ដោយៈ សុផល / ភ្នំពេញៈ ក្រសួងទេសចរណ៍ និង​សមាគម​ទីភ្នាក់ងារ ធ្វើដំណើរ​អាស៊ី ប៉ាស៊ីហ្វិក (PATA) កាលពី​ថ្ងៃទី​១៥ ខែមីនា បាន​សហការ​រៀបចំ​បើក​វគ្គ បណ្តុះបណ្តាល ថ្នាក់​តំបន់ ស្តីពី​គោលដៅ​ទេសចរណ៍ ប្រកបដោយ​ភាព​ធន់ (Tourism Destination Resilience) តាម​ប្រព័ន្ធ​អន​ឡាញ (zoom) ។​

​លោក ថោង រដ្ឋ​សក្តិ អគ្គនាយក​អភិវឌ្ឍន៍​ទេសចរណ៍ និង​សហប្រតិបត្តិការ​អន្តរជាតិ ជា​តំណាង​ក្រសួងទេសចរណ៍ និង​លោកស្រី Liz Oritiguera ប្រធាន​សមាគម ទីភ្នាក់ងារ​ធ្វើដំណើរ​អាស៊ី​ប៉ាស៊ីហ្វិក បាន​អញ្ជើញ​ជា​អធិបតី​បើក​វគ្គ បណ្តុះបណ្តាល​នេះ​។​

​វគ្គ​បណ្តុះបណ្តាល​នេះ ប្រព្រឹត្តទៅ​រយៈពេល ២​ថ្ងៃ ចាប់ពី​ថ្ងៃទី​១៥ ដល់​១៦ ខែមីនា ឆ្នាំ ២០២២ រៀបចំ​ដោយផ្ទាល់ នៅ​សណ្ឋាគារ​សុខា អង្គរ ខេត្តសៀមរាប ដោយមាន​សិក្ខាកាម ចូលរួម​ជាម​ន្ត្រី​ជំនាញ ពី​មន្ទីរ​ទេសចរណ៍ អាជ្ញាធរ​ជាតិ​អប្សរា និង​មន្ទីរ​ពាក់ព័ន្ធ ប្រចាំខេត្ត​សៀមរាប ចំនួន ២០ រូប​។​

​វគ្គ​បណ្តុះបណ្តាល រៀបចំឡើង ក្នុង​ក្របខណ្ឌ នៃ​កិច្ចសហប្រតិបត្តិការ រវាង​ក្រសួងទេសចរណ៍ និង PATA ដោយមាន​ការចូលរួម ជា​គ្រូឧទ្ទេស ពី​អ្នកជំនាញ PATA ។ វគ្គប​ណ្ដុះ បណ្ដាល ផ្ដោតលើ​ការពង្រឹង ចំណេះដឹង ការវាយតម្លៃ និង​ការដោះស្រាយ​វិបត្តិ ឆ្ពោះទៅកាន់ ភាព​ធន់ (Resilience) តាម​គម្រូ Tourism Destination Resilience (TDR) ដែល​រៀបចំឡើង​ដោយ PATA​។ គម្រូ TDR នេះ ផ្ដោតលើ​ទស្សនៈទាន “​ចីរភាព​អាច​ទទួលបាន ដរាបណា គោលដៅ​ទេសចរណ៍ មាន​ភាព​ធន់​”​។ ក្នុងន័យនេះ ការបណ្ដុះបណ្ដាល ផ្ដោត​សំខាន់​លើ​៖ ការវាយតម្លៃ​ហានិភ័យ (Assessing Risk), ការគ្រប់គ្រង​ហានិភ័យ (Managing Risk) និង​ការកសាង​សមត្ថភាព​សម្រប​ខ្លួន (Adaptive capacity)​។ វិធីសាស្ត្រ​នេះ នឹង​ត្រូវបាន​កែសម្រួល​ជា ASEAN Sustainability Toolkits ដើម្បី​វាស់វែង​ចីរភាព នៃ​គោលដៅ​ទេសចរណ៍​អាស៊ាន ដែល​កម្ពុជា ទទួលបន្ទុក​រៀបចំ ស្របតាម ATSP 2016-2025​។

​ការបណ្តុះបណ្តាល​នេះ ជា​វគ្គ​ទី​២ បន្ទាប់ពី​វគ្គ​ទី​១ ត្រូវបាន​រៀបចំ នៅ​រាជធានី​ភ្នំពេញ កាលពី​ខែធ្នូ ឆ្នាំ​២០២១ ដោយមាន​សិក្ខាកាម បញ្ចា​ប់​ការសិក្សា ចំនួន ៣០​រូប​៕/V​