ប្រែ​សម្រួលៈ​បំណង​(ST)៖ ក្រោយ​កិច្ចពិភាក្សា​យ៉ាង​«​តានតឹង​»​កាលពី​ថ្ងៃ​ចន្ទ​ទី​១៤​មីនា អាម៉េរិក​បាន​ព្រមាន​ចិន​កុំ​អោយ​ជួយ​រដ្ឋាភិបាល​ក្រុង​មូ​ស្គូក្នុង​ការ​ធ្វើ​សង្គ្រាម​ឈ្លានពាន​អ៊ុយ​ក្រែន​នៅពេល​​បាតុកម្ម​ប្រឆាំង​សង្គ្រាម​បាន​រំខាន​ដល់​ការផ្សាយ​របស់​ទូរទស្សន៍​រដ្ឋ​រុស្ស៊ី​។​

​ទាហាន​រុស្ស៊ី​នៅ​មិនទាន់​ដណ្តើម​បាន​ទីក្រុង​ណាមួយ​ក្នុងចំណោម​ទីក្រុង​ធំៗ​ទាំង​ដប់​នៅ​អ៊ុយ​ក្រែន​ចាប់តាំងពី​ពេល​ចាប់ផ្តើ​មបើក​ប្រតិបត្តិការ​យោធា​កាលពី​ថ្ងៃ​២៤​កុម្ភៈ​។​រដ្ឋាភិបាល​ក្រុង​មូ​ស្គូ​ហៅវា​ថា​ជា​«​ប្រតិបត្តិការ​យោធា​ពិសេស​»​មួយ​ដើម្បី​ដក​ឥទ្ធិពល​ណា​ស៊ី​ចេញពី​ប្រទេស​នេះ ។​

​ជុំវិញ​សង្គ្រាម​នៅ​អ៊ុយ​ក្រែន​នេះដែរ រុស្ស៊ី​បាន​បដិសេធ​របាយការណ៍​អាម៉េរិក​ដែលថា​ខ្លួន​ស្នើសុំ​ជំនួយ​យោធា​និង​សេដ្ឋកិច្ច​ពី​រដ្ឋាភិបាល​ក្រុង​ប៉េកាំង ហើយ​ថា​រុស្ស៊ី​មាន​ប្រភព​ធនធាន​គ្រប់គ្រាន់​សំរាប់​បំពេញ​​សេចក្តីត្រូវការ​របស់​ខ្លួន​។​

​ក្រសួងការបរទេស​ចិន បាន​ហៅ​របាយការណ៍​សុំ​ជំនួយ​នេះ​ថា​ជា​«​ការផ្សព្វផ្សាយ​ព័ត៌មាន​មិន​ពិត​»​។​

​នៅពេល​ទីប្រឹក្សា​សន្តិសុខ​ជាតិ​អាម៉េរិក​លោក ជេ​ក ស៊ុល​លី​វ៉ាន បាន​ជួប​ពិ​ភក្សា​ជាមួយ​មន្ត្រី​ការទូត​កំពូល​ចិន​លោក យ៉ាង យី​ជិ នៅ​ក្រុង​រ៉ូម​កាល​ពី​ម្សិលមិញ មន្ត្រី​អាម៉េរិក​ម្នាក់​បាន​និយាយថា ចិន​បាន​​បង្ហាញ​បំណង​ផ្តល់​ជំនួយ​ទៅអោយ​រុស្ស៊ី​។​មុន​នេះ​សារព័ត៌មាន​អាម៉េរិក​ដែល​និយាយ​យោង​តាម​មន្ត្រី​អាម៉េរិក​សុំ​មិន​បញ្ចេញ​ឈ្មោះ​បាន​និយាយ​ថា​រុស្ស៊ី​បាន​ស្នើសុំ​ជំនួយ​សេដ្ឋកិច្ច​និង​យោធា​ពី​ចិន​សំរាប់​​សង្គ្រាម​អ៊ុ​យក្រែន​។​

​អ្នកនាំពាក្យ​ក្រសួងការបរទេស​អាម៉េរិក​បាន​ប្រាប់​អ្នកយក​ព័ត៌មាន​កាលពី​ថ្ងៃ​ចន្ទ​ថា «​យើង​បាន​បញ្ជាក់​ប្រាប់​រដ្ឋាភិបាល​ក្រុង​ប៉េកាំង​ច្បាស់​ហើយ​ថា យើង​មិន​អត់​ឳ​ន​អោយ​ទេ​។​យើង​នឹង​មិន​អនុញ្ញាត​​អោយ​ប្រទេស​ណាមួយ​ទូរ​ទាត់​សង​រុស្ស៊ី​ចំពោះ​ការខាតបង់​របស់ខ្លួន​»​ឡើយ​។​

​ជំនួប​ប្រាំពីរ​ម៉ោង​ត្រូវបាន​គេ​រាយការណ៍​ថា​«​តានតឹង​»​និង​បាន​ឆ្លុះបញ្ចាំង​«​ភាព​ធ្ងន់ធ្ងរ​នៃ​កាលៈទេសៈ​នេះ​»​។​

​លោកខាងលិច​កំពុង​ថ្លឹងថ្លែង​ថា​តើ​ត្រូវ​ចាត់ការ​យ៉ាងណា​ជាមួយ​ចិន​ដែលជា​អ្នក​នាំចេញ​កំពូល​លើ​សកលលោក និង​ជា​អ្នកផ្គត់ផ្គង់​ទំនិញ​ទី​មួយ​សំរាប់​អាម៉េរិក​៕