​ប្រែ​សម្រួល : កញ្ញា​ដា​លី​ស (​បាល់ទាត់​) ៖ រាត្រី​ថ្ងៃ​អង្គារ​នេះ​គឺជា​ការសម្រេចសេចក្តី​ចុងក្រោយ​នៃ​ជោគវាសនា​របស់​បិសាច​ក្រហម Man U នៅ​វគ្គ​១​ភាគ​៤​ផ្តាច់ព្រ័ត្រ UEFA Champions League ខណៈ​ពួកគេ​ស្វាគមន៍​ក្រុម Atl. Madrid នៅ​ជើង​ទី​២ ក្រោយ​ស្មើគ្នា​១-១ នៅ​ជើង​ទីមួយ​នៅ​ទឹកដី​អេ​ស្ប៉ា​ញ​។ មួយ​គូ​ទៀត​ក៏​ត្រូវ​កាត់សេចក្តី​នៅ​ថ្ងៃនេះ​ដែរ​គឺ Ajax ប៉ះ​ជាមួយ Benfica ក្រោយ​ស្មើគ្នា ២-២ នៅ​ជើង​ទីមួយ​។

– Man U vs Atl. Madrid

​បិសាច​ក្រហម​កំពុង​ឆ្លងកាត់​ទម្រង់​លេង​មិន​សូវ​ល្អ​នៅ​ខណៈ​ពេល​នេះ ហើយ​ការធ្លាក់​ចេញពី​ក្របខ័ណ្ឌ Champions League នៅពេល​នេះ​មិនមែន​ជា​រឿង​ល្អ​សម្រាប់​ពួកគេ​នោះទេ​។​

​ពួកគេ​កំពុង​តស៊ូ​យ៉ាង​ពិបាក​ដើម្បី​រក្សា​តំណែង​កំពូល​ទាំង​បួន​ក្នុង Premier League ហើយ​មាន​ការពិភាក្សា​ជា​ច្រើន​អំពី​លោក រ៉ា​ហ្វ រេ​ង​នី​ក​បាត់បង់​ទំនុកចិត្ត​ពី​កីឡាករ​រួចទៅហើយ​។​

​ទន្ទឹមនឹងនេះ​ដែរ Atletico Madrid ហាក់​បាន​រកឃើញ​ទម្រង់​លេង​ល្អ​ឡើងវិញ​ទាន់ពេលវេលា​។ ពួកគេ​កំពុង​ស៊ុត​បំប៉ោង​សំណាញ់​ទី​ក្នុង​អត្រា​ដ៏​គួរឱ្យ​ចាប់អារម្មណ៍ ហើយ​ពួកគេ​ក៏​ហាក់​បាន​តាំងចិត្ត​ដើម្បី​សងសឹក​ខ្លួនឯង​ចំពោះ​ការ​ខូចចិត្ត​នៅ CL ដែល​បង្កឡើង​ដោយ​កីឡា​ករគ្រី​ស្ទា​ណូ រ៉ូ​ណាល់​ដូ​ក្នុង​ទសវត្សរ៍​កន្លង​ទៅ​ផងដែរ​។​

​មើល​តាម​ជាក់ស្តែង Atl. Madrid ហាក់​មាន​ប្រៀប ព្រោះ​ពួកគេ​បាន​ទម្លាក់​ក្រុម Liverpool នៅ​កីឡដ្ឋាន Anfield ក្នុង​វគ្គ ១៦ ក្រុម​ចុង​ក្រោយ​កាល​ពី​រដូវ​កាល​មុន ពេល​កំពុង​ជួប​ទម្រង់​លេង​បែប​នេះ​ដូចគ្នា​។​

​ទោះយ៉ាងណា ពួកគេ​មិន​អាច​មើលរំលង​បទពិសោធន៍​លើ​ទីលាន​របស់​រ៉ូ​ណាល់ដូ​ទល់នឹង Atl. Madrid បានឡើយ​។ ថា​មិន​ត្រូវរ៉ូ​ណាល់ដូ​អាច​ជា​ពេជ្ឃ​ឃាដលើ​ទីលាន​ម្តង​ទៀត​សម្រាប់​ពួកគេ​នៅ​យប់​នេះ​។

​ក្រុម​ទាំង​ពីរ​ធ្លាប់​ជួប​គ្នា ៣ ដង ដោយ Atl. Madrid ឈ្នះ ២ ស្មើ​១​។ ការ​ឈ្នះ​ទាំង​ពីរ​នោះ​បាន​កើតឡើង​តាំងពី​ឆ្នាំ​១៩៩២ ក្នុង​ការប្រកួត UEFA Cup Winners ជុំ​ទី​២​។​

​ផ្អែកលើ​បទពិសោធន៍​លើ​ទីលាន​ជាក់ស្តែង​រវាង​ក្រុម​ទាំងពីរ យើង​រំពឹង​បិសាច​ក្រហម​នឹង​អាច​ឆ្លង​ផុត​ទៅ​វគ្គ​បន្ទាប់​។

​លទ្ធផល​ព្យាករណ៍ Man U ឈ្នះ ២-១​។​

– Ajax vs Benfica

​ការប្រកួត​ជើង​ទី​១​បាន​បញ្ចប់​ទៅ​ដោយ​មាន​ការ​ស៊ុត​បញ្ចូល​ទី​ច្រើន​គ្រាប់ ខណៈ​ដែល​ក្រុម​ពូកែ​លេង​វាយលុក​ទាំងពីរ​បាន​ស៊ុត​គ្នា​ទៅវិញទៅមក​មិន​សំចៃ​ជើង ហើយ​ប្រកួត​នៅ​ថ្ងៃ​អង្គារ​នេះ​ក៏​រំពឹង​មាន​គ្រាប់​បាល់​ច្រើន​ផងដែរ​។​

Ajax គឺជា​ក្រុម​ម្ចាស់​ជើងឯក​ហូឡង់​ដែល​កំពុង​ការពារ​តំណែង​ជើងឯក ហើយ​ពួកគេ​កំពុង​ស្ថិត​ក្នុង​មា​គា​រក្សា​តំណែង​ជើងឯក​បាន​ជាថ្មី​ម្តងទៀត​។ ពួកគេ​ស៊ុត​បញ្ចូល​ទី​ច្រើនជាងគេ​នៅ​ក្របខ័ណ្ឌ Eredivisie ហើយ​ពួកគេ​ក៏​បាន​បន្ត​ទម្រង់​លេង​ល្អ​នេះ​មក​កាន់​ក្របខ័ណ្ឌ Champions League ផងដែរ​។​

​ការពិត​ដែលថា​ពួក​គេ​លេង​នៅក្នុង​ផ្ទះ​នឹង​ក្លាយ​ជា​ការបង្កើន​ទំនុកចិត្ត​ខ្ពស់​មួយ ហើយ​អ្នកគាំទ្រ​នឹង​អបអរសាទរ​ចំពោះ​ការ​ស៊ុត​បញ្ចូល​ទី​ទល់​នឹង​ក្រុម​ភ្ញៀវ​មកពី​ព័រ​ទុយ​ហ្គាល់​នេះ​។​

​ទន្ទឹមនឹងនេះ Benfica មិនមែន​ជា​គូប្រជែង​ស្លូត​នោះទេ​។ ពួកគេ​គឺជា​ក្រុម​វាយលុក​ដ៏​ល្អ​បំផុត​នៅក្នុង Primeira Liga ហើយ​កំពុង​ប្រជែង​ចំណាត់ថ្នាក់​កំពូល​ទាំង​បី​។​

​ខណៈ​ដែល​ក្រុម​ទាំងពីរ​នេះ​លេង​តទល់​គ្នា​នៅ​កីឡដ្ឋាន Johan Crujiff Arena យើង​រំពឹង​មានការ​ប្រយុទ្ធ​គ្នា​ដ៏​សាហាវ ហើយ​នឹង​មាន​គ្រាប់​បាល់​ច្រើន​គ្រាប់​ដូច​ជើង​ទីមួយ​។

​ទោះ​យ៉ាងណា​ប្រៀប​ឈ្នះ​គឺ​បាន​ទៅ​ខាង​ម្ចាស់ផ្ទះ ដូច្នេះ​លទ្ធផល​ព្យាករណ៍ គឺ Ajax ឈ្នះ ៤-១៕

Man U អាច​បំពាក់ Atl. Madrid ឡើង​ទៅ​វគ្គ​បន្ទាប់​បាន​ទេ​យប់​នេះ​?