​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកកាសែត​ម្នាក់​ទៀត​ត្រូវបាន​បាញ់សម្លាប់​ក្នុងប្រទេស​ម៉ិក​ស៊ិក​កាលពី​ថ្ងៃ​អង្គារទី​១៥​មីនា​ដែល​វា​ជា​ឃាតកម្ម​ទី​ប្រាំបី​មកទល់​ពេល​នេះ​ក្នុងឆ្នាំនេះ​នៅ​ក្នុងការ​​សម្លាប់​មិន​ធ្លាប់​មាន​ពីមុនមក ដែល​បាន​ធ្វើឱ្យ​ម៉ិក​ស៊ិ​កក្លាយ​ជា​កន្លែង​គ្រោះថ្នាក់​បំផុត​សម្រាប់​សារព័ត៌មាន​។​

​ការសម្លាប់​អ្នកយកព័ត៌មាន​និង​អ្នក​ថតរូប​ក្នុងឆ្នាំនេះ​នៅក្នុង​ប្រទេស​ម៉ិក​ស៊ិក​បាន​កើតឡើង​ស្ទើរតែ​ក្នុង​អត្រា​ម្នាក់​ក្នុង​មួយ​សប្តាហ៍ បើទោះបីជា​មាន​ការអះអាង​ពី​រដ្ឋាភិបាល​ថា​ស្ថានការណ៍​នេះ​គឺ​ស្ថិត​​ក្រោម​ការគ្រប់គ្រង​ក៏​ដោយ​។​

​រដ្ឋអាជ្ញា​នៅ​រដ្ឋ​មី​ឆាវ​ខេន (Michoacan) ភាគ​ខាងលិច​បាន​និយាយថា អ្នកយក​ព័ត៌មាន​ឈ្មោះ អា​ម៉ាន់​ដូ លី​ណា​រ៉េ​ស (Armando Linares)​ត្រូវបាន​បាញ់សម្លាប់​កាលពី​ថ្ងៃ​អង្គារ​ទី​១៥​មីនា​នៅ​ផ្ទះ​​មួយ​ក្នុង​ទីក្រុង​ហ្ស៊ី​តា​គូ​រ៉ូ (Zitacuaro) នៅ​ជិត​តំបន់ភ្នំ​សម្បូរ​មេអំបៅ​នៅ​ភាគ​ខាងលិច​ទីក្រុង​ម៉ិក​ស៊ី​កូ​។​

​តំបន់​នេះ​ត្រូវបាន​ញាំញី​ដោយ​ការកាប់​ឈើ​ខុសច្បាប់​និង​ក្រុម​ឧក្រិដ្ឋ​គ្រឿងញៀន ជម្លោះ​អភិបាលកិច្ច​ក្នុង​តំបន់ និង​ការកាប់​បំផ្លាញ​ព្រៃឈើ ដែល​ពាក់ព័ន្ធ​នឹង​ការពង្រីក​ផលិតកម្ម​ផ្លែ​បឺរ​។​ការកាប់​ឈើ​​បាន​បំផ្លាញ​ព្រៃ​ស្រល់ ជា​កន្លែង​ដែល​មេ​អំបៅ​ចំណាយ​ពេល​រដូវរងា បន្ទាប់ពី​ធ្វើ​ចំណាកស្រុក​ពី​សហរដ្ឋ​អាម៉េរិក​និង​កាណាដា​។​

​លោក​លី​ណា​រ៉េ​ស​បាន​បម្រើការ​ជា​ចាងហ្វាង​ការផ្សាយ​នៅ​វេបសាយ Monitor Michoacan​ដែល​កាលពី​ថ្ងៃ​អង្គារ​បាន​បន្ត​បង្ហាញ​អត្ថបទ​មួយ​ដែល​គាត់​បាន​សរសេរ​អំពី​ពិធីបុណ្យ​វប្បធម៌​អប​​អរសាទរ​មេអំបៅ​។​

​មិន​មាន​ព័ត៌មាន​ភ្លាមៗ​អំពី​ហេតុផល​ដែល​អាច​កើតមាន​នៅក្នុង​ការសម្លាប់​នេះ​ទេ ប៉ុន្តែ​លោក​លី​ណា​រ៉េ​ស​គឺជា​បុគ្គលិក​ទី​ពីរ​នៅ​វេបសាយ Monitor Michoacan ដែល​ត្រូវបាន​សម្លាប់​នៅ​ឆ្នាំ​នេះ​។​

​លោក រ៉ូបឺតូ ថូ​ឡេ​ដូ (Roberto Toledo) ដែលជា​អ្នក​កាន់​កាមេរ៉ា​និង​ជា​អ្នក​កាត់​វីដេអូ​សម្រាប់​វេបសាយ Monitor Michoacan ត្រូវបាន​បាញ់សម្លាប់​នៅ​ថ្ងៃទី ៣១ ខែ​មករា ខណៈ​ដែល​គាត់​ត្រៀម​សម្រាប់​បទសម្ភាសន៍​មួយ​នៅ​ទីក្រុង​ហ្ស៊ី​តា​គូ​រ៉ូ​៕

​លោក អា​ម៉ាន់​ដូ លី​ណា​រ៉េ​ស ជា​ចាងហ្វាង​ការផ្សាយ​របស់​វេបសាយ Monitor Michoacan ត្រូវ​បាន​បាញ់​ស្លាប់​កាលពី​ថ្ងៃ​អង្គារ