ដោយៈ ទេ​ពក​ង្រី / កំពង់ឆ្នាំងៈ លោក ស៊ុន​សុ វណ្ណា​រិ​ទ្ធិ អភិបាល នៃ​គណៈ អភិបាល ខេត្តកំពង់ឆ្នាំង នៅ​ព្រឹក​ថ្ងៃទី​១៥ ខែមីនា ឆ្នាំ​២០២២ បាន​ដឹកនាំ​ក្រុម ការងារ ចុះសាកសួរ សុខទុក្ខ និង​ចែក​អំណោយ ជូន​ប្រជាពលរដ្ឋ នៅក្នុង​ភូមិ តា​តាន់ ឃុំ​ព្រៃ​គ្រី​ជើង ចំនួន ៤៥៦ គ្រួសារ ដែល​បាន​រង​ផលប៉ះពាល់ ដោយ​ជំងឺ​កូ​វីដ​១៩ និង​ឧបត្ថម្ភ​ស៊ីម៉ង់ត៍ ចំនួន ៤០ តោន ជូន​អាជ្ញាធរ​ឃុំ សម្រាប់ធ្វើ​ផ្លូវ​បេតុង ក្នុង​ឃុំ​ព្រៃ​គ្រី​ជើង ។​

​អភិបាលខេត្ត​កំពង់ឆ្នាំង បាន​ថ្លែង​ទៅកាន់​ប្រជាពលរដ្ឋ​ថាៈ ដើម្បី​ទទួលបាន​នូវ សុខសន្តិភាព និង​មានការ​អភិវឌ្ឍ គ្រប់​វិស័យ នៅក្នុង​មូលដ្ឋាន ប្រជាពលរដ្ឋ យើង ត្រូវតែ​ចូលរួម​អនុវត្ត គោលនយោបាយ ភូមិ ឃុំ មាន​សុវត្ថិភាព គឺ​ភូមិ​ឃុំ​មាន​សន្តិសុខ សណ្ដាប់ធ្នាប់​ល្អ គ្មាន​ចោរកម្ម គ្មាន​គ្រឿងញៀន គ្មាន​ក្មេង​ទំនើង និង​គ្មាន​អំពើហិង្សា នៅក្នុង​គ្រួសារ ។​

​អភិបាលខេត្ត បាន​បាន​បន្តថាៈ បើតាម​គម្រោង​ផែនការ​របស់​អាជ្ញាធ​ខេត្ត មន្ទីរ​អភិវឌ្ឍន៍ ជនបទ បាននិងកំពុង​សិក្សា​គម្រោង កសាង​ស្ពាន ១០ កន្លែង នៅតាម​ផ្លូវ​មាត់ទន្លេ ដោយ​ត​ភ្ជាប់ ពី​ឃុំ​កោះ​ថ្កូវ ទៅមក​កាន់​ទីរួមស្រុក​ជល​គិរី ដើម្បី​ងាយស្រួល​ទៅមក ពី​ខេត្ត មក​ស្រុក ។ ក្នុងនោះ ផ្លូវ​ពី​សាលាស្រុក​ជល​គី​រី ទៅ​ត​ភ្ជាប់​ជាមួយ​ឃុំ​ពាម​ឆ្កោក គឺ​ខាង​ភាគី ក្រុមហ៊ុន​កូរ៉េ និង​ជួយ​កសាង​ជា ផ្លូវ​បេតុង ហើយ​ផ្លូវ​នៅក្នុង​ឃុំ​ព្រៃ​គ្រី​ជើង​ទាំងអស់ ត្រូវ​កសាង ជា​ផ្លូវ​បេតុង ផងដែរ ។

​ជាមួយគ្នានេះដែរ លោក​បាន​សន្យាថា លោក​នឹង​អភិវឌ្ឍន៍​ស្រុក​ជល​គី​រី អោយក្លាយ​ទៅជា តំបន់​ទេសចរណ៍ ទាក់ទាញ​មួយ ដើម្បី​លើកកម្ពស់​ជីវភាព រស់នៅ​របស់ ប្រជាពលរដ្ឋ នា​តំបន់​ដាច់ស្រយាល​។​

​លោក​ក៏បាន​ផ្តាំផ្ញើ​ដល់​ប្រជាពលរដ្ឋ ក្នុង​ឃុំ​ទាំងអស់ សូម​រួមគ្នា​អនុវត្ត​វិធានការ ៣​កុំ​និង ៣ ការពារ ដើម្បី​រួមគ្នា​ទប់ស្កាត់​ការ​រាលដាល​ជំងឺ​កូ​វីដ​១៩ ប្រភេទ​អូ​មី​ក្រុង នៅក្នុង​មូលដ្ឋាន​។​

​នៅក្នុង​កម្មវិធី​នេះ លោក​អភិបាលខេត្ត និង​ក្រុមការងារ ក៏បាន​ចែក​អំណោយ ជូន​ប្រជាពលរដ្ឋ ចំនួន ៤៥៦ គ្រួសារ នៅក្នុង​ភូមិ​តា​តាន់ ឃុំ​ព្រៃ​គ្រី​ជើង ដែល​រង​ផលប៉ះពាល់ ដោយសារ​ជំងឺ កូ​វីដ ១៩ ដោយ​ក្នុង​១​គ្រួសារៗ ទទួលបាន​អង្ករ ១០​គីឡូ , ត្រីខ​១​យួរ , ត្រី​១​យួរ និង​ទឹកស៊ីអ៊ីវ ១ យួរ ៕/V​-PC