​ប្រែ​សម្រួលៈ​បំណង​(Xinhua,ST)៖ អ្នកនាំពាក្យ​ក្រសួងការបរទេស​ចិន​កាលពី​ថ្ងៃ​អង្គារ​ទី​១៥​មីនា​បាន​ទទូច​សុំ​អោយ​អាម៉េរិក​ខិតខំ​ខ្លាំង​ឡើង​ដើម្បី​សម្រាល​ស្ថានការណ៍​នៅ​អ៊ុ​យក្រែន​។​

​អ្នកនាំពាក្យ​លោក ចា​វ លី​ជៀន​(Zhao Lijian)​បាន​ធ្វើ​ការស្នើ​សុំ​ដូច្នេះ​ក្នុង​សន្និសីទកាសែត​ប្រចាំ​ថ្ងៃ​មួយ​នៅ​ក្រុង​ប៉េកាំង ក្នុង​ការឆ្លើយតប​ទៅនឹង​សំណួរ​មួយ​ពាក់ព័ន្ធ​នឹង​ការចោទប្រកាន់​កាលពី​​ពេល​ថ្មីៗ​ចេញ​ពី​ពួក​មន្ត្រី​អាម៉េរិក ស្តី​ពី​ទំនាក់ទំនង​ចិន​-​រុស្ស៊ី​និង​សង្គ្រាម​អ៊ុ​យក្រែន​។​

​អ្នកនាំពាក្យ​លោក ចា​វ លី​ជៀន ថា​អាម៉េរិក​ប្រឌិត​និង​ផ្សព្វផ្សាយ​ព័ត៌មាន​មិន​ពិត​ពាក់ព័ន្ធ​នឹង​រុស្ស៊ី​សុំ​ជំនួយ​ពី​ចិន​

​លោក​ចាវ​បាន​និយាយថា រដ្ឋាភិបាល​អាម៉េរិក​បាន​ជូនដំណឹង​ទៅ​អង្គការ​ណា​តូ​និង​សម្ពន្ធមិត្ត​អាស៊ី​ខ្លះ​របស់​ខ្លួន​ថា រុស្ស៊ី​បាន​ស្នើសុំ​ជំនួយ​យោធា​និង​សេដ្ឋកិច្ច​ពី​ចិន ហើយ​ចិន​បាន​យល់ព្រម​តែ​នឹង​ធ្វើ​ជា​​បដិសេធ​វា​ជា​សាធារណៈ​។​

​ដោយ​បាន​បញ្ជាក់ថា រុស្ស៊ី​បាន​បដិសេធ​រួច​ហើយ​អំពី​ការសុំ​ជំនួយ​ពី​ចិន លោក​ចាវ​បាន​និយាយថា សហរដ្ឋ​អាម៉េរិក​ប្រឌិត​និង​ផ្សព្វផ្សាយ​ព័ត៌មាន​មិន​ពិត​ពី​ពេល​មួយ​ទៅ​ពេល​មួយ ហើយ​អំពើ​ដូច្នេះ​«​វា​មិន​វិជ្ជាជីវៈ អសីលធម៌​និង​ជា​ការ​មិន​ទទួលខុសត្រូវ​។​ការ​ប្រតិបត្តិ​របស់​គេ​គ្រាន់តែ​ធ្វើអោយ​អាម៉េរិក​ខ្លួនឯង​បាត់បង់​ជំនឿ​ជឿជាក់​ពី​អ្នក​ដទៃ និង​បាត់បង់​កិត្តិយស​នៅលើ​ឆាក​អន្តរជាតិ​»​។​

​លោក​ចាវ បាន​បន្ថែមថា អាម៉េរិក​គួរ​ឆ្លុះបញ្ចាំង​អំពី​តួនាទី​របស់​ខ្លួន​នៅក្នុង​ដំណើរការ​វិវត្តន៍​សភា​ព​ការណ៍​នៃ​វិបត្តិ​អ៊ុ​យក្រែន និង​ធ្វើ​ការខិតខំ​ធំដុំ​ឡើង​ដើម្បី​សម្រាល​សភាពការណ៍​នៅ​អ៊ុ​យក្រែន​។​

​លោក​ក៏​បាន​ច្រានចោល​របាយការណ៍​សារព័ត៌មាន​ដែល​និយាយ​យោង​តាម​មន្ត្រី​អាម៉េរិក​ដែលថា រដ្ឋាភិបាល​ក្រុង​ប៉េកាំ​ង​បាន​ដឹង​ផែនការ​របស់​រុស្ស៊ី​អំពី​ការវាយប្រហារ​អ៊ុយ​ក្រែនថា​អាចនឹង​កើតឡើង​​ឆាប់ៗ​និង​បាន​ស្នើសុំ​អោយ​ប្រធានាធិបតី​ពូ​ទីន​ពន្យារ​ពេល​បើក​ប្រតិបត្តិការ​យោធា​ចូល​អ៊ុយ​ក្រែន​រហូតដល់​ពេល​ចប់កា​រប្រ​កួត​កីឡា​អូឡាំពិក​ក្រុង​ប៉េកាំង​ទៀតផង​។​

​ក្នុង​ថ្ងៃ​អង្គារ​នេះដែរ រដ្ឋមន្ត្រីការបរទេស​ចិន​លោក វ៉ាង​យី បានបញ្ជាក់​ថា ចិន​មិនបាន​ចូល​ពាក់ព័ន្ធ​ក្នុង​ជម្លោះ​រវាង​រុស្ស៊ី​និង​អ៊ុយ​ក្រែនទេ និង​ក៏​មិន​ចង់អោយ​ទណ្ឌកម្ម​ប៉ះពាល់​ខ្លួន​ដែរ​។​

​ក្នុងអំឡុង​កិច្ចសន្ទនា​តាម​ទូរស័ព្ទ​ជាមួយ​សម​ភាគី​អេ​ស្ប៉ា​ញ កាលពី​ថ្ងៃ​ចន្ទ លោក​វ៉ាង​បាន​និយាយថា រដ្ឋាភិបាល​ក្រុង​ប៉េកាំ​ង​បាន​និង​កំពុង​ជំរុញ​អោយ​មាន​កិច្ចពិភាក្សា​«​តាមផ្លូវ​វា​ផ្ទាល់​»​ចាប់តាំងពី​​ពេល​ផ្ទុះ​សង្គ្រាម​មក​ម្ល៉េះ និង​បាន​បន្ទោស​ប្រទេស​ខ្លះ​ថា​«​មួលបង្កាច់​ចិន​»​។​

​ទីភ្នាក់ងារ​សារព័ត៌មាន​ស៊ីន​ហួរ​ផ្លូវការ​របស់​ចិន​បាន​ស្រង់​សម្តី​លោក​វ៉ាង​ដែល​បាន​និយាយថា​«​ចិន​មិនជា​ភាគី​ក្នុង​វិបត្តិ​នេះ​ផ្ទាល់​ទេ​និង​ក៏​មិន​ចង់​រង​ទណ្ឌកម្ម​ថែមទៀត​ដែរ​។​ចិន​មាន​សិទ្ធិ​ការពារ​សិទ្ធិ​​និង​ផលប្រយោជន៍​ស្របច្បាប់​របស់​ខ្លួន​។​ចិន​និង​អាម៉េរិក​គួរ​ពង្រឹង​ការចរចា​និង​កិច្ចសហប្រតិបត្តិការ ចាត់ចែង​ការខ្វែងគំនិត​គ្នា​អោយបាន​ត្រឹមត្រូវ​និង​រារាំង​ជម្លោះ​និង​ការប្រឈមមុខគ្នា​»​។​

​ការលើកឡើង​របស់​មន្ត្រីការទូត​ចិន​កើតឡើង​ក្រោយ​ជំនួប​កំរិត​ខ្ពស់​នៅ​ទីក្រុង​រ៉ូម​រវាង​មន្ត្រីការទូត​កំពូល​ចិន​លោក យ៉ាង យី​ជិ និង​ទីប្រឹក្សា​សន្តិសុខ​ជាតិ​អាម៉េរិក​អស់​ពេល​ជាង​ប្រាំពីរ​ម៉ោង​កាលពី​​ថ្ងៃ​ចន្ទ​ជុំវិញ​សង្គ្រាម​អ៊ុយ​ក្រែ​ន​និង​បញ្ហា​ទ្វេភាគី​មួយចំនួន​៕

រដ្ឋមន្ត្រីការបរទេស​ចិន​លោក វ៉ាង​យី ថា​រដ្ឋាភិបាល​ក្រុង​ប៉េកាំង​ខិតខំ​ជំរុញ​ការចរចា​អំពី​វិបត្តិ​អ៊ុ​យក្រែន និង​ចិន​មិន​ពាក់ព័ន្ធ​ក្នុង​ជម្លោះ​នេះ​ទេ​