​ប្រែ​សម្រួលៈ​បំណង​(ST)៖ ចិន​កាលពី​ថ្ងៃ​អង្គារ​ទី​១៥​មីនា​បាន​រាយការណ៍​អ្នក​ឆ្លងកូវី​ដ​១៩​ថ្មី​ចំនួន​៥.២៨០​នាក់​គឺ​កើន​លើស​ចំនួន​ឆ្លង​កាល​ពី​មួយ​ថ្ងៃមុន​ជាង​ពីរ​ដង​និង​ជា​ចំនួន​ឆ្លង​ប្រចាំថ្ងៃ​ខ្ពស់បំផុត​​គិត​ចាប់តាំងពី​ជំងឺឆ្លង​នេះ​ចាប់ផ្តើម​មាន​នៅ​ចិន​។​

​តំបន់​រង​ការផ្ទុះ​ជំងឺ​នេះ​ខ្លាំង​បំផុត​គឺ​ខេត្ត​ជី​លីន​(Jilin)​ភាគ​ឦសាន កន្លែង​ដែល​មនុស្ស​ជាង​៣.០០០​នាក់​ត្រូវបាន​រកឃើញ​ថា​ឆ្លងកូវី​ដ​១៩​។​

​សូមបញ្ជាក់​ថា ថ្ងៃ​អង្គារ​ទី​១៥​មីនា​ជា​ថ្ងៃទី​ប្រាំមួយ​ជាប់​គ្នា​ដែល​ចិន​បាន​រាយការណ៍​ចំនួន​ឆ្លងកូវី​ដ​១៩​ថ្មី​មួយ​ថ្ងៃ​ជាង​១.០០០​នាក់​។​

​យ៉ាងហោច​ណាស់​ទីក្រុង​និង​ខណ្ឌ​ចំនួន​ដប់​នៅ​ទូទាំងប្រទេស​បាន​និង​កំពុង​បិទ​ខ្ទប់​ដោយសារ​ការផ្ទុះកូ​វីដ​១៩​នៅ​មួយ​រយៈពេល​ចុងក្រោយ រួមមាន​ទីក្រុង​មជ្ឈមណ្ឌល​បច្ចេកវិទ្យា សិន​ចិន​(Shenzhen)​ដែល​មាន​មនុស្ស​១៧​លាន​នាក់​រស់នៅ​។​

​ការផ្ទុះ​ជំងឺ​នៅ​បណ្តា​រោងចក្រ​ផលិត​រថយន្ត​វ៉ុល​ស្វា​ហ្គិន​(Volkswagen )​នៅ​ទីក្រុង​ចាង​ជុន​(Changchun)​ក៏​នាំ​អោយ​បិទ​ទីតាំង​បី​យ៉ាងតិច​ចំនួន​បី​ថ្ងៃ​កាលពី​ថ្ងៃ​ចន្ទ​។​

​ទីក្រុង​ដទៃទៀត រួមមាន​ទីក្រុង​សៀង​ហៃ បាន​បិទ​ខ្ទប់​សង្កាត់​និង​អាគារ​មនុស្ស​រស់​នៅ​ខ្លះ​ដែល​មាន​អ្នក​កើតកូ​វីដ​១៩​។​

​ក្នុងពេល​ជាមួយគ្នា អាជ្ញាធរ​អាកាសចរណ៍​ចិន​ក៏​បាន​ប្រកាសថា​ខ្លួន​នឹង​បង្វែរ​ជើងហោះហើរ​អន្តរជាតិ​ចំនួន​១០៦​ដែល​ត្រូវ​មកដល់​ក្រុង​សៀង​ហៃ​ទៅ​កាន់​ទីក្រុង​ចិន​ផ្សេងៗ​ទៀត​ចាប់ពី​ថ្ងៃ​២១​មីនា​ដល់​០១​ឧសភា​ដោយសារ​សភាពការណ៍​ជំងឺ​ឆ្លងកូវី​ដ​១៩​។​

ប្រព័ន្ធ​ព្យាករណ៍​កូវី​ដ​១៩​មួយ​របស់​សកលវិទ្យា​ល័យ​ឡាន់​ចូ​វ​(Lanzhou)​បាន​ព្យាករណ៍​ថា ការផ្ទុះកូ​វីដ​ក្នុងសហគមន៍​នាពេល​បច្ចុប្បន្ន​អាចគ្រប់គ្រង​វា​បាន​ទាល់តែដល់​ដើម​ខែ​មេសា​ក្រោយ​ចំនួន​​ឆ្លង​ប្រចាំថ្ងៃ​ឡើង​ដល់​ប្រមាណ​៣៥.០០០​នាក់​។​

​ពួក​មន្ត្រី​សុខាភិបាល​ចិន​ក៏​បាន​ព្រមាន​អំពី​ការ​រឹតបន្តឹង​ខ្លាំង​ឡើង​ដើម្បី​ទប់ស្កាត់​ការឆ្លង​រាលដាល​កូវី​ដ​១៩​នៅ​រលក​ថ្មី​នេះ​៕

​មនុស្ស​ជិត​៣០​លាន​នាក់​ស្ថិតក្រោម​ការបិទ​ខ្ទប់​នៅ​ទូទាំង​ប្រទេស​ចិន​កាលពី​ថ្ងៃ​អង្គារ ដោយសារកូ​វីដ​១៩​ផ្ទុះ​ជា​ច្រើន​កន្លែង​និង​ចម្លង​ច្រើន​ជាង​ពេល​ណាៗ​ទាំងអស់​។​ក្នុង​រូប ប្រជាជន​កំពុង​រង់ចាំ​ការ​​យក​សំណាករ​កកូ​វីដ​១៩​នៅ​ក្រុង​យ៉ាន់​តា​យ ក្នុង​ខេត្ត​សាន់​ទុង កាលពី​ថ្ងៃ​ចន្ទ​