ដោយ​:​ ពៅ​និមល​/​ភ្នំពេញៈ​ មន្ត្រី​ជាន់​ខ្បស់​នៃ​រដ្ឋាភិបាល​កម្ពុជា បាន​អះអាងថា គិត​មកដល់ពេលនេះ ទោះបីជា​បញ្ហា​សង្គ្រាម​រវាង​ប្រទេស​អ៊ុយ​ក្រែ​ន និង​ប្រទេស​រុស្ស៊ី​បានកើត​ឡើង​យ៉ាណា​ក៏ដោយ ក៏​កម្ពុជា​មិន​រង​ផលប៉ះពាល់​ទេ​ទៅដល់​ការនាំ​ទំនិញ​ចេញ​នោះទេ ពោលគឺ​នៅតែ​បន្តសកម្មភាព​ជាធម្មតា​។

លោក ប៉ែន សុ​វិជាតិ អនុរដ្ឋលេខាធិការ និង​ជា​អ្នកនាំពាក្យ​ក្រសួងពាណិជ្ជកម្ម នៅក្នុង​សន្និសីទកាសែត​មួយ កាលពី​កន្លងទៅនេះ បាន​មានប្រសាសន៍ថា ទាក់ទិន​បញ្ហា​សង្គ្រាម​រវាង​រុស្ស៊ី និង​អ៊ុយ​ក្រែ​ន មិនទាន់​ជះ​ផល​អាក្រក់ ឬ​វិជ្ជមាន​ទេ​មកដល់​កម្ពុជា លើកលែងតែ​តម្លៃ​ប្រេងឥន្ធនៈ​ប៉ុណ្ណោះ ដោយសារ​បញ្ហា​ទណ្ឌកម្មសេដ្ឋកិច្ច​រុស្ស៊ី​។ លោក​បាន​បន្តថា “​មកដល់ពេលនេះ ការនាំ​ទំនិញ​ចេញ​-​ចូល​របស់​កម្ពុជា​ទៅកាន់​ប្រទេស​រុស្សី​នៅតែ​ធម្មតា ហើយ​សម្រាប់​ប្រទេស​អ៊ុយ​ក្រែ​ន ក៏​នៅតែ​ធម្មតា​ដូចគ្នា និង​នៅតែ​បន្តសកម្មភាព​ជាធម្មតា ដោយ​អត់​មាន​ប៉ះពាល់​នោះទេ​”​។​

ដោយឡែក ពាក់ព័ន្ធ​តម្លៃ​ប្រេងឥន្ធនៈ​លោក ប៉ែន​សុ​វិជាតិ បាន​លើកឡើងថា កាលពី​សប្តាហ៍​កន្លងទៅ ប្រេង​ឆៅ​មានតម្លៃ ១៣១​ដុល្លារ ក្នុង​១​បារ៉ែល ហើយ​សប្តាហ៍​បន្ទាប់​ថ្លៃ ១៤៥​ដុល្លារ ក្នុង​មួយ​បារ៉ែល ហើយ​អាច​បន្តបន្ទាប់​ទៀត​នឹង​ឡើង​ខ្ពស់ជាង​នេះ​។ បញ្ហា​នេះ គឺជា​រឿង​មួយ​ដែល​រដ្ឋាភិបាល​យក​ចិ​ត្ដ​ទុកដាក់ ហើយ​សង្ឃឹមថា សង្គ្រាម​រុស្ស៊ី​-​អ៊ុយ​ក្រែ​ន នឹង​បញ្ចប់​ឆាប់ៗ ដូច្នេះ​អ្វីៗ​នឹង​ត្រឡប់​មករក​ប្រក្រតីភាព​វិញ​នៅពេល​ឆាប់ៗ​នេះ​។ នេះ​ការបញ្ជាក់​បន្ថែម​របស់​លោកអ្នក​នាំពាក្យ​។​

សូមបញ្ជាក់ថា យោងតាម​របាយការណ៍​របស់​ក្រសួងពាណិជ្ជកម្ម បានឱ្យដឹងថា គិត​ត្រឹម​ឆ្នាំ​២០២១​កន្លងទៅ ទំហំ​ពាណិជ្ជកម្ម​កម្ពុជា​-​រុ​ស្ស៉ី មាន​ចំនួន​ជាង ៩៤​លាន​ដុល្លារ កើនឡើង​ជាង ៣០​លាន​ដុល្លារ បើ​ធៀប​នឹង​កាលពី​ឆ្នាំ​២០២០ ដែលមាន​ជាង​មាន​ចំនួន​ជាង​៦៣​លាន​ដុល្លារ​អាម៉េរិក​។ ដោយឡែក ការធ្វើ​ពាណិជ្ជកម្ម​រវាង​កម្ពុជា និង​អ៊ុយ​ក្រែ​ន កាលពី​ឆ្នាំ​២០២១​ដូចគ្នា មាន​ចំនួន​ជាង​៨.៥៦​លាន​ដុល្លារ ក្នុងនោះ​កម្ពុជា​នាំ​ចេញទៅ​អ៊ុយ​ក្រែ​ន​ចំនួន​ជាង ៦​លាន​ដុល្លារ និង​នាំចូល​ពី​អ៊ុយ​ក្រែ​ន​ចំនួន ២.៤​លាន​ដុល្លារ​អាម៉េរិក​៕​សរន​