​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ទាំងនេះ​គឺជា​រូបភាព​ដំបូង​នៃ​ប្រព័ន្ធ​មី​ស៊ី​ល Patriot របស់​សហរដ្ឋ​អាម៉េរិក ដែល​ដំឡើង​នៅ​មូលដ្ឋាន​ទ័ពអាកាស​ប៉ូឡូញ​ស្ថិតនៅ​ចម្ងាយ​ត្រឹមតែ ៨០ គីឡូម៉ែត្រ​ពី​ព្រំដែន​អ៊ុ​យក្រែន​។​

​ប្រព័ន្ធ​ការពារ​អាកាស​បាញ់​ពី​ដី​ទៅ​លើ​មេឃ​នេះ​ត្រូវបាន​ដំឡើង​នៅ​ជុំវិញ​បរិវេណ​អាកាសយានដ្ឋាន​អន្តរជាតិ​រ៉េ​ស​ហ្សូ​វ​-​ចា​សុន​កា (Rzeszow-Jasionka)​បន្ទាប់​ពី​កង​យន្តហោះ​របស់​កងទ័ព​​អាកាស​អាម៉េរិក (USAF)​បាន​ហោះ​ចេញ​ពី​មូលដ្ឋាន​រ៉ា​ម​ស្តេន (Ramstein) ប្រទេស​អាល្លឺម៉ង់​។​

​រឿង​នេះ​កើតឡើង​បន្ទាប់​ពី​ទីបញ្ជាការ​អឺរ៉ុប​របស់​សហរដ្ឋ​អាម៉េរិក (EUCOM) បាន​និយាយ​កាលពី​ថ្ងៃ​អង្គារ​សប្តាហ៍​មុន​ថា ខ្លួន​នឹង​ដំឡើង​ប្រព័ន្ធ​មី​ស៊ី​ល Patriot នៅក្នុង​ប្រទេស​ប៉ូឡូញ​សម្រាប់​ជា “​ការ​ដាក់​ពង្រាយ​ដើម្បី​ការពារ​ខ្លួន​” បន្ទាប់ពី​មាន​ការឈ្លានពាន​អ៊ុយ​ក្រែន​ដោយ​កងកម្លាំង​រុស្ស៊ី​។​

​សន្តិសុខ​បាន​កើនឡើង​គួរ​ឱ្យ​កត់សម្គាល់​នៅ​ជុំវិញ​អាកាសយានដ្ឋាន ដែល​ត្រូវបាន​ប្រើ​ដោយ​ក្រុមហ៊ុន​អាកាសចរណ៍​ស៊ីវិល​ដូចជា Ryanair និង Wizz Air​ដែល​ធ្វើ​ការហោះហើរ​នៅ​ទីនោះ​​ពី​អាកាសយានដ្ឋាន​អ៊ី​សមី​តលែ​ន (East Midlands) ម៉ាន់​ឆេ​ស្ទើ (Manchester), ប្រ៊ី​ស្តុល (Bristol) និង​លូ​តុ​ន (Luton) នៅ​ចក្រភព​អង់គ្លេស​។​

​ជើង​ទម្រ​បាញ់​មី​ស៊ី​ល​ទាំងនោះ​បាន​តម្រង់ទិស​ទៅ​ខាងកើត​ឆ្ពោះទៅ​អ៊ុយ​ក្រែ​នហើយ​កម្រិត​ប្រកាសអាសន្ន​នៅ​អាកាសយានដ្ឋាន​ត្រូវបាន​បង្កើន​បន្ទាប់ពី​ការវាយប្រហារ​កាលពី​ថ្ងៃ​អាទិត្យ​ដោយ​រុស្ស៊ី​​នៅឯ​បរិវេណ​ហ្វឹកហាត់​យោធា​នៅ​តំបន់​យ៉ា​វ៉ូ​រី​វ (Yavoriv)​ដែល​មាន​ចម្ងាយ​ត្រឹមតែ ១១២ គីឡូម៉ែត្រ​ឆ្លងកាត់​ព្រំដែន​ប៉ូឡូញ​-​អ៊ុ​យក្រែន​។​

​ការវាយប្រហារ​នេះ​បាន​នាំមក​នូវ​ការបាញ់​មី​ស៊ី​ល​ស្រោច​ទៅលើ​មជ្ឈមណ្ឌល​រក្សា​សន្តិភាព​និង​សន្តិសុខ​អន្តរជាតិ​ក្នុង​ទីក្រុង​យ៉ា​រ៉ូវី​វ (Yaroviv)​ដែល​បណ្តាល​ឱ្យ​មាន​ការ​ខូចខាត​យ៉ាង​ធំធេង​​ដល់​តំបន់​នេះ ហើយ​បណ្តាល​ឱ្យ​មនុស្ស​ស្លាប់​យ៉ាងហោចណាស់ ៣៥ នាក់ និង​របួស ១៣៤ នាក់​៕

​ប្រព័ន្ធ​មី​ស៊ី​ល Patriot ត្រូវបាន​ដំឡើង​នៅ​ជុំវិញ​បរិវេណ​អាកាសយានដ្ឋាន​អន្តរជាតិ​រ៉េ​ស​ហ្សូ​វ​-​ចា​សុន​កា