​ប្រែ​សម្រួល : កញ្ញា​ដា​លី​ស (BBC) ៖ ចំ​ពេល​មាន​ពពក​អ័ព្ទ​នៃ​សង្គ្រាម វា​ពិតជា​ពិបាក​ក្នុង​ការរក​ផ្លូវ​ឆ្ពោះទៅមុខ​។ ដំណឹង​ពី​សមរភូមិ ការទូត​គគ្រឹកគគ្រេង អារម្មណ៍​នៃ​ការ​សោកសៅ​និង​ការផ្លាស់​ទីលំនៅ ទាំងអស់​នេះ​អាច​លើសលប់​ទប់​មិន​ជាប់​ទេ​។ ដូច្នេះ សូម​អនុញ្ញាត​ឱ្យ​យើង​ថយក្រោយ​មួយ​ភ្លែត​សិន ហើយ​ពិចារណា​ពី​របៀប​ដែល​ជម្លោះ​នៅ​អ៊ុយ​ក្រែន​អាច​នឹង​បញ្ចប់​។

​តើ​មាន​សេណា​រី​យ៉ូ​អ្វីខ្លះ​ដែល​អ្នកនយោបាយ​និង​អ្នករៀបចំ​ផែនការ​យោធា​កំពុង​ពិនិត្យ​? មាន​មនុស្ស​តិច​ណាស់​ដែល​អាច​ទស្សន៍ទាយ​អំពី​អនាគត​ប្រកបដោយ​ទំនុកចិត្ត ប៉ុន្តែ​ខាង​ក្រោម​នេះ​គឺជា​លទ្ធផល​ដែល​អាច​មាន​មួយ​ចំនួន​។ ហើយ​លទ្ធផល​នេះ​ទៀតសោត​សុទ្ធតែ​ក្រៀមក្រំ​។​

– សង្គ្រាម​រយៈពេល​ខ្លី​

​នៅក្រោម​សេណា​រី​យ៉ូនេះ រុស្ស៊ី​បង្កើន​ប្រតិបត្តិការ​យោធា​របស់​ខ្លួន​។ នោះ​គឺ​មាន​ការវាយប្រហារ​ដោយ​កាំភ្លើង​ធំ​និង​គ្រាប់​រ៉ុក្កែត​មិន​រើសមុខ​នៅ​ទូទាំង​ប្រទេស​អ៊ុ​យក្រែន​។ កងទ័ពអាកាស​រុស្ស៊ី ដែល​ដើរតួនាទី​មិនសូវ​លេចធ្លោ​ជាងគេ​រហូត​មក​ទល់​ពេល​នេះ ចាប់ផ្តើម​ការវាយប្រហា​រ​តាម​អាកាស​ដ៏​បំផ្លិចបំផ្លាញ​។ ​ការវាយប្រហារ​តាម​អ៊ី​ន​ធឺ​ណេត​ដ៏​ធំ​វាយលុក​ពាសពេញ​អ៊ុ​យក្រែន ដោយ​ផ្តោត​លើ​ហេដ្ឋារចនាសម្ព័ន្ធ​ជាតិ​សំខាន់ៗ​។​ការផ្គត់ផ្គង់​ថាមពល​និង​បណ្តាញ​ទូរគមនាគមន៍​ត្រូវបាន​​កាត់ផ្តាច់​។ ជន​ស៊ីវិល​រាប់ពាន់​នាក់​បាន​ស្លាប់​។ ត្បិត​មាន​ការតស៊ូ​យ៉ាង​ក្លាហាន​ក៏ពិតមែន ក៏ប៉ុន្តែ​ទីក្រុង​គៀវ​នឹង​ដួលរលំ​ក្នុង​រយៈពេល​តែ​ប៉ុន្មាន​ថ្ងៃ​។

​រដ្ឋាភិបាល​ត្រូវ​បាន​ជំនួស​ដោយ​របប​អាយ៉ង​ដែល​គាំទ្រ​ទីក្រុង​មូ​ស្គូ​។ ប្រធានាធិបតី​ហ្សេ​លេន​ស្គី​ត្រូវ​គេ​ធ្វើឃាត​ឬ​ភៀសខ្លួន​ទៅ​ភាគ​ខាងលិច​អ៊ុយ​ក្រែនឬ​ក៏​រត់​ទៅ​បរទេ​ស​ដើម្បី​បង្កើត​រដ្ឋាភិបាល​និរទេស​។ ប្រធានាធិបតី​ពូ​ទីន​ប្រកាស​ពី​ជ័យជម្នះ​និង​ដក​កងកម្លាំង​មួយចំនួន ដោយ​ទុក​កម្លាំង​គ្រប់គ្រាន់​ល្មម​ដើម្បី​រក្សា​ការគ្រប់គ្រង​។​ជនភៀសខ្លួន​​រាប់ពាន់​នាក់​បន្ត​ភៀសខ្លួន​ទៅ​ភាគ​ខាងលិច​។ អ៊ុយ​ក្រែន​ចូលរួម​ជា​មួយបេឡា​រូ​ស​ក្នុងនាម​ជា​រដ្ឋ​រណប​របស់​ក្រុង​មូ​ស្គូ​។​

​លទ្ធផល​នេះ​គឺ​មិន​អាច​ទៅរួច​នោះទេ ប៉ុន្តែ​អាស្រ័យ​លើ​កត្តា​ផ្លាស់ប្តូរ​ជាច្រើន ដូចជា កងកម្លាំង​រុស្ស៊ី​ប្រយុទ្ធ​បាន​ល្អប្រសើរ​ជាង​មុន​កងកម្លាំង​ទាំងនោះ​ត្រូវបាន​ដាក់ពង្រាយ​​កាន់តែច្រើន ហើយ​ស្មារតី​ប្រយុទ្ធ​មិន​ធម្មតា​របស់​អ៊ុយ​ក្រែន​ចាប់ផ្តើម​រសាត់​។ ​លោកពូ​ទីន​អាច​សម្រេចបាន​នូវ​ការផ្លាស់ប្តូរ​របប​នៅក្នុង​ទីក្រុង​គៀវ​និង​បញ្ចប់​សមាហរណកម្ម​លោកខាងលិច​របស់​អ៊ុ​យក្រែន​។ ប៉ុន្តែ​រដ្ឋាភិបាល​ដែល​គាំទ្រ​រុស្ស៊ី​ណាមួយ​នឹងមិន​ស្រប​ច្បាប់​ទេ​ហើយ​ងាយ​រងគ្រោះ​នឹង​ការបះបោរ​។ លទ្ធផល​បែប​នេះ​នៅតែ​មិនមាន​ស្ថិរភាព ហើយ​ការរំពឹងទុក​នៃ​ជម្លោះ​ដែល​នឹង​កើតឡើង​ម្តងទៀត​គឺ​មាន​កម្រិត​ខ្ពស់​។​

– សង្គ្រាម​រយៈពេល​វែង​

​វា​ទំនងជា​វា​វិវត្ត​ទៅ​ជា​សង្គ្រាម​អូស​បន្លាយពេល​យូរ​។ កងកម្លាំង​រុស្ស៊ី​ប្រហែល​ជា​ជាប់គាំង​វ៉ៃ​លែង​ទៅមុខ រងគ្រោះ​ដោយ​ស្មារតី​ប្រយុទ្ធ​ធ្លាក់ចុះ​ទាប ខ្វះ​ភស្តុភារ និង​ខ្វះ​ថ្នាក់ដឹកនាំ​មាន​សមត្ថភាព​។ វា​ប្រហែលជា​ត្រូវការ​ពេល​យូរ​ណាស់​សម្រាប់​កងកម្លាំង​រុស្ស៊ី​ដណ្តើម​បាន​ទីក្រុង​ដូចជា​ទីក្រុង​គៀវ ដែល​ក្រុម​អ្នកការពារ​ប្រយុទ្ធ​ពី​ផ្លូវ​មួយ​ទៅ​ផ្លូវ​មួយ​ទៀត​។ ការឡោមព័ទ្ធ​ដ៏​វែង​មួយ​នឹង​កើតឡើង​។ ការប្រយុទ្ធ​គ្នា​នេះ​នឹង​មាន​សភាព​ដូច​ការតស៊ូ​ដ៏​យូរ និង​ដ៏​ឃោរឃៅ​របស់​រុស្ស៊ី​ក្នុង​ទសវត្សរ៍​ឆ្នាំ ១៩៩០​ដើម្បី​ដណ្តើមយក​និង​បំផ្លាញ​​ទីក្រុង​ហ្គ្រោ​ស្នី (Grozny) ដែល​ជា​រដ្ឋធានី​របស់​សាធារណរដ្ឋ​ឆេច​ឈ្នី (Chechnya)​។​

​ហើយ​សូម្បី​តែ​នៅពេល​ដែល​កងកម្លាំង​រុស្ស៊ី​អាច​សម្រេច​វត្តមាន​មួយចំនួន​នៅក្នុង​ទីក្រុង​នានា​របស់​អ៊ុ​យក្រែន ក៏​ប្រហែលជា​ពួកគេ​នឹង​ពិបាក​រក្សា​ការគ្រប់គ្រង​ដែរ​។​ប្រហែល​​ជា​រុស្ស៊ី​មិន​អាច​ផ្តល់​កងទ័ព​គ្រប់គ្រាន់​ដើម្បី​គ្របដណ្តប់​ប្រទេស​ដ៏​ធំ​បែប​នេះ​បាន​ទេ​។

​កងកម្លាំង​ការពារ​របស់​អ៊ុយ​ក្រែន​ប្រែ​ក្លាយទៅជា​ចលនា​បះបោ​រ​ដែល​មាន​ការលើក​ទឹកចិត្ត​និង​គាំទ្រ​ដោយ​ប្រជាជន​ក្នុងស្រុក​។ លោកខាងលិច​បន្ត​ផ្តល់​អាវុធ និង​គ្រាប់​។ ហើយ​បន្ទាប់មក ប្រហែល​ជា​ច្រើន​ឆ្នាំ​ក្រោយមក​ដោយ​មាន​ការ​ផ្លាស់ប្តូរ​ថ្នាក់​ដឹកនាំ​ថ្មី​នៅ​ទីក្រុង​មូ​ស្គូ​កងកម្លាំង​រុស្ស៊ី​នៅ​ទីបំផុត​ត្រូវ​ចាកចេញ​ពី​អ៊ុយ​ក្រែន​ទាំង​ឱនក្បាល​​និង​ហូរឈាម​ដូច​ពួក​ឈ្លានពាន​ពី​មុន​របស់​ពួកគេ​ដែល​បាន​ចាកចេញ​ពី​អា​ហ្វ​ហ្គានី​ស្ថានក្នុង​ឆ្នាំ​១៩៨៩​បន្ទាប់​ពី​ការប្រយុទ្ធប្រឆាំង​នឹង​ពួក​បះបោរ​អ៊ីស្លាម​រយៈពេល​មួយ​​ទសវត្សរ៍​។​

– សង្គ្រាម​អឺរ៉ុប​

​តើ​វា​អាចទៅរួច​ទេ ដែល​សង្គ្រាម​នេះ​អាច​ហៀរ​ចេញ​ក្រៅ​ព្រំដែន​អ៊ុ​យក្រែន​?

​លោក​ប្រធានាធិបតី​ពូ​ទីន​អាច​ស្វែងរក​ការដណ្តើមយក​មកវិញ​នូវ​ផ្នែក​ជាច្រើន​ទៀត​នៃ​អតីត​ចក្រភព​រុស្ស៊ី ដោយ​បញ្ជូន​កងទ័ព​ចូល​ទៅ​អតីត​សាធារណរដ្ឋ​សូ​វៀត​ដូចជា​ម៉ុល​​ដាវី​និង​ហ្ស​ក​ហ្ស៊ី ដែល​មិនមែន​ជា​ផ្នែក​របស់​ណា​តូ​។ ឬ​ប្រហែលជា​មាន​ការ​គណនា​ខុស​និង​ការកើនឡើង​ភាព​តានតឹង​។ លោកពូ​ទីន​អាច​ប្រកាស​ថា​ការផ្គត់ផ្គង់​សព្វាវុធ​របស់​​លោកខាងលិច​ដល់​កង​កម្លាំង​អ៊ុយ​ក្រែន​គឺ​ជា​ទង្វើ​នៃ​ការឈ្លានពាន ដែល​ត្រូវ​មាន​ការ​សងសឹក​។ គាត់​អាច​គំរាម​បញ្ជូនទាហាន​ចូលទៅ​ក្នុង​បណ្តា​រដ្ឋ​នៃ​តំបន់​បាល់​ទិកដែល​​ជា​សមាជិក​របស់​ណា​តូ ដូចជា​លី​ទុយ​អា​នី​ដើម្បី​បង្កើត​ច្រករបៀង​ដីគោក​ភ្ជាប់​ជាមួយ​ទីក្រុង​ឆ្នេរសមុទ្រ​រុស្ស៊ី​គឺ កាលី​នី​ន​ហ្គ្រា​ដ (Kaliningrad)​។​

​នេះ​នឹង​មាន​គ្រោះថ្នាក់​និង​ប្រថុយ​មាន​សង្គ្រាម​ជា​មួយ​ណា​តូ​។ នៅក្រោម​មាត្រា ៥ នៃ​ធម្មនុញ្ញ​របស់​សម្ពន្ធ​យោធា​ណា​តូ​ការវាយប្រហារ​លើ​សមាជិក​ណា​មួយ​គឺជា​ការ​វាយ​​ប្រហារ​លើ​សមាជិក​ទាំង​អស់​។ ប៉ុន្តែ​លោក​ពូ​ទីន​អាច​នឹង​ប្រថុយប្រថាន ប្រសិនបើ​គាត់​មាន​អារម្មណ៍​ថា វា​ជា​មធ្យោបាយ​តែមួយគត់​ក្នុង​ការសង្គ្រោះ​ការដឹកនាំ​របស់​គាត់​។ ប្រសិនបើ​គាត់​ប្រឈម​មុខ​នឹង​បរាជ័យ​នៅ​អ៊ុ​យក្រែន គាត់​អាច​នឹង​បង្កើន​ជម្លោះ​បន្ថែមទៀត​។ ​ឥឡូវ​នេះ​យើង​ដឹងថា​មេដឹកនាំ​រុស្ស៊ី​មាន​ឆន្ទៈ​ក្នុងការ​បំបែក​បទដ្ឋាន​អន្តរជាតិ​ដែល​មាន​ជា​យូរ​មក​ហើយ​។​ហេតុផល​ដូច​គ្នា​នេះ​អាច​ត្រូវបាន​អនុវត្ត​ចំពោះ​ការប្រើប្រាស់​​អាវុធ​នុយក្លេអ៊ែរ​ផងដែរ​។ នៅ​សប្តាហ៍​នេះ លោកពូ​ទីន​បាន​ដាក់​កម្លាំង​នុយក្លេអ៊ែរ​របស់​គាត់​ឱ្យ​ប្រុង​ជើង​ការកម្រិត​ខ្ពស់​។ ​អ្នកវិភាគ​ភាគច្រើន​ចោទ​ជា​មន្ទិល​ថា​តើ​នេះ​មានន័យថា​ការប្រើប្រាស់​នុយក្លេអ៊ែរ​ទំនង​ជា​ជិត​មក​ដល់​ឬ​យ៉ាងណា​។ ប៉ុន្តែ​វា​ជាការ​រំលឹក​មួយ​ថា គោល​លទ្ធិ​របស់​រុស្ស៊ី​អនុញ្ញាត​ឱ្យមាន​ការប្រើ​អាវុធ​នុយក្លេអ៊ែរ​យុទ្ធសាស្ត្រ​នៅ​សមរភូមិ​។​

– ដំណោះស្រាយ​ការទូត​

​ត្បិត​ផ្ទុះ​សង្គ្រាម​យ៉ាង​នេះ​ក្តី តើ​អាច​មាន​ដំណោះស្រាយ​ការទូត​កើត​ឡើង​ទេ​?

​អគ្គលេខាធិការ​អង្គការសហប្រជាជាតិ​លោក​អង់​តូ​នីញ៉ូ គូថេ​រ៉េ​ស​បាន​និយាយថា “​ឥឡូវ​កាំភ្លើង​គឺជា​អ្នក​និយាយ​ចរចា ប៉ុន្តែ​ផ្លូវ​នៃ​ការសន្ទនា​ត្រូវតែ​បើកចំហ​ជានិច្ច​” ។ ​ពិត​ណាស់​ការសន្ទនា​នៅតែ​បន្ត​។ ប្រធានាធិបតី​បារាំង​លោក​ម៉ា​ក្រុង​បាន​និយាយ​ជាមួយ​លោក​ប្រធានាធិបតី​ពូ​ទីន​តាម​ទូរស័ព្ទ​។​ក្រុម​អ្នកការទូត​និយាយ​ថា​អារម្មណ៍​ចង់​​ចរចា​ឥឡូវ​កំពុង​ទោរទន់​ទៅរក​ទីក្រុង​មូ​ស្គូ​ជាង​ពេល​ណាៗ​ទាំងអស់​។ ហើយ​អ្វី​ដែល​គួរឱ្យភ្ញាក់ផ្អើល គឺ មន្ត្រី​រុស្ស៊ី​និង​អ៊ុយ​ក្រែន​បាន​ជួបចរចា​គ្នា​នៅ​ព្រំដែន​ជាមួយ​បេឡា​រូស​។ ពួកគេ​ប្រហែលជា​មិន​បាន​បង្កើត​ការរីកចម្រើន​អ្វី​ច្រើន​មែន​។ ប៉ុន្តែ​ដោយ​យល់ព្រម​លើ​ការចរចា​នេះ លោកពូ​ទីន​ហាក់ដូចជា​បាន​ទទួលយក​លទ្ធភាព​នៃ​បទ​ឈប់​បាញ់​ដែល​បាន​ចរចា​រួចទៅហើយ​។​

​សំណួរ​សំខាន់​គឺ​ថា​តើ​លោកខាងលិច​អាច​ផ្តល់ជូន​ច្រក​ចេញពី​សង្គ្រាម​នេះ​បាន​ដែរ​ឬ​អត់​។ ក្រុម​អ្នកការទូត​និយាយថា​វា​ជា​រឿង​សំខាន់​ដែល​មេដឹកនាំ​រុស្ស៊ី​ដឹង​ពី​អ្វី​ដែល​ខ្លួន​ត្រូវ​​ការ​ដើម្បីឱ្យ​លោកខាងលិច​លុបចោល​ទណ្ឌកម្ម ដូច្នេះ​កិច្ចព្រមព្រៀង​ដើម្បី​សង្គ្រោះ​មុខមាត់​ពូ​ទីន​យ៉ាងហោចណាស់​ក៏​នៅតែ​អាច​ទៅរួច​ដែរ​។​

​ពិចារណា​លើ​សេណា​រី​យ៉ូនេះ​។ សង្គ្រាម​គឺ​កំពុង​មាន​សភាព​អាក្រក់​ខ្លាំង​ឡើង​សម្រាប់​រុស្សី​។ ការដាក់ទណ្ឌកម្ម​ចាប់ផ្តើម​ធ្វើឱ្យ​ទីក្រុង​មូ​ស្គូ​មាន​អារម្មណ៍មិនសុខ​។ ការជំទាស់​បាន​កើនឡើង​នៅពេល​ថង់​ដាក់​ធាតុ​ត្រឡប់មកផ្ទះ​វិញ​ជា​ហូរហែ​។ លោកពូ​ទីន​ប្រហែល​ជា​ឆ្ងល់​ថា​តើ​គាត់​កំពុង​រ៉ាប់រង​បន្ទុក​ធ្ងន់ធ្ងរ​ខ្លាំងពេក​ឬ​យ៉ាងណា​។ ​គាត់​អាច​វិនិច្ឆ័យ​ថា​ការបន្ត​សង្គ្រាម​អាច​ជា​ការគំរាមកំហែង​ខ្លាំង​ដល់​ការដឹកនាំ​របស់​គាត់​ជាង​ការ​អាម៉ាស់​នៃ​ការបញ្ចប់​សង្គ្រាម​។ ចិន​ធ្វើ​អន្តរាគមន៍ ដោយ​ដាក់​សម្ពាធ​លើ​ក្រុង​មូ​ស្គូឱ្យ​សម្រុះសម្រួល ដោយ​ព្រមាន​ថា​ខ្លួន​នឹង​មិន​ទិញ​ប្រេង​និង​ឧស្ម័ន​របស់​រុស្ស៊ី​ទេ លុះត្រាតែ​រុស្ស៊ី​បន្ថយ​ការវាយប្រហារ​។ ដូច្នេះ លោកពូ​ទីន​ចាប់ផ្តើម​ស្វែងរក​ច្រកចេញ​។ ​ទន្ទឹមនឹងនេះ អាជ្ញាធរ​អ៊ុយ​ក្រែន​មើល​ឃើញ​ការបន្ត​បំផ្លា​ញ​ប្រទេស​របស់​ពួកគេ​កាន់តែខ្លាំង​ហើយ​សន្និដ្ឋានថា​ការសម្របសម្រួល​ផ្នែក​នយោបាយ​អាច​ប្រសើរ​ជាង​ការបាត់​​បង់ជីវិត​ដ៏​សាហាវ​បែបនេះ​។ ដូច្នេះ​អ្នកការទូត​ចូលរួម ហើយ​កិច្ចព្រមព្រៀង​មួយ​ត្រូវ​បាន​សម្រេច​។ អ៊ុយ​ក្រែ​ននិយាយថា​ទទួលស្គាល់​អធិបតេយ្យភាព​រុស្ស៊ី​លើ​តំបន់​គ្រីមេ និង​ផ្នែក​ខ្លះ​នៃ​តំបន់​ដុន​បា។ ផ្ទុយទៅវិញ លោកពូ​ទីន​ទទួលស្គាល់​ឯករាជ្យភាព​របស់​អ៊ុយ​ក្រែ​ន​និង​សិទ្ធិ​របស់​ពួកគេ​ក្នុងការ​ធ្វើ​ទំនាក់ទំនង​កាន់តែ​ស៊ីជម្រៅ​ជាមួយ​អឺរ៉ុប​។ នេះ​ប្រហែលជា​មិន​ទំនង​កើត​ឡើង​ទេ​។ ប៉ុន្តែ​វា​ក៏​មិន​ហួស​ពី​ការពិត​ពេក​នោះដែរ​។​

– ពូ​ទីន​ត្រូវ​បាន​បណ្តេញចេញ​

​ចុះ​លោក វ្ល៉ា​ឌី​មៀរ ពូ​ទីន ខ្លួន​ឯង​វិញ​នោះ​? នៅពេល​ដែល​គាត់​ចាប់ផ្តើម​ការ​លុកលុយ គាត់​បានប្រកាសថា “​យើង​ត្រៀម​ខ្លួន​សម្រាប់​រាល់​លទ្ធផល​អស់ហើយ​”​។​

​ប៉ុន្តែ​ចុះបើ​លទ្ធផល​នោះ​គឺ​គាត់​ត្រូវ​បាត់បង់​អំណាច​? វា​ប្រហែល​មិន​អាច​នឹកស្មាន​ដល់​ទេ​។ ប៉ុន្តែ​ពិភពលោក​បាន​ផ្លាស់ប្តូរ​ក្នុង​ពេលបច្ចុប្បន្ន ហើយ​ឥឡូវ​រឿង​បែបនេះ​ត្រូវ​បាន​គិតគូ​រហើយ​។ លោក សឺ ឡ​រិន ហ្វ្រី​ដ​មែន (Sir Lawrence Freedman) ជា​សាស្ត្រាចារ្យ​នៃ​សាលាសឹក្សា​សង្គ្រាមអេ​មីរី​ទូស (Emeritus)​នៅ​សាកលវិទ្យាល័យ​​ឃី​ង​ខូលិច (Kings College)​ក្នុង​ទីក្រុង​ឡុង​ដ៍ បាន​សរសេរ​នៅ​សប្តាហ៍​នេះ​ថា “​ឥឡូវនេះ វា​ទំនងជា​នឹង​មាន​ការផ្លាស់ប្តូរ​រប​ប​នៅ​ទីក្រុង​មូ​ស្គូ ក៏ដូចជា​នៅ​ទីក្រុង​គៀវ​”​។​

​ហេតុអ្វី​បានជា​គាត់​អាច​និយាយ​បែប​នេះ​? ពិត​ហើយ​ប្រហែល​ជា​លោកពូ​ទី​ន​បាន​ធ្វើ​សង្គ្រាម​ដ៏​មហន្តរាយ​។ ទាហាន​រុស្ស៊ី​រាប់ពាន់​នាក់​បាន​ស្លាប់​។​ទណ្ឌកម្មសេដ្ឋកិច្ច​កំពុង​បង្ក​​ផលប៉ះពាល់​។ លោកពូ​ទីន​បាត់បង់​ការគាំទ្រ​ពី​ប្រជាជន​។ ប្រហែលជា​មាន​ការ​គំរាម​ធ្វើ​បដិវត្តន៍​ប្រជាជន​។ លោក​ប្រើ​កម្លាំង​សន្តិសុខ​ផ្ទៃក្នុង​របស់​រុស្ស៊ី​ដើម្បី​បង្ក្រាប​ការប្រឆាំង​នេះ​។ ប៉ុន្តែ​នេះ​ប្រែ​ទៅជា​ជូរចត់​និង​ឆ្អែតឆ្អន់​ចំពោះ​សមាជិក​យោធា ឥស្សរជន​នយោបាយ និង​សេដ្ឋកិច្ច​របស់​រុស្ស៊ី ដែល​ងាក​មក​ប្រឆាំង​នឹង​គាត់​វិញ​។ ​លោកខាងលិច​បញ្ជាក់​យ៉ាង​ច្បាស់​ថា ប្រសិនបើ​លោកពូ​ទីន​ចាកចេញ ហើយ​ត្រូវបាន​ជំនួស​ដោយ​មេដឹកនាំ​មាន​ហេតុផល​មួយ​រូប​នោះ​រុស្ស៊ី​នឹង​ឃើញ​ការដក​ទណ្ឌកម្ម​មួយ​​ចំនួន​និង​ការស្តារ​ទំនាក់ទំនង​ការទូត​ធម្មតា​ឡើងវិញ​។ វា​នឹង​មាន​រដ្ឋប្រហារ​បង្ហូរ​ឈាម​ក្នុង​វិមាន​ក្រឹម​ឡាំង​ហើយ​ពូ​ទីន​ត្រូវ​ខ្ទាត​ចេញពី​តំណែង​។ ជាថ្មី​ម្តងទៀត នេះ​ប្រហែលជា​មិន​ទំនង​កើតឡើង​ឥឡូវនេះ​ទេ​។ ប៉ុន្តែ​វា​មិនមែន​ថា​មិន​អាច​ទៅ​រួច​នោះ​ទេ ប្រសិនបើ​មនុស្ស​ដែល​ទទួលបាន​ផលប្រយោជន៍​ពី​លោក​ពូ​ទីន​លែង​ជឿ​ថា​គាត់​អាច​ការពារ​ផលប្រយោជន៍​របស់​ពួកគេ​បាន​។​

– សេចក្តីសន្និដ្ឋាន​

​សេណា​រី​យ៉ូ​ទាំងនេះ​មិន​ផ្តាច់មុខ​ទៅវិញទៅមក​នោះទេ សេណា​រី​យ៉ូ​ខ្លះ​អាច​បញ្ចូល​គ្នា​ដើម្បី​បង្កើត​លទ្ធផល​ខុសៗ​គ្នា​។ ប៉ុន្តែ​ទោះ​ជម្លោះ​នេះ​ចប់​ទៅ​យ៉ាងម៉េច​ក៏​ដោយ គឺ​ពិភពលោក​នឹង​ត្រូវ​ផ្លាស់ប្តូរ​។ ពិភពលោក​នឹង​មិន​ត្រឡប់​ទៅ​រក​ស្ថានភាព​ដដែល​ដូច​ពី​មុន​នោះ​ទេ​។ ទំនាក់ទំនង​របស់​រុស្ស៊ី​ជាមួយ​ពិភព​ខាង​ក្រៅ​នឹង​មាន​ភាពខុសគ្នា​។ ឥរិយាបថ​របស់​អឺរ៉ុប​ចំពោះ​សន្តិសុខ​នឹង​ត្រូវ​ផ្លាស់ប្តូរ​។ ហើយ​សណ្តាប់ធ្នាប់​ដែល​ផ្អែកលើ​ច្បាប់​អន្តរជាតិ សេរីនិយម​ប្រហែលជា​ទើប​តែ​រក​ឃើញ​ខ្លួន​ឯង​ឡើង​វិញ​នៅ​នឹង​​កន្លែង​ដំបូង​ដែល​វា​ត្រូវ​បាន​បង្កើតឡើង​៕