ដោយៈ សុវណ្ណ​កុម្ភៈ / ភ្នំពេញៈ ប្រតិភូ​ក្រសួង​អប់រំ យុវជន និង​កីឡា​កម្ពុជា បាន​ចូលរួម កិច្ចប្រជុំ​រដ្ឋមន្ត្រី អន្តររដ្ឋាភិបាល តំបន់​អាស៊ី​-​អូ​សេ​អា​នី លើក​ទី​១៧ ស្តីពី​ការប្រឆាំង​ដូ​ប៉ា ក្នុង​វិស័យ​កីឡា (The 17″ Asia/Oceania Region Intergovernmental Ministerial Meeting on Anti Doping in Sport) ពីថ្ងៃ​ទី​១៤ ដល់ ១៥ ខែមីនា ឆ្នាំ​២០២២ នៅ​ទីក្រុង​ឌូ​បៃ សហភាព​អារ៉ាប់​។​

​ប្រតិភូ​នេះ ដឹកនាំ​ដោយ​លោក ប៊ូ ជុំ​សេរី អនុរដ្ឋលេខាធិការ ក្រសួង​អប់រំ យុវជន និង​កីឡា តំណាង​ដ៏​ខ្ពង់ខ្ពស់ លោក​បណ្ឌិតសភា​ចា​រ្យ ហង្ស​ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា អមដំណើរ​ដោយ​សមាជិក ពីររូប គឺ​លោក​បណ្ឌិត អ៊ុក ឌី​វ៉ង់ អគ្គនាយករង​កីឡា និង​ជា​សមាជិក​តំណាង​ប្រទេស និង​លោក អ៊ិត ឡេង ប្រធានការិយាល័យ CADA(Cambodia Anti-Doping Agency)​។​

​បើតាម​ការផ្តល់​ខ្លឹមសារ ពី​ក្រុម​ប្រតិភូ​ក្រសួង​អប់រំ យុវជន និង​កីឡា និង​នាយកដ្ឋាន​ជំនាញ ក្រោម​ឱវាទ បាន​បញ្ជាក់ថា គោលបំណង​ចម្បងៗ នៃ​កិច្ចប្រជុំ​នេះ ផ្តោត​សំខាន់​លើ​៥​ចំណុច រួមមាន ពិនិត្យ​របាយការណ៍​វឌ្ឍនភាព និង​បញ្ហា​ប្រឈម​របស់ អង្គការ​ប្រឆាំង​ដូ​ប៉ា​ជាតិ ក្នុង​តំបន់​អាស៊ី​-​អូ​សេ​អា​នី​។ ផែនការ​យុទ្ធសាស្ត្រ​របស់ WADA(World Anti-Doping Agency) ២០២២ -២០២៤​។ ដំណើរការ​បោះឆ្នោត​ជ្រើសរើស សមាជិក​ក្រុមប្រឹក្សា​មូលនិធិ WADA តំបន់​អាស៊ី ឆ្នាំ​២០២៣​។ របាយការណ៍​របស់ គណ​:​កម្ម​ការ​ហិរញ្ញវត្ថុ តំបន់​អាស៊ី និង​ប្រាក់​វិភាគទាន WADA 2023​។ របាយការណ៍ លទ្ធផល​ស​ន្និ​សី​ទ្ធ​រដ្ឋ​ភាគី លើក​ទី​៨ ស្តីពី​អនុសញ្ញា​ប្រឆាំង​ដូ​ប៉ា UNESCO៕/V​