ដោយៈ សុវណ្ណ​កុម្ភៈ / ភ្នំពេញៈ នៅ​ចុងខែ​មីនា​នេះ អ្នក​ប្រដាល់សកល ជម្រើសជាតិ​កម្ពុជា ចំនួន​៣​រូប និង​គ្រូបង្វឹក​មួយ​នាក់ នឹង​ចេញទៅ​ហ្វឹកហាត់ រយៈពេល​ខ្លី នៅ​ប្រទេស​ថៃ ។​

​លោក ប៊ុ​យ សុ​ភ័​ណ្ឌ អគ្គលេខាធិការ​សហព័ន្ធ បានបញ្ជាក់​ថាៈ ការបោះ​ជំរុំ ហ្វឹកហាត់ នៅ​ថៃ​នេះ រួមមាន កីឡាករ កីឡាករ សៅ រង្ស៊ី ប្រភេទ​ទម្ងន់ ៥៧ គីឡូក្រាម​, កីឡាករ ទូច ដេវីត ប្រភេទ​ទម្ងន់ ៦០ គីឡូក្រាម និង​កីឡាករ វី សុ​ភ័ស ប្រភេទ​ទម្ងន់ ៦៩ គីឡូក្រាម ចំពោះ គ្រូបង្វឹក​មួយរូប ដែល​ត្រូវ​ដឹកនាំ​គឺ​លោក ជ័យ ណា​រ៉ា​។​

​លោក​បាន​បន្ដថាៈ ការបោះ​ជំរុំ​ហ្វឹកហាត់​នេះ ម្ចាស់ផ្ទះ​ថៃ គឺជា​អ្នក​ឧបត្ថម្ភ ថ្លៃ​សំបុត្រ​យន្ដហោះ ការហូបចុក និង​ស្នាក់នៅ គ្រា​ដែល​អនុប្រធាន​សហព័ន្ធ លោក ខេ​ស៊ី បា​ណេ​ត ឧបត្ថម្ភ​លើ ការទិញ​ធានារ៉ាប់រង ដល់​កីឡាករ និង​ការពិនិត្យ​សុខភាព សម្រាប់​ចូលរួម​ការប្រកួត​ជាដើម​។ ក្រៅពី​ការ​ហ្វឹក ហាត់ កីឡាករ​ប្រដាល់សកល​ជម្រើសជាតិ​កម្ពុជា ក៏​នឹង​ទទួលបាន​ឱកាស ចូលរួម​ប្រកួត Thailand Open International Boxing Tournament 2022 នៅ​ខេត្ត​ភូ​កេ​ត (Phuket) ចាប់ពី​ថ្ងៃទី ១-១០ ខែមេសា ដើម្បី​ពង្រឹងសមត្ថភាព មុន​ត្រឡប់មក​កម្ពុជា និង​ត្រៀម​ការប្រកួត​កីឡា​ស៊ី​ហ្គេម នៅ​វៀតណាម ទៀតផង​។​

​លោក ប៊ុ​យ សុ​ភ័​ណ្ឌ បាន​ចាត់ការ​បោះជំរុំ​ហ្វឹកហាត់ និង​ការប្រកួត​នេះ គឺជា​ឱកាស​ដ៏​សំខាន់ សម្រាប់​ក្រុម​ជម្រើសជាតិ ប្រដាល់សកល ក្នុងការ​ពង្រឹង និង​វាស់​ស្ទង់​កម្រិត​សមត្ថភាព បច្ចេកទេស​របស់ខ្លួន ដើម្បី​ត្រៀមលក្ខណៈ ចូលរួម​ការប្រកួត​កីឡា​ស៊ី​ហ្គេម នៅ​វៀតណាម ដែល​ត្រូវ​ប្រកួត​ពីថ្ងៃ​ទី​១៦ ដល់​ថ្ងៃទី​២២ ខែឧសភា ឆ្នាំ​២០២២​។

​សូមបញ្ជាក់ថា សម្រាប់​ការត្រៀម​ចូលរួម ប្រកួត​កីឡា​ស៊ី​ហ្គេម នៅ​វៀតណាម សហព័ន្ធ​កីឡា ប្រដាល់សកល​កម្ពុជា គ្រោង​បញ្ជូន​ក្រុម​ជម្រើសជាតិ​របស់ខ្លួន ៨ រូប ទៅ​ចូលរួម គឺមាន កីឡាករ ៦​រូប និង​កីឡាការិនី ២​រូប​៕/V​-PC