​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋមន្ត្រី​ការពារជាតិ​អាល្លឺម៉ង់​បាន​និយាយ​កាលពី​ថ្ងៃ​ចន្ទ​ទី​១៤​មីនា​ថា អាល្លឺម៉ង់​នឹង​ជំនួស​យន្តហោះ​ទម្លាក់​គ្រាប់បែក Tornado​ចាស់ៗ​មួយចំនួន​របស់​​ខ្លួន​ជាមួយ​នឹង​យន្តហោះ F-35A Lightning II ដែល​ផលិត​ដោយ​សហរដ្ឋ​អាម៉េរិក​ដែល​មាន​សមត្ថភាព​ផ្ទុក​អាវុធ​នុយក្លេអ៊ែរ​។​

​ដោយ​ប្រកាស​ពី​ការសម្រេចចិត្ត​នេះ រដ្ឋមន្ត្រី​ការពារជាតិ​លោកស្រី គ្រីស្ទី​ន ឡាំ​ប្រិច (Christine Lambrecht) បាន​និយាយថា អាល្លឺម៉ង់​ក៏​នឹង​ធ្វើឱ្យ​ប្រសើរឡើង​នូវ​យន្តហោះ​ចម្បាំង Eurofighter Typhoon របស់​ខ្លួន​សម្រាប់​សង្គ្រាម​អេឡិចត្រូនិក​ផងដែរ ជា​សមត្ថភាព​មួយ​ដែល​បច្ចុប្បន្ន​ត្រូវបាន​បំពេញ​ដោយ​យន្តហោះ Tornado ។ លោកស្រី​បាន​និយាយថា យន្តហោះ​ចម្បាំង Eurofighter នឹង​ត្រូវ​ជំនួស​ចាប់ពី​ឆ្នាំ ២០៤០ ជាមួយនឹង​ប្រព័ន្ធ​យន្តហោះ​ប្រយុទ្ធ​នាពេល​អនាគត ឬ FCAS ដែល​ត្រូវបាន​អភិវឌ្ឍ​រួមគ្នា​ជាមួយ​បារាំង​និង​អេ​ស្ប៉ា​ញ​។​

​មេបញ្ជាការ​កងទ័ពអាកាស​អាល្លឺម៉ង់​លោក អ៊ី​ន​ហ្គោ ហ្គឺហា​ត់​ស៍ (Ingo Gerhartz)​បាន​និយាយថា សង្គ្រាម​រុស្ស៊ី​នៅ​អ៊ុយ​ក្រែន​បាន​ធ្វើឱ្យ​មាន​ភាពចាំបាច់​ក្នុង​ការជ្រើសរើស​យន្តហោះ F-35​របស់​​ក្រុមហ៊ុន Lockheed Martin​។ ពី​មុន​រដ្ឋាភិបាល​បាន​ពិចារណា​ជំនួស​យន្តហោះ Tornados របស់​ក្រុមហ៊ុន Luftwaffe ជាមួយនឹង​យន្តហោះ​ផ្សេង ដែល​ផលិត​ដោយ​សហរដ្ឋ​អាម៉េរិក​និង​អឺរ៉ុប​។​

​លោក​ហ្គឺហា​ត់​ស៍បាន​និយាយថា “​វា​អាច​មាន​ចម្លើយ​តែមួយគត់​ចំពោះ​ការឈ្លានពាន​របស់​ប្រធានាធិបតី​រុស្ស៊ី វ្ល៉ា​ឌី​មៀរ ពូ​ទីន​។ ការរួបរួម​នៅក្នុង​អង្គការ​ណា​តូ​និង​ការ​ទប់ទល់​ដ៏​គួរឱ្យ​ជឿជាក់​។​នេះ​មាន​​ន័យ​ជាពិសេស​ថា គ្មាន​ជម្រើស​អ្វី​ក្រៅពី​ជ្រើសរើស​យន្តហោះ F-35 នោះឡើយ​”​។​

​យោធា​អាល្លឺម៉ង់​មិន​មាន​អាវុធ​នុយក្លេអ៊ែរ​ផ្ទាល់ខ្លួន​ទេ ប៉ុន្តែ​ជា​ផ្នែក​មួយ​នៃ​ប្រព័ន្ធ​ទប់ស្កាត់​នុយក្លេអ៊ែរ​ដែល​ត្រូវបាន​បង្កើតឡើង​ក្នុងអំឡុង​សង្គ្រាមត្រជាក់ ប្រទេស​នេះ​បាន​រក្សា​យន្តហោះ​ទម្លាក់​គ្រាប់បែក​ដែល​មាន​សមត្ថភាព​អាច​ផ្ទុក​គ្រាប់បែកបរមាណូ​របស់​អាម៉េរិក ដែល​គ្រាប់​ខ្លះ​គឺ​រក្សា​ទុក​ក្នុង​ប្រទេស​អាល្លឺម៉ង់​។​

​គណបក្ស​ឆ្វេងនិយម ដែល​ជា​បក្សប្រឆាំង បាន​រិះគន់​ការសម្រេចចិត្ត​ទិញ​យន្តហោះ F-35 ជាង​៣០​គ្រឿង​សម្រាប់​យោធា​អាល្លឺម៉ង់​។​

​លោក អា​លី អាល់​ដៃ​ឡា​មី (Ali Al-Dailami) អ្នកនាំពាក្យ​រង​ផ្នែក​ការពារជាតិ​របស់​គណ​បក្ស​បាន​និយាយថា “​យើង​បដិសេធ​ការបំពាក់​យន្តហោះ​ថ្មី​មាន​សមត្ថភាព​នុយក្លេអ៊ែរ​ដល់​កងទ័ព​អាល្លឺម៉ង់​”​។ លោក​បាន​ព្រមាន​ថា ការតម្រូវ​ឱ្យ​អាកាសយានិក​អាល្លឺម៉ង់​ទម្លាក់​គ្រាប់បែកបរមាណូ​របស់​អាម៉េរិក​អាច “​បញ្ឆេះ​ហានិភ័យ​នៃ​សង្គ្រាម​នុយក្លេអ៊ែរ​នៅ​អឺរ៉ុប​”៕

​យន្តហោះ F-35B របស់​អាម៉េរិក