រុង​ខា​គី​វ​(Kharkiv)​និង​ប៉ម​អង់​តែ​ន​ទូរទស្សន៍​មួយ​នៅ​តំបន់​រី​វ​ណេ​(Rivne)​។​ការផ្ទុះ​ការ​ត្រូវបាន​​គេ​ឮ​នៅ​កំពង់ផែ​សមុទ្រ​ខ្មៅ​ឃឺ​សុន (Kherson)​ដែល​កាន់កាប់​ដោយ​រុស្ស៊ី​ផងដែរ​។​

​កាលពី​យប់​ឈានចូល​ថ្ងៃ​១៤​មីនា ការវាយប្រហារ​តាម​អាកាស​ចំនួន​បី​ធ្លាក់ចំ​ទីក្រុង ឆែរ​នី​ហ៊ី​វ​(Chernihiv)​ហើយ​ភាគច្រើន​ក្នុង​ទីក្រុង​នេះ​មិន​មាន​អគ្គិសនី​សំរាប់​បើក​ម៉ាស៊ីនកំដៅ​ទេ​ដោយសា​រដាច់​​ចរន្តអគ្គិសនី​ជាច្រើន​ថ្ងៃ​មកហើយ​។​

​រដ្ឋាភិបាល​បាន​ប្រកាស​ផែនការ​បើកផ្លូវ​ជម្លៀស​មនុស្ស​និង​នាំ​ជំនួយ​មនុស្សធម៌ តែ​ការបាញ់​ផ្លោង​ជា​បន្ត​កំពុង​រារាំង​ការងារ​នេះ​៕

​ទាហាន​អ៊ុយ​ក្រែន​ក្រាប​គេច​ពី​ការបាញ់​ផ្លោង​នៅ​ក្រុង​អៀ​ពី​ន​កាលពី​ថ្ងៃ​១៣​មីនា​

​ប្រធានាធិបតី​អ៊ុយ​ក្រែន​ចុះសួរសុខទុក្ខ​ទាហាន​របួស​ដែល​កំពុង​សម្រាក​ព្យាបាល​នៅ​មន្ទីរពេទ្យក្រុង​គៀវ​កាលពី​ថ្ងៃ​១៣​មីនា​

​ក្រុង​ម៉ា​រី​ប៉ូលិ​និង​គៀ​វ​រង​ការបាញើ​ផ្លោង​បំផ្លាញ​អាគារ​កាលពី​ថ្ងៃអាទិត្យ​