​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ រុស្ស៊ី​បាន​និយាយ​កាលពី​ថ្ងៃ​អង្គារ​ទី ១៥​ខែ​មីនា​ថា​មិន​មាន​ហានិភ័យ​នៃ​កង្វះ​អាហារ​នៅលើ​ទីផ្សារ​ក្នុងស្រុក​ទេ​ហើយ​បាន​ព្រមាន​អ្នកប្រើប្រាស់​​កុំឱ្យ​ប្រញាប់ប្រញាល់​ស្តុក​ទុក​អាហារ បន្ទាប់​ពី​លោក​ខាងលិច​បាន​ដាក់​ទណ្ឌកម្ម​លើ​រុស្ស៊ី​សម្រាប់​ការ​លុកលុយ​អ៊ុ​យក្រែន​។​

​សេដ្ឋកិច្ច​រុស្ស៊ី​កំពុង​ប្រឈមមុខ​នឹង​វិបត្តិ​ធ្ងន់ធ្ងរ​ចាប់តាំងពី​ការដួលរលំ​នៃ​សហភាពសូវៀត​ឆ្នាំ ១៩៩១ បន្ទាប់​ពី​សហរដ្ឋ​អាម៉េរិក​និង​អឺរ៉ុប​បាន​កាត់​រុស្ស៊ី​ចេញ​ពី​ផ្នែក​នៃ​សេដ្ឋកិច្ច​ពិភពលោក​ដោយ​សារ​តែ​ការ​​លុកលុយ​របស់​ទីក្រុង​មូ​ស្គូ​កាលពី​ថ្ងៃទី ២៤ ខែ​កុម្ភៈ​ទៅលើ​អ៊ុ​យក្រែន​។​

​ឧបនាយករដ្ឋមន្ត្រី​លោកស្រី វិក​តូ​រៀ អា​ប្រាម​ឈិន​កូ (Viktoria Abramchenko) បាន​និយាយ​នៅក្នុង​សេចក្តីថ្លែងការណ៍​មួយ​ថា​”​មិន​មាន​ស្ថានភាព​ហានិភ័យ​នៃ​ការខ្វះខាត​ឬ​ការ​កាត់​​បន្ថយ​ខ្សែសង្វាក់​ផលិត​ផលិតផល​នោះទេ​”​។​

​លោកស្រី​អា​ប្រាម​ឈិន​កូបា​ននិយាយថា “​វា​មិន​មាន​តម្លៃ​ក្នុង​ការជំរុញ​ឱ្យមាន​តម្រូវការ​សិប្បនិម្មិត​ជាមួយ​នឹង​ការទិញ​សម្រាប់​អនាគត​នោះទេ​”​។​

“​យើង​នឹង​តម្រង់​ទិស​ទីផ្សារ​ឡើងវិញ​និង​បង្កើត​ពាណិជ្ជកម្ម​ដែល​មាន​ផលចំណេញ​ទៅវិញទៅមក ពង្រីក​បណ្តាញ​ភាពជា​ដៃគូ​របស់​យើង​ជាមួយ​បណ្តា​ប្រទេស​ជា​មិត្ត​”​។ រុស្ស៊ី​បាន​ចាត់វិធានការ​រួចហើយ​ក្នុង​ការការពារ​ទីផ្សារ​អាហារ​របស់ខ្លួន​នៅក្នុង​ការដាក់ទណ្ឌកម្ម​ពី​លោក​ខាងលិច​។​

​នាយករដ្ឋមន្ត្រី មី​ខា​អ៊ី​ល មី​ស៊ូ​ស្ទីន (Mikhail Mishustin) កាលពី​ថ្ងៃ​ចន្ទ​ទី​១៤​មីនា​បាន​ចុះហត្ថលេខា​លើ​បទបញ្ជា​ហាមឃាត់​ការនាំ​ចេញ​ស្ករស និង​ស្ករ​ឆៅ​រហូត​ដល់​ថ្ងៃទី ៣១ ខែ​សីហា និង ហាមឃាត់​ការនាំចេញ​ស្រូវ​សាលី ស្រូវ​រ៉ៃ (​សម្រាប់​ធ្វើ​នំប៉័ង​) ស្រូវ​បាលី (​សម្រាប់​ផលិត​ស្រា​បៀរ​) និង​ពោតហាវ៉ៃ​ទៅកាន់​រដ្ឋ​សហភាព​សេដ្ឋកិច្ច​អឺ​រ៉ាស៊ី ដែល​នៅ​ជិតខាង​រហូត​ដល់​ថ្ងៃទី ៣០ ខែមិថុនា​៕

រុស្ស៊ី​មិន​ខ្វះ​អាហារ​ផ្គត់ផ្គង់​ក្នុងស្រុក​ទោះ​ជាប់​ទណ្ឌកម្ម​