ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បណ្តាញ​ទូរទស្សន៍ Fox News បាន​និយាយ​កាលពី​ថ្ងៃ​អង្គារ​ទី​១៥​មីនា​ថា អ្នក​ថត​វីដេអូ​ជើង​ចាស់​ម្នាក់ និង​អ្នកកាសែត​អ៊ុយ​ក្រែន​អាយុ ២៤ ឆ្នាំ​ម្នាក់​ដែល​ធ្វើការ​ឱ្យ Fox News ទាំង​ពីរ​នាក់​បាន​ស្លាប់ នៅពេល​ដែល​រថយន្តរ​បស់​ពួក​គេ​រង​ការបាញ់ប្រហារ​នៅ​ជាយក្រុង​គៀវ​។​

​លោក ពៀ​រ៉េ ហ្សាក់​ហ្សេ​ស្គី (Pierre Zakrzewski)​ជនជាតិ​អៀរ​ឡង់​អាយុ ៥៥ ឆ្នាំ និង​នាង អូ​ឡេកសាន់​ដ្រា “​សា​សា​” កូវ​ស៊ី​ណូវ៉ា (Oleksandra “Sasha” Kuvshynova)​បាន​កំពុង​ធ្វើ​ដំ​​ណើ​រកា​លពី​ថ្ងៃ​ចន្ទ​នៅ​សង្កាត់​ហូ​រេ​ន​កា (Horenka) ជាមួយ​អ្នកយកព័ត៌មាន Fox News លោក បិនចា​មីន ហ​ល់ (Benjamin Hall) ដែល​កំពុង​សម្រាក​ព្យាបាល​នៅ​មន្ទីរពេទ្យ​នៅឡើយ​។​

​លោកស្រី ស៊ូ​ហ្សាន ស្កុត (Suzanne Scott) ជា​នាយក​ប្រតិបត្តិ​នៃ​បណ្តាញ​ទូរទស្សន៍​នេះ​បាន​និយាយ​នៅក្នុង​កំណត់ហេតុ​បុគ្គលិក​ថា “​ថ្ងៃនេះ​ជា​ថ្ងៃ​ដ៏​សោកសៅ​សម្រាប់ Fox News Media និង​សម្រាប់​អ្នកសារព័ត៌មាន​ទាំងអស់​ដែល​ប្រថុយ​ជីវិត​របស់​ពួកគេ​ដើម្បី​ផ្តល់ព័ត៌មាន​”​។​

​កាលពី​ថ្ងៃអាទិត្យ អ្នក​ផលិត​ភាពយន្ត​ឯកសារ​លោក ប្រេន រីណូ​ដ (Brent Renaud) ដែល​ជា​អ្នកកាសែត​ជើង​ចាស់​ម្នាក់​ទៀត​ខាង​យក​ព័ត៌មាន​នៅ​តំបន់​សង្គ្រាម​ដែរ​នោះ បាន​ស្លាប់​នៅពេលដែល​​កងកម្លាំង​រុស្ស៊ី​បើក​ការបាញ់ប្រហារ​ទៅលើ​រថយន្ត​របស់​គាត់​នៅ​សង្កាត់​អៀរ​ពី​ន (Irpin) នៅ​ជាយក្រុង​គៀវ​។​

​ការស្លាប់​របស់​អ្នកកាសែត​ទាំង​បី​នាក់​ក្នុង​រយៈពេល​ដ៏​ខ្លី​នេះ​គឺ​គូសបញ្ជាក់​អំពី​គ្រោះថ្នាក់​ដែល​មនុស្ស​ប្រឈម​មុខ​នឹង​សង្គ្រាមរ៉ាំរ៉ៃ​ក្នុងប្រទេស​អ៊ុយ​ក្រែន​សូម្បី​តែ​អ្នក​ដែល​មាន​បទពិសោធន៍​ច្រើន​ក្នុង​​ការរាយការណ៍​ពី​តំបន់​ជម្លោះ​។​

​លោកស្រី សាំ​មឺ ឡូប៉េស (Summer Lopez)​នាយក​កម្មវិធី​សេរីភាព​បញ្ចេញមតិ​នៅ​អង្គការ PEN America បាន​និយាយថា គ្រោះថ្នាក់​សម្រាប់​អ្នកកាសែត​ហាក់​កើនឡើង​ពីមួយថ្ងៃ​ទៅមួយថ្ងៃ ខណៈ​ការប្រយុទ្ធ​គ្នា​ហាក់​កាន់តែ​ឃោរឃៅ​និង​ផ្តោត​លើ​តំបន់​ទីក្រុង​កាន់តែ​ច្រើនឡើង​៕

លោក ពៀ​រ៉េ ហ្សាក់​ហ្សេ​ស្គី (​ឆ្វេង​) និង​នាង​សា​សា​ស្លាប់​កាលពី​ថ្ងៃ​អង្គារ ក្រោយ​ទាហាន​រុស្ស៊ី​បើក​ការបាញ់ប្រហារ​លើ​រថយន្ត​ពួកគេ​នៅ​សង្កាត់​ហូ​រេ​ន​កា​