ដោយៈ​សុផល​/​ភ្នំពេញៈ​ដើម្បី​ការពារ​ផ្លូវទឹក​ធំជាងគេ​បង្អស់​ក្នុង​តំបន់​អាស៊ីអាគ្នេយ៍​ឲ្យ​បាន​កាន់តែ​ប្រសើរ ឥឡូវនេះ នាយក​ប្រតិបត្តិ​ថ្មី​នៃ​លេខាធិការដ្ឋាន​គណៈកម្មកា​រ​ទន្លេមេគង្គ (​ហៅ​កាត់​ថា MRC,​អឹម អ ស៊ី​)​កំពុង​ជួប​ជាមួយនឹង ប្រទេស​ជា​សមាជិក​ស្តាប់​ដោយផ្ទាល់​ពី​អាទិភាព​របស់​បណ្តា​ប្រទេស​ទាំងនេះ ជាពិសេស​សំដៅ​កាត់បន្ថយ​ការ​គំរាម កំហែង​កំពុង​កើន​ឡើងលើ​ជីវិត​និង​ជីវភាព​របស់​ប្រជាជន​។​

​យោងតាម​សេចក្តីប្រកាស​ព័ត៌មាន​របស់​អឹម អ ស៊ី ពី​ទីក្រុង​វៀងចន្ទន៍ ប្រទេស​ឡាវ កាលពី​ថ្ងៃទី ១៤​ខែមីនា​ឆ្នាំ​២០២២ បានឱ្យដឹងថា បណ្ឌិត អា​នុ​ល័ក ខិ​ធិ​ឃួន ដែល​ត្រូវបាន​ជ្រើស​តាំងនៅ​ខែមករា​ជានា​យក​ប្រតិបត្តិ​ជនជាតិ​ឡាវ​ដំបូង សម្រាប់​លេខាធិការដ្ឋាន​គណៈកម្មកា​រ​ទន្លេមេគង្គ​បានធ្វើ​ទស្សនកិច្ច​ទៅកាន់​ប្រទេស​កម្ពុជា និង​វៀតណាម ក្នុង​ខែ​នេះ ដើម្បី​ពិភាក្សា​ជាមួយនឹង​មន្ត្រីជាន់ខ្ពស់​នានា ពី​កិច្ចសហប្រតិបត្តិការ​ទ​ន្លេ​មេគង្គ​។​

​ប្រភព​ដដែល​បន្តថា លើសពី​គោលបំណង​ក្នុងការ​ធ្វើ​ឲ្យ​ភាពជា​ដៃគូ​ថ្នាក់​តំបន់ និង​អន្តរជាតិ​ឲ្យ​កាន់តែ​ស៊ីជម្រៅ អាទិភាព​ចំបង​បំផុត​មួយ គឺ​ការពង្រីក​នូវ​កិច្ចខិតខំ​ប្រឹងប្រែង តាមដាន និង​វាស់​ស្ទង់​ពី​របៀប​ដែល​ការអភិវឌ្ឍន៍​សេដ្ឋកិច្ច គម្រោង​ហេដ្ឋារចនាសម្ព័ន្ធ​ទឹក និង​ការប្រែប្រួល​អាកាសធាតុ រួមទាំង​ទឹកជំនន់ និង​គ្រោះរាំងស្ងួត​កាន់តែច្រើន ជះឥទ្ធិពល​លើ​ប្រជាជន​រាប់លាន​អ្នក រស់នៅ​តាម​អាង​ទន្លេមេគង្គ​ក្រោម​។​

​បណ្ឌិត អា​នុ​ល័ក ដែល​បាន​បម្រើការ​ជាង​មួយ​ទសវត្សរ៍​នៅឯ​លេខាធិការដ្ឋាន MRC​មុនពេល​ត្រូវបាន​ជ្រើសរើស​ដោយ សំឡេង​ជា​ឯកច្ឆន្ទ​នៅ​ខែមករា ជា​នាយក​ប្រតិបត្តិ​ទី​៣ មកពី​ប្រទេស​តាម​ដង​ទន្លេមេគង្គ បាន​លើកឡើងថា “​កិច្ចពិភាក្សា​ដោយ​បើកទូលាយ​នេះ នឹង​ជួយ​ខ្ញុំ​ឲ្យ​អនុវត្ត​កម្មវិធី​កិច្ចការ​កាន់តែ​មាន​ឥទ្ធិពល​បន្ថែមទៀត សម្រាប់​អាង​ទន្លេ ដែល​អនុលោម​យ៉ាង​ជិតស្និទ្ធ​ទៅនឹង​អាទិភាព​ថ្នាក់ជាតិ និង​តំបន់​។ យើង​ត្រូវតែ​មានគំនិត​បែប​នវានុវត្តន៍ ព្រោះថា MRC បាន​ក្លាយជា​ស្ថាប័ន​ថ្នាក់​តំបន់​ដ៏​រឹងមាំ​មួយ បំពាក់​ដោយ​បច្ចេកវិទ្យា​ទាន់សម័យ និង​ចំណេះដឹង​ទំនើប ដែល​អាច​ផ្តល់​សេវាកម្ម​ទាន់ពេលវេលា​ដ​ល់​ប្រទេស​នានា និង​ប្រជាពលរដ្ឋ​របស់ខ្លួន​”​។

MRC រួមមាន​ប្រទេស​ចំនួន​បួន ដែល​ទទួលបាន​ប្រយោជន៍​ផ្ទាល់​ពី​ការអភិវឌ្ឍន៍​ពាក់ព័ន្ធ​ទន្លេមេគង្គ នោះ​គឺ​ប្រទេស​កម្ពុជា ឡាវ ថៃ និង​វៀតណាម ព្រមទាំង​ឋានៈ​ពិសេស​សម្រាប់​ប្រទេសជិតខាង នៅ​ភាគ​ខាងជើង​ទាំងពីរ គឺ​ប្រទេស​ចិន និង​មី​យ៉ាន់​ម៉ា​។ ប្រទេស​នីមួយៗ​ក្នុងចំណោម​ប្រទេស​ទាំងនេះ មាន​ផលប្រយោជន៍​សម្រាប់​ថ្នាក់ជាតិ​រៀងៗ​ខ្លួន អាទិភាព​ជាក់លាក់ និង​បញ្ហា​ប្រឈម​ខុសៗ​គ្នា ដែល​ធ្វើ​ឲ្យ​កិច្ចសហប្រតិបត្តិការ​មាន​ភាពស្មុគស្មាញ ប៉ុន្តែ​មានតម្លៃ​គួរ​ឲ្យ​ពេញចិត្ត​។

​កាលពី​ថ្ងៃទី​២ ខែមីនា បណ្ឌិត អា​នុ​ល័ក បាន​ជួប​ជាមួយនឹង​លោក លឹម គានហោ ប្រធាន​គណៈកម្មាធិការ​ជាតិ​ទន្លេមេគង្គ​កម្ពុជា និង​លោក តែ ណា​វុ​ធ អនុប្រធាន​អចិន្ត្រៃយ៍​នៃ​គណៈកម្មាធិការ នាទី​ក្រុងភ្នំពេញ​។ ឯកឧត្តម លឹម គានហោ បានបង្ហាញ​ពី​តម្រូវការ​ក្នុងការ​តាមដាន និង​ចែករំលែក​ទិន្ន័យ​ជលសា​ស្ត្រ​កាន់តែច្រើន ដើម្បី​វាស់​ឲ្យ​បាន​ត្រឹមត្រូវ​ពី​ផលប៉ះពាល់​នៃ​រំហូរ​ទាប ឬ​ខ្ពស់​លើ​សុខមាលភាព​សង្គម​-​សេដ្ឋកិច្ច​ក្នុង​តំបន់​។ ដើម្បី​ផ្តល់នូវ​ទិដ្ឋភាព​កាន់តែ​ច្បាស់លាស់ នៅ​ឆ្នាំ​២០២២ ប្រទេស​ចិន បានចាប់ផ្តើម​ចែករំលែក​ទិន្នន័យ​រដូវប្រាំង​របស់​ខ្លួន បន្ថែម​ពីលើ​ទិន្នន័យ​រដូវវស្សា​។ ទោះជា​យ៉ាងនេះ​ក្តី MRC គប្បី​នាំមុខ​ក្នុងការ​បង្កើត​នូវ​ទិដ្ឋភាព​កាន់តែ​ពេញលេញ​មួយ​តាមរយៈ​ការដំឡើង​ស្ថានីយ​តាមដាន​បន្ថែមទៀត​លើ​ដៃទន្លេ​មេ គ​ង្គ​ផងដែរ​។​

​ប្រភព​ដដែល​បន្តថា លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម និង​ជា​សមាជិក​ក្រុមប្រឹក្សា MRC សម្រាប់​ប្រទេស​កម្ពុជា បាន​ថ្លែងថា “​ជាមួយនឹង​ទិន្នន័យ​កាន់តែច្រើន នៅក្នុង​រយៈពេល​កាន់តែ​យូរ យើង​អាច​បង្កើតបាន​នូវ​និន្នាការ​ច្បាស់លាស់ ព្យាករ​ពី​លំនាំ​នាពេល​អនាគត និង​អនុវត្ត​ប្រព័ន្ធ​ជូនដំណឹង​ជាមុន​មួយ​ដែលមាន​ប្រសិទ្ធភាព​។ ដោយមាន​ការយល់ដឹង​រួមគ្នា យើង​អាច​ចាត់វិធានការ​ដែល​កាន់​តែមាន​ឥទ្ធិពល​សម្រាប់​រយៈពេល​ខ្លី និង​មធ្យម​បាន​”​។​

​បន្ទាប់មក នៅ​ថ្ងៃទី​១០ ខែមីនា បណ្ឌិត អា​នុ​ល័ក បាន​ជួប​ជាមួយនឹង​បណ្ឌិត ត្រាន់ ហុង​ហា រដ្ឋមន្ត្រី និង​លោក ឡឺ កុង​ថាច់ អនុរដ្ឋមន្ត្រី​នៃ​ក្រសួង​ធនធានធម្មជាតិ និង​បរិស្ថាន​ប្រទេស​វៀតណាម នាទី​ក្រុង​ហាណូយ​។ លោក​រដ្ឋមន្ត្រី ហា ដែល​បាន​បម្រើការ​ជា​សមាជិក​ក្រុមប្រឹក្សា MRC សម្រាប់​ប្រទេស​វៀតណាម ក៏បាន​ជំរុញ​ឲ្យ MRC សិក្សា​ស្វែងរក​នូវ​ដំណោះស្រាយ​ថាមពល​កាន់តែច្រើន ដែល​មិន​ប៉ះពាល់​ដល់​បរិស្ថាន បន្ថែម​ពីលើ​ការប្រើប្រាស់​វា​រី​អគ្គិសនី​នាពេល​បច្ចុប្បន្ន និង​លើកឡើង​ពី​គម្រោង​ធំ និង​ទំនើបៗ ដែល​ប្រទេស​ជា​សមាជិក​សហការ ដើម្បី​ដោះស្រាយ​បញ្ហា​ប្រឈម​នាពេល​អនាគត​។​

​ដូច​លោក​រដ្ឋមន្ត្រី លឹម គានហោ បានបញ្ជាក់​ចំពោះ​លោក​រួចមកហើយ រដ្ឋមន្ត្រី ហា ក៏បាន​សង្កត់ធ្ងន់​ពី​ការពង្រឹង​ចំណង​ដ៏​រឹងមាំ​ក្នុងចំណោម​ប្រទេស​ជា​សមាជិក MRC ព្រមទាំង​ដៃគូ​នានា រួមមាន​យុទ្ធសាស្ត្រ​កិច្ចសហប្រតិបត្តិការ​សេដ្ឋកិច្ច​ទន្លេ​អា​យេ​យ៉ា​វ៉ា​ឌី​-​ចៅ​ប្រា​យ៉ា​-​មេគង្គ កិច្ចសហប្រតិបត្តិការ​ឡាង​ឆាង​-​មេគង្គ សមាគមន៍​ប្រជាជាតិ​អាស៊ីអាគ្នេយ៍ និង​បណ្តាល​ប្រទេស ដូចជា​កូរ៉េខាងត្បូង សហរដ្ឋអាមេរិក អូស្ត្រាលី និង​ជប៉ុន​។​

​លោក ហា បាន​ពោលថា “​យើង​ត្រូវ​ធានាថា កិច្ចសហប្រតិបត្តិការ​នេះ ស្ថិតនៅ​ទីនេះ ព្រោះ​វា​ជា​អ្វីដែល​ធ្វើ​ឲ្យ​អាង​ទន្លេ​របស់​យើង មាន​ភាព​ផ្សារភ្ជាប់​គ្នា រីកចម្រើន​រុងរឿង និង​មាន​សុវត្ថិភាព​។ នៅក្នុង​ដំណើរការ​នេះ MRC នឹង​បន្ត​ធ្វើជា​គំរូ​មួយ​សម្រាប់​អាង​ទន្លេ​ផ្សេងទៀត នៅពេល​និយាយ​អំពី​កិច្ចសហប្រតិបត្តិការ​ទឹក​ឆ្លងដែន​”​។​

​បណ្ឌិត អា​នុ​ល័ក ក៏បាន​ជួប​ជាមួយនឹង​ថ្នាក់ដឹកនាំ​ឡាវ នៅ​ទីក្រុង​វៀងចន្ទន៍ ដែលជា​ស្នាក់ការ​កណ្តាល​របស់ MRC ផងដែរ​។ ឥឡូវនេះ ក្រុម​របស់លោក កំពុង​រៀបចំ​ផែនការ​ធ្វើដំណើរ​ទៅកាន់​ទីក្រុង​បាងកក និង​ប៉េ កាំ​ង ដើម្បី​ជួប​ជាមួយនឹង​តំណាង​ប្រទេស​ថៃ និង​ភាគី​ប្រទេស​ចិន​។​

​សូមបញ្ជាក់ថា គណៈកម្មការ​ទន្លេមេគង្គ គឺជា​ស្ថាប័ន​អន្តររដ្ឋាភិបាល ដែលមាន​តួនាទី​ជំរុញ​លើកកម្ពស់​កិច្ច​ពិគ្រោះ​យោបល់ និង​កិច្ចសហប្រតិបត្តិការ​ថ្នាក់​តំបន់​នៅក្នុង​តំបន់​អាង​ទន្លេមេគង្គ​ខ្សែទឹក​ខាងក្រោម ដែល​ត្រូវបាន​បង្កើតឡើង​ក្នុង​ឆ្នាំ ១៩៩៥ ផ្អែក​ទៅតាម​កិច្ចព្រមព្រៀង​ទន្លេមេគង្គ រវាង​ប្រទេស​កម្ពុជា ឡាវ ថៃ និង​វៀតណាម​។ ស្ថាប័ន​នេះ បំពេញ​តួនាទី​ជា​វេទិកា​ថ្នាក់​តំបន់​សម្រាប់​ការទូត​ទឹក ក៏ដូចជា​​មជ្ឈមណ្ឌល​​​ប្រមូលផ្តុំ​ចំណេះដឹង​អំពី​ការគ្រប់គ្រង​ធនធានទឹក ដើម្បី​អភិវឌ្ឍន៍​តំបន់​នេះ​ប្រកបដោយ​ចីរភាព​៕សរន