ដោយៈ ដេប៉ូ / សៀមរាបៈ លោក បណ្ឌិតសភា​ចា​រ្យ ហង់ ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា បាន​ថ្លែងអំណរគុណ ដល់​លោកគ្រូ អ្នកគ្រូ ដែល​យកចិត្តទុកដាក់ ខិតខំ​បណ្តុះបណ្តាល ដល់​សិស្សានុសិស្ស គ​ថ្លង់ និង​ពិការភ្នែក បានល្អ​ប្រសើរ បើទោះបីជា មានការ​ខ្វះខាត ទាំង​បច្ចេកទេស និង​សម្ភារ​ក្តី​។​

​ការ​ថ្លែង​របស់លោក រដ្ឋមន្ត្រីក្រសួង​អប់រំ បែបនេះ ធ្វើឡើង ក្នុងពេល​ចុះ​ពិនិត្យមើល ដំណើរការ​បង្រៀន និង​រៀន វិទ្យាល័យ​អប់រំ​ពិសេស ដែល​បង្រៀន​សិស្ស គ​ថ្លង់ និង​ពិការភ្នែក ពី​ថ្នាក់​ម​ត្តេ​យ្យ ដល់​ថ្នាក់​ទី​១២ នៅ​ខេត្តសៀមរាប នា​ថ្ងៃទី ១៦ ខែមីនា ឆ្នាំ ២០២២ នេះ ។​

​ក្នុង​ពិធី​នេះដែរ លោក រដ្ឋមន្ត្រី បានបញ្ជាក់​ថាៈ ចំពោះ​វិទ្យាល័យ​អប់រំ​ពិសេស​នេះ កន្លងមក ក្រសួង​បាន​យកចិត្តទុកដាក់ ជួយ​សម្រួល​ដល់​ជីវភាព​ខ្វះខាត បាន​មួយចំនួន​របស់លោក​គ្រូ អ្នកគ្រូ​ឯកទេស ដូចជា​បាន​ឧបត្ថម្ភ​ថវិកា​បន្ថែម លើ​បៀវត្សរ៍​ប្រចាំខែ និង​បាន​ដោះស្រាយ ជា​បណ្តើរៗ ទាំង​សម្ភារៈ និង​បច្ចេកទេស តាម​សំណូមពរ របស់​សាលា ធ្វើយ៉ាងណា​ឱ្យ​សាលា មាន​និរន្តរភាព និង​ដំណើរ​ការល្អ​។​

​គួរ​បញ្ជាក់ថា វិទ្យាល័យ​អប់រំ​ពិសេស ពីមុន​មាន​ឈ្មោះថា សាលា​កុមា​រគ​ថ្លង់ និង​កុមារ​ពិការ ភ្នែក​សៀមរាប ដែល​ចាប់ផ្តើម​ដំណើរការ នៅ​ថ្ងៃទី​១ ខែតុលា ឆ្នាំ​២០០០ ដែលមាន​កិច្ច សហប្រតិបត្តិការ រវាង​អង្គការ​គ្រួសារ​ថ្មី និង​ក្រសួង​អប់រំ យុវជន និង​កីឡា និង​ត្រូវ​ផ្ទេរ​មក នៅក្រោម​ការគ្រប់គ្រង របស់​ក្រសួង​អប់រំ យុវជន និង​កីឡា នៅ​ឆ្នាំ ២០១៨​។​

​នៅ​ឆ្នាំ​សិក្សា ២០២១-២០២២ មាន​គ្រូ​សរុប​ចំនួន ៤០ នាក់ ស្រី​២១​នាក់ សិស្ស​គ​ថ្លង់ និង​ពិការភ្នែក កំពុង​សិក្សា​សរុប​ចំនួន ១៩៦ នាក់ ស្រី​៨២​នាក់​។ ក្នុង​ការងារ​បង្រៀន សាលា​បាន​អនុវត្តតាម កម្មវិធីសិក្សា​គោល របស់​ក្រសួង​អប់រំ យុវជន និង​កីឡា ដោយ​បកប្រែ និង​បោះពុម្ព ជា​សៀវភៅ​សញ្ញា សម្រាប់​បង្រៀន​សិស្ស​គ​ថ្លង់ និង​អក្សរ​ប្រៃ​យ៍​ខ្មែរ សម្រាប់​បង្រៀន សិស្ស​ពិការភ្នែក តាម​សៀវភៅ​គោល​របស់ ក្រសួង​អប់រំ យុវជន និង​កីឡា​។ ក្នុងការ​សិក្សា សាលា​បា​នប​ញ្ជូ​ល​សកម្មភាព​កីឡា សិល្បៈ ភ្លេង កុំព្យូទ័រ ភាសា​អង់គ្លេស ហាត់​ស្តាប់ និយាយ និង​បំ​ណិ​ន​ជីវិត ផងដែរ​៕/V