​ដោយ​: ភ្នំ​ខៀវ / បាត់ដំបង​: អាជ្ញាធរខេត្ត​បាត់ដំបង ចុះ​រៀបចំ​សណ្តាប់ធ្នាប់ ជុំវិញ​ផ្សារណាត់ បាត់ដំបង ដើម្បី​សម្រួល​ចរាចរណ៍ ដែល​កកស្ទះ​រាប់​ឆ្នាំ ដោយសារ​អាជីវ​ករល​ក់​ដូរ និង​ដាក់​ផ្ញើ​កង់ ម៉ូតូ​លើ​គន្លង​ផ្លូវ​។​

​នៅក្នុង​យុទ្ធនា​ការរៀបចំ របៀបរៀបរយ នៅ​ថ្ងៃទី​១៤ ខែមីនា​នេះ លោក ឆាយ ម៉ា​ទីណា​ល់ អភិបាលរង​ខេត្តបាត់ដំបង បាន​បញ្ជាក់ថា​: ក្រោម​គំនិត​ផ្តួចផ្តើម របស់លោក សុខ លូ អភិបាលខេត្ត​បាត់ដំបង បានសម្រេច​សម្រួល កែលម្អ​លើ​ចំណុច​សំខាន់ៗ ចំនួន​បី ដែលជា​បញ្ហា​ប្រឈម កន្លងមក ក្នុងនោះ​រួមមាន​: ទី​១ ដោះស្រាយ​លើ​ជនអនាថា ទី​២ សោភ័ណភាព​ក្រុង ក្នុង​តំបន់ មាន​អាគារ​បុរាណ​អភិរក្ស និង​ក្រៅ​តំបន់​អភិរក្ស និង​ទី​៣ ដោះ​បញ្ហា​អនាម័យ​បរិស្ថាន​។​

​ចំណាត់ការ​ជំហាន​ចំពោះមុខ ក្រុមការងារ បាន​ចុះ​រៀបចំ​សណ្តាប់ធ្នាប់​សាធារណៈ ទីផ្សារ សំខាន់ៗ​នៅក្នុង​ទីប្រជុំជន​ក្រុង​នានា ជាក់ស្តែង កន្លងមក បានរៀបចំ​នូវ ផ្សា​របឹង​ឈូក ហើយ​ចំពោះមុខ​នេះ​ទៀតសោត បានរៀបចំ​កែលម្អ ផ្សារណាត់​បាត់ដំបង ដោយសារ​កន្លងមក​ប​ង​ប្អូន​អាជីវករ បានដាក់​លក់ដូរ​ទំនិញ បន្លែ ផ្លែឈើ ត្រី​សាច់ និង​ដាក់​ផ្ញើ​កង់ ម៉ូតូ នៅលើ​គន្លង​ផ្លូវ បង្ក​ការកកស្ទះ មិន​អាចធ្វើ​ចរាចរណ៍ បាន​ងាយស្រួល ពី​សំណាក់​សាធារណ ជន ក្នុង និង​ក្រៅ​ខេត្ត​ឡើយ​។​

​លោក ឆាយ ម៉ា​ទីណា​ល់ បាន​បន្តថាៈ ក្រោយ​បញ្ចប់​នូវ ការរៀបចំ​ដំណាក់កាល​ទី​១ និង​បន្ត​ជំហាន​ទី​២ ដោយ​ត្រូវ​រៀបចំ​សណ្តាប់ធ្នាប់ លើ​កំណាត់​ផ្លូវ​លេខ​១, លេខ​១​កន្លះ​, លេខ ២, លេខ​២​កន្លះ ហើយនឹង​កំណាត់​ផ្លូវ​លេខ​៣ ផងដែរ ដោយ​ផ្តោតលើ​ការរៀបចំ​សំ​យ៉ាប ខ្នង​ផ្ទះ​នីមួយៗ តម្រូវ​ឲ្យ​ម្ចាស់ផ្ទះ ចូលរួម​កាត់​តម្រឹម ត្រឹម​១ ភាគ​៣ នៃ​ខឿន​ចំណីផ្លូវ​តែប៉ុណ្ណោះ ព្រមទាំង​រៀបចំ​ស្លាក​ពាណិជ្ជកម្ម ឲ្យ​ប្រសើរ​តាម​ការកំណត់ របស់​មន្ត្រី​ជំនាញ​។​

​ភាពចាំបាច់ នៃ​ការចុះ​រៀបចំ ពង្រឹង​ច្បាប់​ខាងលើ​នេះដែរ ក្នុង​គោលបំណង​ឈានទៅដល់ ការរក្សា​តំណែង​ផ្ការំដួល​បី​ទង ទីក្រុង​ទេសចរណ៍​អាស៊ាន ស្រស់បំព្រង ពណ៌​បៃតង ឆ្ពោះទៅ​ស្វាគមន៍​ព្រឹត្តិការណ៍ កីឡា​ស៊ី​ហ្គេម​-​អាស៊ាន​ប៉ា​រ៉ា​ហ្គេម ឆ្នាំ​២០២៣ ដូច្នេះ​ចាំបាច់​ត្រូវ ប្រជាពលរដ្ឋ​ចូលរួម​ជាមួយ​អាជ្ញាធរ មាន​សមត្ថកិច្ច​ឲ្យ​សាក​សមជា​ម្ចាស់ផ្ទះ​ផ្តល់នូវ​ភាពកក់ក្តៅ អនាម័យ​បរិស្ថាន និង​ស្ថេរភាព ជូន​ដល់​ភ្ញៀវ​អ្នកទេសចរ​ជាតិ និង​អន្តរជាតិ​៕/V​