ដោយៈ​សុផល​/​ភ្នំពេញ​៖​គណៈកម្មការ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូ​វីដ​-១៩ នឹង​រៀបចំបន្តធ្វើ​យុទ្ធនាការ​ជាតិ​អប់រំ​ការពារ​ការចម្លង​វីរុស​កូ​វីដ​-១៩ ក្រោម​ប្រធានបទ “​កូ​វីដ​-១៩ បំប្លែង​ថ្មី អូ​មី​ក្រុង ឆ្លង​ខ្លាំង​ជាង​មុន អាច​បណ្តាលឱ្យមាន​ហានិភ័យ​ដល់​អ្នក និង​គ្រួសារ ” ដើម្បី​ជំរុញ​ការទទួលខុសត្រូវ​រប​ស់បុ​គ្គល គ្រួសារ សហគមន៍ និង​ស្ថាប័ន​ពាក់ព័ន្ធ អាជ្ញាធរ​មូលដ្ឋាន រួមគ្នា​ទទួលខុសត្រូវ​ក្នុង​ស្មារតី​សាមគ្គីភាព ដើម្បី កាត់ផ្ដាច់​ខ្សែចម្លង​វីរុស​កូ​វីដ​-១៩ បំប្លែង​ថ្មី ឱ្យមាន​និរន្តរភាព​នៃ​ការរស់នៅ​ជាមួយនឹង​វីរុស​កូ​វីដ​-១៩ តាម​គន្លង​ប្រក​តី​ភាព​ថ្មី​ផងដែរ​។​

​បច្ចុប្បន្ននេះ វីរុស​កូ​វីដ​-១៩ ប្រភេទ​អូ​មី​ក្រុង (Omicron) គឺ​កំពុងតែ​សកម្ម​ចរាចរ​យ៉ាង​ឆាប់រហ័ស​ដោយ គ្មាន​ព្រំដែន និង​គ្មាន​លិខិតឆ្លងដែន នៅលើ​សកលលោក នៅក្នុង​តំបន់ និង​នៅក្នុង​ប្រទេស​កម្ពុជា ដែល តម្រូវឱ្យ​បងប្អូន​ចាំបាច់​ត្រូវតែ​ប្រុងប្រយ័ត្ន និង​បន្ត​ចូលរួម​ការពារ ព្រមទាំង​ឆ្លើយតប​ទៅនឹង​ជំងឺ​កូ​រីដ​-១៩ នេះ​ឱ្យបាន​ទាន់ពេលវេលា ដើម្បី​ជៀសវាង​បាន​នូវ​មហន្តរាយ​សុខភាព​សាធារណៈ ផលប៉ះពាល់​សេដ្ឋកិច្ច គ្រួសារ និង​សេដ្ឋកិច្ចសង្គម រួមទាំង​ការចៀសវាង​បាន​នូវ​ការវិលត្រឡប់​ទៅរក​ផល​លំបាក​នៃ​ការរស់នៅ ប្រចាំថ្ងៃ​របស់​បងប្អូន ដើម្បី​ធានាបាន​នូវ​និរន្តរភាព​នៃ​ការរស់នៅ​ធម្មតា​ក្នុង​ប្រក្រតីភាព​ថ្មី​របស់​បងប្អូន​បាន យូរអង្វែងផងដែរ​។​

​យុទ្ធនាការ​ជាតិ​អប់រំ​នេះ នឹង​ប្រព្រឹត្តទៅ​នៅ​ខេត្តកំពង់ស្ពឺ នា​ថ្ងៃទី​២២​ខែមីនាខាងមុខ​ក្នុង​ក្របខណ្ឌ​ទូទាំងប្រទេស នៅតាម បណ្តា​រាជធានី​-​ខេត្ត​ផ្សេងទៀត​ក៏មាន​ការណែនាំ​ឱ្យ​ចាត់ចែង​រៀបចំ​យុទ្ធនាការ​នេះដែរ ហើយនឹង​ប្រព្រឹត្ត ទៅ​ក្រោម​អធិបតីភាព​lok​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល ព្រមទាំង​មានការ ចូលរួម​ពី​សំណាក់​លោ​ក្រី​វេជ្ជបណ្ឌិត ឱ វណ្ណឌី​ន រដ្ឋលេខាធិការ​ក្រសួងសុខាភិបាល និង​ជា​ប្រធាន អនុគណៈកម្មការ​អប់រំ បណ្ដុះបណ្ដាល និង​ទំនាក់ទំនង​សាធារណៈ នៃ​គណៈកម្មការ​អន្តរក្រសួង​ដើម្បីប្រយុទ្ធ​នឹង​ជំងឺ​កូ​វីដ​-១៩ លោកស្រី​វេជ្ជបណ្ឌិត លី អាយ​លែ​ន តំណាង​អង្គការ​សុខភាព​ពិភពលោកប្រចាំនៅ​កម្ពុជា និង​លោក​ សី ហ្វូ​រ៉ុ​ក ហ្វា​យូ​ហូត តំណាង​អង្គការ​យូ​នី​សែ​ហ្វ ប្រចាំ​នៅ​កម្ពុជា ផងដែរ​។​