​ប្រែ​សម្រួលៈ​បំណង​(​ដេល្លី​ម៉េល​)៖ មន្ត្រី​ក្រសួង​មហាផ្ទៃ​អ៊ុយ​ក្រែន​បាន​ផ្សាយ​ក្នុង​Telegram​ថា ឧត្តមសេនីយ៍ទោរុ​ស្ស៊ី​លោក អូ​ឡេក មី​តយ៉ា​អេវ​(Oleg Mityaev)​បាន​ស្លាប់​ក្នុងអំឡុងពេល​វាយ​សំរុកចូល​​ទីក្រុង​ម៉ា​រី​វ​ប៉ូល​កាលពី​ថ្ងៃ​អង្គារ​ទី​១៥​មីនា​។​

មី​តយ៉ា​អេវ(ស្តាំ) ជាឧត្តមសេនីយ៍រុស្ស៊ីទី៤ដែលពលីជីវិតក្នុងសមរភូមិអ៊ុយក្រែន

ចំណែក​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី ក៏​បាន​រាយការណ៍​អំពី​ការស្លាប់​ឧត្តមសេនីយ៍​រុស្ស៊ី​ម្នាក់​ទៀត​ក្នុង​សុន្ទ​រ​កា​ថា​ពេលយប់​របស់លោក តែ​មិន​ទាន់​មាន​ការបញ្ជាក់​ពី​រុស្ស៊ី​អំពី​មរណ​​ភាព​របស់​លោក​ឡើយ​ទេ​។​

​មី​តយ៉ា​អេវ អាយុ​៤៦​ឆ្នាំ ជា​មេបញ្ជាការ​កងពល​រថ​ក្រោះ​ទី​១៥០​និង​ធ្លាប់​ប្រឡូក​ក្នុង​សង្គ្រាម​ស៊ី​រី​ ឥឡូវបញ្ចប់ជីវិតនៅអ៊ុយក្រែន

​ក្នុងពេល​ជាមួយគ្នា​មាន​សេចក្តីរាយការណ៍​ថា​ទាហាន​រុស្ស៊ី​បាន​ចាប់​យក​មន្ទីរពេទ្យ​មួយ​នៅ​ក្រុង​ម៉ា​រី​វ​ប៉ូល​និង​ចាប់​មនុស្ស​ប្រមាណ​៥០០​ជា​ចំណាប់ខ្មាំង​ក្នុងអំឡុងពេល​ការវាយប្រហារ​មួយទៀត​លើ​ទីក្រុង​​កំពង់ផែ​ភាគខាងត្បូង​កាលពី​យប់​ថ្ងៃ​អង្គារ នេះ​បើ​តាម​ការបញ្ជាក់​ពី​មន្ត្រី​ប្រចាំ​តំបន់​អ៊ុ​យក្រែន​។​

​គី​រី​ឡេន​កូ​(Kyrylenko) មន្ត្រី​ប្រចាំ​តំបន់​បាន​សរសេរ​បង្ហោះ​ក្នុង​Telegram​ថា មនុស្ស​ជាង​៤០០​នាក់​នៅ​តាម​ផ្ទះ​ក្នុង​សង្កាត់​ក្បែរ​ខាង​មន្ទីរពេទ្យ​តំបន់ ត្រូវ​ទាហាន​រុស្ស៊ី​ចាប់បង្ខំ​អោយ​ចូល​ក្នុង​មន្ទីរ​​ពេទ្យ​។​គ្រូពេទ្យ​និង​អ្នកជំងឺ​ប្រមាណ​១០០​នាក់​ទៀត​ស្ថិត​នៅក្នុង​មន្ទីរពេទ្យ​។​ទាហាន​រុស្ស៊ី​ប្រើប្រាស់​ពួកគេ​ជា​ខែល​មនុស្ស​ហើយ​មិន​អនុញ្ញាត​អោយ​ពួកគេ​ចេញ​ទេ​។​

​លោក គី​រី​ឡេន​កូ បាន​បន្ថែមថា អាគារ​មន្ទីរពេទ្យ​រង​ការបាញ់​ផ្លោង​ខូចខាត​ជា​ខ្លាំង​តែ​ពួក​គ្រូពេទ្យ​នៅ​ព្យាយាម​ព្យាបាល​អ្នកជំងឺ​នៅ​ជាន់​ក្រោម​។​

​ក្នុងពេល​ជាមួយគ្នា ឧត្តមសេនីយ៍អ៊ុ​យក្រែន​និយាយថា ទាហាន​រុស្ស៊ី​កំពុង​ព្យាយាម​បិទ​ខ្ទប់​ទីក្រុង​នេះ​មក​ពី​ជាយក្រុង​ពី​ទិស​ខាងលិច និង​ខាងកើត​

​កាលពី​យប់​ថ្ងៃ​អង្គារ​ផងដែរ កងកម្លាំង​អ៊ុយ​ក្រែន​បាន​វាយ​រុញច្រាន​កង​កម្លាំង​រុស្ស៊ី​នៅ​ទីក្រុង​ខា​គី​វ​(Kharkiv)​។​

​បើ​តាម​មន្ត្រី​យោធា​អាម៉េរិក​ជាន់ខ្ពស់​ម្នាក់ ទាហានជើងគោក​រុស្ស៊ី​បានធ្វើការ​រុលទៅមុខ​មាន​កំរិត​នៅ​២៤​ម៉ោង​ចុងក្រោយ​នេះ​នៅក្នុង​ការប៉ុនប៉ង​របស់​គេ​ដើម្បី​ចាប់​យក​ទីក្រុង​ធំៗ​នៅ​អ៊ុ​យក្រែន​។​

​សូមបញ្ជាក់​ថា ប្រធានាធិបតី​អាម៉េរិក ចូ បៃ​ដិនជិ​ត​ប្រកាស​ផ្តល់​ជំនួយ​ជិត​១​ពាន់​លាន​បន្ថែម​ដល់​អ៊ុយ​ក្រែន​នៅក្នុង​សុន្ទរកថា​របស់​លោក​នៅ​ថ្ងៃ​ពុធ​ស្តី​ពី​ស្ថានការណ៍​អ៊ុ​យក្រែន​។​ជំនួយ​នេះ​ចេញ​​ពី​ប្រាក់​ជំនួយ​យោធា​១៣,៦​ពាន់​លាន​ដុល្លារ​ដែល​អាម៉េរិលៃ​ទុក​សំរាប់​អ៊ុ​យក្រែន​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី ត្រូវ​ថ្លែង​ទៅ​កាន់​សភា​អាម៉េរិក​នៅ​ថ្ងៃ​ពុធ និង​ត្រូវ​គេ​រំពឹង​ថា​លោក​ជា​ថ្មី​ទៀត​នឹង​អំពាវនាវ​អោយ​អាម៉េរិក​និង​លោកខាងលិច​បញ្ជូន​យន្តហោះ​ប្រយុទ្ធ​​អោយ​អ៊ុ​យក្រែន ឬ​បង្កើត​តំបន់​ហាម​ហោះហើរ​លើ​អ៊ុ​យក្រែន ជា​អ្វី​ដែល​រដ្ឋាភិបាល​ក្រុង​វ៉ាស៊ីនតោន​បាន​ច្រានចោល​រួចមកហើយ​។​

​រដ្ឋាភិបាល​ក្រុង​វ៉ាស៊ីនតោន​កំពុង​សម្លឹង​ទៅរក​ការបញ្ជូន​បន្ថែម​សព្វាវុធ​ប្រើ​មាន​ប្រសិទ្ធភាព​នា​ពេលកន្លងមក រួម​មាន​កាំជ្រួច​កំទេច​រថក្រោះ​និង​ប្រព័ន្ធ​ការពារ​ដែនអាកាស ៕

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី ត្រូវ​ថ្លែង​ទៅ​កាន់​សភា​អាម៉េរិក​នៅ​ថ្ងៃ​ពុធ