ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រសួង​ហិរញ្ញវត្ថុ​ជប៉ុន​បាន​និយាយ​កាលពី​ថ្ងៃ​អង្គារ ទី​១៥ មីនា​ថា ជប៉ុន​បាន​សម្រេចចិត្ត​បង្ក​ក​ទ្រព្យសកម្ម​របស់​បុគ្គល​រុស្សី ១៧ នាក់​បន្ថែមទៀត​ដោយ​នាំ​ឱ្យ​ចំនួន​​មហា​សេដ្ឋី​និង​ឥស្សរៈជន​រុស្ស៊ី​សរុប​ដែល​រង​ទណ្ឌកម្ម​ដោយសារ​ការ​លុកលុយ​របស់​រុស្ស៊ី​លើ​អ៊ុយ​ក្រែន​កើនឡើង​ដល់ ៦១ នាក់​។​

​វិធានការ​នេះ​ត្រូវបាន​ធ្វើឡើង​បន្ទាប់​ពី​សហរដ្ឋ​អាម៉េរិក​កាលពី​ថ្ងៃ​សុក្រ​បាន​ដាក់​ទណ្ឌកម្ម​លើ​បុគ្គល​រុស្ស៊ី​មួយ​ចំនួន​រួម​ទាំង​មហាសេដ្ឋី​វិកទ័រ វេ​ក​សែលបឺក (Viktor Vekselberg) និង​សមាជិក ១២ នាក់​នៃ​សភា​ជាន់​ទាប​របស់​រុស្ស៊ី​។​

​ក្រសួង​ហិរញ្ញវត្ថុ​បាន​និយាយថា​លោក​វេ​កសែ​លបឺ​កក៏​ត្រូវបាន​កំណត់គោល​ដៅ​នៅក្នុង​ការដាក់ទណ្ឌកម្ម​ដោយ​ប្រទេស​ជប៉ុន​ក៏ដូចជា​សមាជិក ១១ នាក់​នៃ​សភា​រុស្ស៊ី និង សមាជិកគ្រួសារ ៥​នាក់​របស់​​ធនាគារិក​រុស្ស៊ី​លោក យូ​រី កូវ៉ា​ល់​ឈុ​គ (Yuri Kovalchuk) ។​

​អ្នកនាំពាក្យ​កំពូល​របស់​រដ្ឋាភិបាល​លោក​ហ៊ី​រ៉ូ​កាហ្ស៊ូ ម៉ា​តស៊ូ​ណូ (Hirokazu Matsuno) បាន​និយាយថា ជប៉ុន​នឹង​ធ្វើ​សកម្មភាព​ស្រប​តាម​ក្រុម​ប្រទេស G-7 ផ្សេង​ទៀត​លើ​ការដាក់ទណ្ឌកម្ម​។​

​លោក​ម៉ា​តស៊ូ​ណូ​បាន​ប្រាប់​អ្នកយកព័ត៌មាន​នៅ​ក្នុង​សន្និសីទ​សារព័ត៌មាន​មួយ​ថា “​ចំពោះ​ការដាក់ទណ្ឌកម្ម​នៅពេល​ក្រោយ​ទៀត យើង​នឹង​បន្ត​ឃ្លាំមើល​លក្ខខណ្ឌ ហើយ​រួម​ជាមួយ​ប្រទេស G-7​ផ្សេងទៀត​​នឹង​ឆ្លើយតប​យ៉ាង​សមស្រប​”​។​

​ទីក្រុង​តូ​ក្យូ​ក៏​បាន​ដាក់​ទណ្ឌកម្ម​លើ​ធនាគារ​កណ្តាល​របស់​រុស្ស៊ី​និង​ធនាគារ​ឯកជន​ចំនួន​ប្រាំពីរ​ក្នុងចំណោម​ស្ថាប័ន​ផ្សេង​ទៀត​របស់​រុស្ស៊ី​ក៏​ដូចជា​បុគ្គល​និង​ធនាគារ​និង​អង្គការ​នានា​របស់​បេឡា​រូស​​ជុំវិញ​ការគាំទ្រ​របស់​ខ្លួន​ចំពោះ​ការ​លុកលុយ​របស់​រុស្ស៊ី​លើ​អ៊ុយ​ក្រែន​ផងដែរ​៕

​មហាសេដ្ឋី​រុស្ស៊ី លោក វិកទ័រ វេ​ក​សែលបឺក ជាប់​ទណ្ឌកម្ម​របស់​ជ​ប៉ុន