ដោយៈ គង់​ហេង / កំពង់ចាមៈ លទ្ធផល​ការងារ​អនុវត្ត ច្រកចេញចូល​តែមួយ របស់​រដ្ឋបាល ខេត្តកំពង់ចាម គឺ​បានផ្តល់​សេវា​ជូន ប្រជាពលរដ្ឋ​សរុប ចំនួន ២២៣.៥១៩ សេវា និង​ទទួល បាន​ចំណូល​សរុប ចំនួន ៥.៥៦០.៦៨៤.២៩៩ រៀល រយៈពេល​មួយឆ្នាំ​២០២១ កន្លងទៅនេះ​។​

​នេះ​ជាការ​បញ្ជាក់ នៅក្នុង​សន្ទរកថា កម្រាស់​ជិត ប្រាំពីរ ទំព័រ របស់លោក អ៊ុន ចាន់​ដា អភិបាលខេត្ត​កំពង់ចាម ក្នុង​ពិធី​បើក​សន្និបាត បូកសរុប​លទ្ធផល​ការងារ ឆ្នាំ​២០២១ និង​លើក​ទិសដៅ​ការងារ ឆ្នាំ​២០២២ បានធ្វើ​ឡើង នៅក្នុង​សាលា ខេត្ត​នេះ កាលពី​ថ្ងៃទី​១៥ មីនា ម្សិលមិញ​។​

​លោក​អភិបាលខេត្ត​កំពង់ចាម បានបញ្ជាក់​ថាៈ ក្នុងនោះ មាន​អង្គភាព​ច្រក ចេញចូល​តែមួយ សាលាខេត្ត​កំពង់ចាម និង​ការិយាល័យ​ច្រកចេញចូល តែមួយ​ក្រុង ស្រុក​ទាំង ១០ ។ ដោយមាន​គោលបំណង លើកកម្ពស់​គុណភាព ប្រសិទ្ធភាព តម្លាភាព និង​គណនេយ្យភាព តាមរយៈ​ការប្រមូលផ្តុំ ការផ្តល់ សេវា​រដ្ឋបាល លើ​វិស័យ​នានា នៅនឹងកន្លែង​តែមួយ ធានា​នូវ​ការ​បង្ខិត​សេវា កៀក​នឹង​ជិត​ប្រជាពលរដ្ឋ​។​

​លោក​បានបញ្ជាក់​បន្ថែម​ថាៈ បើទោះជា​ស្ថានភាព នៃ​ការឆ្លង​រីក​រាលដាល ជំងឺ​កូ​វីដ ១៩ ក្នុង​ឆ្នាំ​២០២១ បង្កឱ្យមាន​ការរាំងស្ទះ ដល់​ដំណើរការ​ជួបជុំ​នានា យ៉ាងណាក្តី ក៏​ដំណើរ​ការផ្តល់សេវា ជូន​ប្រជាពលរដ្ឋ តាមរយៈ​អង្គភាព ច្រកចេញចូល​តែមួយ សាលាខេត្ត បានផ្តល់​សរុប​ចំនួន ៣២.៨៩៥ សេវា និង​ទទួលបាន​ចំណូល​សរុប ចំនួន ២.៥៦៤.០៩៦.១៣៥ រៀល​។​

​លោក​បាន​បន្តថាៈ ចំណែក​ការិយាល័យ​ច្រកចេញចូល​តែមួយ តាម​បណ្តា​ស្រុក ក្រុង​ទាំង ១០ ផ្តល់​សេវា​សរុប ជូន​ប្រជាពលរដ្ឋ ចំនួន ១៩០.៦២៤ សេវា និង​ទទួលបាន​ចំណូល​សរុប ចំនួន ២.៩៩៦.៥៨៨.១៣៥ រៀល​៕/V​-PC