ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បុគ្គលិក​ទូរទស្សន៍​រដ្ឋ​រុស្ស៊ី​ម្នាក់ ដែល​បាន​រំខាន​កម្មវិធី​ព័ត៌មាន​ផ្សាយ​ផ្ទាល់​ដោយ​តវ៉ា​ប្រឆាំង​នឹង​សង្គ្រាម​ជាមួយ​អ៊ុយ​ក្រែន​ត្រូវបាន​តុលាការ​បង្គា​ប់​ឱ្យ​បង់ប្រាក់​​ពិន័យ​។​

​លោកស្រី ម៉ា​រី​ណា អូវ​ស៊ី​យ៉ាន​នី​កូវ៉ា (Marina Ovsyannikova) ជា​បុគ្គលិក​ប៉ុស្តិ៍​លេខ​១ ដែល​គ្រប់គ្រង​ដោយ​រដ្ឋ​រុស្ស៊ី​បាន​ដើរចូល​ទៅក្នុង​ស្ទូឌីយ៉ូ​ក្នុងអំឡុងពេល​កម្មវិធី​ព័ត៌មាន​ពេល​ល្ងាច​កាលពី​​ថ្ងៃ​ចន្ទ​ទី​១៤​មីនា​ជាមួយនឹង​ផ្ទាំង​បដា​សរសេរថា “​បដិសេធ​សង្គ្រាម​” និង “​ប្រជាជន​រុស្ស៊ី​ចូរ​នាំគ្នា​ប្រឆាំង​នឹង​សង្គ្រាម​”​។​

​ក្នុង​វីដេអូ​ដែល​ថត​មុនពេល​លោកស្រី​ធ្វើ​សកម្មភាព លោកស្រី​បាន​និយាយថា ឪពុក​របស់​លោកស្រី​ជា​ជនជាតិ​អ៊ុ​យក្រែន ហើយ​ម្តាយ​ជា​ជនជាតិ​រុស្ស៊ី​។​

​លោកស្រី​បាន​បន្ថែមថា “​រុស្ស៊ី​គឺជា​ប្រទេស​ឈ្លានពាន ហើយ​មនុស្ស​ម្នាក់​គត់​គឺ​លោក វ្ល៉ា​ឌី​មៀរ ពូ​ទីន​ជា​ទទួលខុសត្រូវ​ទាំងស្រុង​ចំពោះ​ការឈ្លានពាន​នោះ​”​ហើយ​បាន​ជំរុញ​ឱ្យ​ប្រជាជន​រុស្ស៊ី​ចូលរួម​ការតវ៉ា​​ប្រឆាំង​នឹង​សង្គ្រាម​។​

​លោកស្រី​អូវ​ស៊ី​យ៉ាន​នី​កូវ៉ា​បាន​ចំណាយ​ពេល​មួយ​យប់​នៅ​ក្នុង​មន្ទីរឃុំឃាំង​របស់​ប៉ូលិស ហើយ​កាលពី​ថ្ងៃ​អង្គារ តុលាការ​សង្កាត់​អូ​ស្តា​ន​គីណូ (Ostankino) នៃ​ទីក្រុង​មូ​ស្គូ​បាន​បង្គាប់​ឱ្យ​លោកស្រី​បង់​​ប្រាក់​ពិន័យ​ចំនួន ៣០.០០០ រូប៊ិ​ល (​ប្រហែល ២៦០ ដុល្លារ​) ជុំវិញ​ការចោទប្រកាន់​ពី​បទ​រៀបចំ​សកម្មភាព​ដែល​គ្មាន​ការអនុញ្ញាត​ជុំវិញ​ការអំពាវនាវ​របស់​លោក​ស្រី​ឱ្យ​ប្រជាជន​ចូលរួម​ក្នុង​បាតុកម្ម​ប្រឆាំង​​នឹង​សង្គ្រាម​។​

​គណៈកម្មាធិការ​ស៊ើបអង្កេត ដែល​ជា​ទីភ្នាក់ងារ​ស៊ើបអង្កេត​រដ្ឋ​កំពូល​របស់​រុស្ស៊ីក៏​កំពុង​ស៊ើបអង្កេ​តលោក​ស្រីអូវ​ស៊ី​យ៉ាន​នី​កូវ៉ា​លើ​ការចោទប្រកាន់ពីប​ទ​ផ្សព្វផ្សាយ​ព័ត៌មាន​មិន​ពិត​ជា​សាធារណៈ​អំពី​យោធា​​រុស្ស៊ី​ផងដែរ ដែល​ច្បាប់​ដាក់​ទណ្ឌកម្ម​ថ្មី​នេះ​ត្រូវបាន​អនុម័ត​មួយថ្ងៃ​បន្ទាប់​ពី​រុស្ស៊ី​លុកលុយ​អ៊ុយ​ក្រែន​នៅ​ថ្ងៃទី ២៤ ខែ​កុម្ភៈ​។​

​ប្រសិនបើ​ត្រូវបាន​កាត់ទោស​ពី​បទ​ចោទ​នេះ លោកស្រី​អាច​ប្រឈម​នឹង​ការ​ជាប់​ពន្ធនាគារ​រហូត​ដល់ ១៥ ឆ្នាំ​៕

លោកស្រី​អូវ​ស៊ី​យ៉ាន​នី​កូវ៉ា​អាច​ជាប់គុក​១៥​ឆ្នាំ​បើ​គេ​រកឃើញ​កំហុស​ពី​បទ​ផ្សព្វផ្សាយ​ព័ត៌មាន​មិន​ពិត​ជា​សាធារណៈ​