ដោយៈ សុវណ្ណ​កុម្ភៈ / ភ្នំពេញៈ ការផ្ដល់​ឱកាស ដល់​កីឡាករ កីឡាការិនី ជម្រើសជាតិ ចេញទៅ​ចូលឆ្នាំ នៅតាម​ផ្ទះ​រៀងៗ​ខ្លួន​នោះ ពេលនេះ កំពុងតែ​ស្ថិតនៅក្នុង​ភាព​ប្រទាំង​ប្រទើស នៅឡើយ​ទេ ។​

​លោក ស សុខា ដែលជា​រដ្ឋលេខាធិការ ក្រសួង​អប់រំ យុវជន និង​កីឡា បាន​មាន ប្រសាសន៍ថាៈ បុណ្យចូលឆ្នាំ ប្រពៃណី​ជាតិខ្មែរ នា​ខែមេសា ខាងមុខនេះ កីឡាករ កីឡាការិនី ជម្រើសជាតិ ត្រូវបាន​អនុញ្ញាត ឲ្យ​ទៅ​ស្រុកភូមិ បន្ទាប់ពី​អាក់ខាន ចំនួន ២ ឆ្នាំ ដោយសារ​កូ​វីដ ១៩ ហើយ​ការអនុញ្ញាត​ឲ្យ​ទៅនេះ ធ្វើឡើង​ក្រោម​លក្ខ​ខ័​ណ្ឌ​ឲ្យ​សាមី​សហព័ន្ធ ត្រូវតែ​ពិនិត្យ លើ​កីឡាករ កីឡាការិនី ដែល​កំពុងតែ​ប្រមូលផ្ដុំ​នេះ ឲ្យ​បាន​ខ្ពស់បំផុត ។​

​ការពិនិត្យ​លើ​ការដើរ​ហើរ របស់​ក្រុម​ជម្រើសជាតិ ព្រោះ​ប្រភេទ​កីឡា មួយចំនួន ត្រូវ​ចេញ ដំណើរ ទៅកាន់​ប្រទេស​វៀតណាម ចន្លោះ​ពីថ្ងៃ​ទី​៩ ដល់​ថ្ងៃទី​១៣ ឧសភា ដើម្បី​ចូលរួម​ប្រកួត កីឡា​ស៊ី​ហ្គេម លើក​ទី​៣១ នៅ​ទីនោះ​។ វា​កំពុង​តែមាន​ស្ថិត នៅក្នុង​ការជជែក​វែក​ញែ​គ្នា នៅឡើយ​ទេ ។ ពេលនេះ ទោះបី​ស្ថានភាព​កូ​វីដ​១៩ វា​ហាក់ដូចជា​មិនសូវ​បង្ក​ឲ្យ មាន​ភាព​ធ្ងន់ធ្ងរ​នោះ ក៏ពិតមែន​។​

​លោក វ៉ា​ត់ ចំរើន ដែលជា​អគ្គលេខាធិការ គណៈកម្មាធិការ​ជាតិ រៀបចំ​ស៊ី​ហ្គេម ឆ្នាំ​២០២៣(CAMSOC) ការអនុញ្ញាត​ឲ្យ​ពួកគេ​ទៅផ្ទះ ក្នុងអំឡុង​ចូលឆ្នាំ​ខ្មែរ គឺ​ពិត​ជាមាន​ហានិភ័យ ខ្ពស់​មែន ព្រោះ​ប្រសិនបើ​គេ ត្រឡប់មកវិញ ដោយមាន​ផ្ទុកមេរោគ​កូ​វីដ ១៩ នោះ យើង​នឹង មានការ​លំបាក ព្រោះ​ពេលវេលា ចេញទៅ​ចូលរួម​ស៊ី​ហ្គេម នៅ​វៀតណាម វា​កាន់តែ​កៀក មែនទែន​ហើយ ។​

​លោក ប៉ុន សុខ ដែលជា​ប្រធាន​មជ្ឈមណ្ឌល​ជាតិ​ហ្វឹកហ្វឺន​កីឡា ដែលជា​ស្ថាប័ន​គ្រប់គ្រង ការប្រមូលផ្ដុំ នៃ​ក្រុម​កីឡាករ កីឡាការិនី​ជម្រើសជាតិ​នោះ បាន​ប្រាប់​ឲ្យ​ដឹងថាៈ ពេលនេះ លោក​កំពុងតែ​រង់ចាំ​មើល ការសម្រេច​របស់​ថ្នាក់លើ​។ បើ​ថ្នាក់លើ​សម្រេច​ឲ្យ​បិទ​ខ្ទប់​លោក​
​នឹង​បិទ​ខ្ទប់​បន្ត ដើម្បី​ឲ្យ​ពួកគេ​ហ្វឹកហាត់​បន្ត តែបើ​សម្រេច​ឲ្យ​ពួកគេ ទៅ​ចូលឆ្នាំ នៅផ្ទះ​នោះ លោក​ក៏​សម្រេច​តាម​ដែរ ។​

​ទោះជា​យ៉ាងណា ក៏​លោក​ទទួលស្គាល់ថា វា​អាច​នឹង​ជួប​ហា​នី​ភ័យ​មែន ហើយ​ព្រោះ​ពេល វេលា សម្រាប់​ចេញទៅ ប្រទេស​វៀតណាម ក៏​កាន់តែ​មកដល់​កៀក មែនទែន​ហើយ​៕/V​